我無啦啦同隻芝娃娃交換咗身體，跟住無啦啦又遇上喪屍大爆發: （49）

我同Irene負責引走啲喪屍，阿明就拎住三袋嘢食，衝埋去福利會門口，再攞斧頭劈爛道門把鎖。

一見到道門開咗，我地兩個就擺脫班喪屍，並用最快嘅速度飛奔。

雖然班喪屍追得好貼，但始終慢我地一步。

最後我同Irene有驚無險，順利「達陣」。

阿明隨即閂埋道門，之後我地再搵嘢頂住門口，唔俾啲喪屍入嚟。





「Raughhh！」啲喪屍入唔到嚟，只管喺度咆哮。

沿樓梯行上去就係福利會，地方超過一千呎，本身係一個空曠嘅活動場地。

裡面無喪屍，周圍放咗十幾張膠櫈同一張乒乓波檯，靠墻位置有一排locker。

角落頭仲有一間雜物房同一間辦公室，墻上面就有一排窗。

為咗安全起見，我地喺辦公室搬咗個櫃同檯落樓下塞住道門。





好在我地三個都係男人，而且有氣有力，就算幾重嘅嘢都搬到。

搞掂之後，我地再返上樓上。

由於全港電力供應中斷，因此所有燈都係唔著。

趁個天未黑曬之前，仲有少少光透入嚟，我地四周圍搵吓有無蠟燭或者電筒。

結果好好彩，我地喺雜物房搵到三支電筒，兼且仲搵到一箱礦泉水。





頭先大家都俾啲雨淋到濕曬，跟住我地又分頭拎住電筒，搵搵有無毛巾之類嘅嘢。

搵咗一陣，Irene第一個搵到乾毛巾。

佢行埋嚟遞咗一條俾我：「呢度有塊布，你快啲攞去抹啦，唔好冷親呀。」

「多謝。」我接過毛巾，抹走身上嘅水珠。

「應該係我講多謝先啱，喺超市嗰陣，好彩得你及時接住我，否則我實俾玻璃碎插死或者俾喪屍咬死。」

「都係舉手之勞啫。」我話。

「你後面背脊抹唔到，等我幫你。」Irene行過嚟幫我抹身。

「乞嚏！Irene你仲有無多條毛巾？」阿明一邊乞嚏，一邊行過嚟問。





「無啦喎，你自己再搵吓啦。」Irene答佢。

阿明用手上嘅電筒照過嚟，睇到Irene幫我抹背脊，兼睄到我手上條毛巾，跟住即刻面色一沉，眉頭緊皺咁啤住我。