我無啦啦同隻芝娃娃交換咗身體，跟住無啦啦又遇上喪屍大爆發: （48）

行返出去商場，見到太陽開始落山。

「我地跟住去邊度好？」阿明問。

「搵個安全嘅地方匿過夜囉。」我答。

「行前少少就係街坊福利會，不如就匿去嗰度啦。」阿明提議。

「都好喎，Irene你點睇？」我問。





「吓？你地話咩話？」Irene無留心聽我地講嘢。

由離開超市嗰陣開始，感覺佢就有啲神不守舍。

「Irene你唔舒服呀？做乜你塊面咁紅嘅？」阿明問。

「吓有咩？無呀？」Irene尷尷尬尬咁耷低頭。

「轟隆！」





天空突然雷電交加。

我地唔講咁多，拿拿臨行快兩步。

好快見到前面有一座只有兩層高嘅平樓建築。

地下一層係郵局，二樓外牆就掛住「柴灣區街坊福利會」嘅banner。

只要再行多二十米，咁就會到達我地嘅目的地。





偏偏天公不造美，呢個時候落起大雨。

密集嘅雨水一下子淋到我地濕曬，沖走我地身上浸臭雞蛋味。

無咗浸臭味做掩飾，附近嘅喪屍立即聞到人肉嘅香味。

隨即一隻二隻就擰轉面，向住我地衝埋嚟。

大雨之下，我地被迫又要同喪屍展開搏鬥。

由於阿明戰鬥力比較弱，所以我借咗把斧頭俾我，而我就揸返鐵通。

喪屍嘅數量大約十隻，照計憑我地三個之力，應該勉強對付佢地。

弊就弊在同時間落緊好大雨，地下變得好滑，我同阿明先後跣低。





「你無事呀嘛！」Irene即刻衝過嚟扶起我。

「無，我無事。」

「我有事呀！」阿明俾四隻喪屍㩒住喺地下。

我同Irene打走身旁喪屍，然後一齊跑去幫阿明解圍。

啲雨越落越大，情況對我地越嚟越不利。

好在我地及時諗到對策。