我無啦啦同隻芝娃娃交換咗身體，跟住無啦啦又遇上喪屍大爆發: （36）

入到廁格，啱啱閂埋門剝咗條褲，正想屙尿嗰陣，忽然間，聽到本來喺出面睇水嘅阿明入咗嚟：「Irene有喪屍呀！」

「Raughhh！！！」除咗阿明把聲，仲聽到有喪屍叫。

Irene「哼」咗一聲，接住就係「乒鈴嘭唥」嘅打鬥聲。

雖然我都想幫手，不過人有三急，點都係要屙咗督尿先。

我一邊雙手頂住道門，一邊坐喺馬桶上屙尿。





而打鬥聲一路持續，聽得出Irene同阿明兩個，由廁所入面打到出廁所外面。

一屙完尿，我就著返條褲，連手都唔洗，諗住衝出去幫手。

點知廁所出面人影都無，嗰兩條友唔知去咗邊。

我心諗佢地唔係dum低我走咗吓話？

「人肉…Raughhh!」





走廊上，有七、八隻喪屍發現咗我，並以好快嘅速度衝向我。

頭先留咗屁無放，依家卒之可以派上用場。

我「呠」一聲放咗個臭屁，見到啲喪屍一縮，我就拿拿聲逃走。

埞個彎跑落樓梯，落到嚟商場地庫，我即刻又俾四隻喪屍前後左右包圍。

今次無路可走，而且屁亦都已經放完，所以只能硬碰硬同班喪屍打過。





我鐵通一揮，先攻擊右手邊最接近我嘅喪屍，隨即再起飛腳踢向左手邊嘅喪屍。

心口嗰對大波則隨住我每一個動作而擺動，感覺好佗手掕腳好累贅。

我掛住對付左右兩隻喪屍，忽略咗前後。

前面有隻肥佬喪屍雙手舉起，想箍我條頸，但途中唔小心跣腳，導致雙手摸落咗少少，由箍頸變咗揸波。

「Sorry…我無心…」條友居然同我道歉。

我就話：「我俾你揸波，你可唔可以唔好咬我？」

「唔得…Raughhh！」下一秒，對方就張開血盆大口。

我一棍毆落佢個頭，同時有隻喪屍從後捉住我。





「仆街！放手呀！」依家嘅我轉唔到身，只能向後批掙，試圖令隻喪屍鬆手。

結果唔成功不得止，仲陸續俾另外三隻喪屍擒埋一份。