我無啦啦同隻芝娃娃交換咗身體，跟住無啦啦又遇上喪屍大爆發: （53）

我地三個出恆曬力，抵禦外面一班想衝入嚟嘅喪屍。

「唔得啦…我無力啦…」阿明漸漸手軟腳軟。

「咁渣架你！咁快就無力！」肌肉爆棚嘅Irene把口咁講，但佢其實都開始攰，額頭大汗疊細汗。

我自己亦都一樣，體力已經消耗咗大半。

班喪屍則同我地相反，佢地體力仍然充沛，而且數量有增無減。





此消彼長之下，我地越退越後，就快頂唔住。

大約頂多一分鐘，阿明徹底無曬力，迫不得已鬆開咗雙手。

再過多三十秒，我同Irene都無辦法再支撐落去，一瞬間，防線徹底被衝破。

一堆密密麻麻嘅喪屍，推開塞喺門口嘅檯櫃、locker同波檯等雜物，一窩蜂咁衝入嚟。

我地三個第一時間衝上樓梯，飛奔返上樓上。





「Raughhh！！！」

一隻隻飢餓嘅喪屍就跟住我地上嚟樓上。

無路可走嘅我地只能擸架撐同佢地打過。

弱雞啲嘅阿明用斧頭，我同Irene就揸鐵通。

同喪屍搏鬥咗一陣，我地就發現唔對路。





喪屍嘅數目實在太多太多，佢地幾隻幾隻咁上，我地根本無得打。

逼於無奈，我地只能使出殺手鐧。

匿埋喺福利會嘅呢段期間，我地逢親屙屎屙尿都係用個膠桶裝住。

每人一個桶，分別放咗各個角落頭。

我最先搵到機會突破喪屍嘅包圍，隨即跑去右下角角落頭，攞起自己桶嘢，潑向嗰班喪屍。

啲臭味一攻出嚟，啲喪屍確實係退後咗。

Irene同阿明就趁呢個機會，分別到其他角落頭，搵返自己桶屎尿，先後淋去喪屍身上。

而其實我地儲落嘅屎尿好有限，畢竟呢段時間除咗餅乾之外都無啖好食，自然就無乜屎尿屙。





所以兩三吓手腳就潑曬啲屎尿出去，不過份量少唔緊要，有味就得。

殊不知，啲喪屍唔知係咪餓得太耐，定還是我地啲排洩物唔夠臭，佢地聞到啲臭味都好似唔係好介意咁，趕都趕唔走。

睇怕呢啲就係所謂嘅「餓起上嚟屎都照食」。

樓上嘅喪屍唔肯走，樓下又不斷有喪屍湧上嚟，眨吓眼，千幾呎嘅地方已經聚集咗超過三十隻喪屍，而且數目相信只會越嚟越多。

「無辦法啦！跳窗啦！」

Irene用鐵通將佢面前嘅喪屍掃低，下一秒轉身拉開窗門，諗都唔諗就跳咗落去。

我同阿明都嚇咗一跳。雖然呢度離地下唔高，但估唔到Irene咁勇咁果斷，直接就跳落街。





「喂！你地快啲跳落嚟啦！」

眼尾睄落樓下，原來Irene並唔係直接跳落街，佢只係跳咗落對出馬路一架校巴嘅車頂上。

既然Irene跳咗落去，我地都無理由唔照跟。

「阿明！我嚟掩護你！你跳先！」我同阿明交換咗武器之後，就上前幫對方做掩護。

校巴停泊嘅位置距離福利會大概有三米，假如出盡力嘅話，要跳過去應該唔難。

只不過阿明行到窗邊，望住出面，遲遲唔肯跳。

我就揸住斧頭，幫阿明做掩護，啲喪屍一埋身一伸手過嚟，我就斬斷佢地啲手。

「等咩呀你！快啲跳啦！」企喺車頂上嘅Irene催促。





「我…我有啲驚…」

「驚乜鬼呀！有我喺下面接住你！快啲跳啦！」Irene大聲喝阿明。

我一邊揮動斧頭斬喪屍，一邊用激將法同阿明講：「你咁樣都唔敢跳，唔怪得Irene鍾意我都唔鍾意你！」

「你收聲！邊個話我唔敢！我依家就跳俾你睇！」

激將法果然有用，阿明鼓起勇氣，向前一躍，用盡全身力氣跳出窗外。

可惜佢跳得唔夠遠，只係勉強掹車邊掂到車頂邊緣，好在Irene及時伸手接住佢，並且將拉佢上車頂。

阿明都跳咗，咁就得返我一個。





雖然我其實都有少少淆唔敢跳，只不過面對住眼前數唔清嘅喪屍，我只有一個選擇。

喺心入面數三秒後，隨即我一個轉身，揸住斧頭衝向身後嘅窗口，然後飛身一跳。

憑借住南亞仔優越嘅運動神經，我輕易而舉就跳落下面校巴嘅車頂。