我無啦啦同隻芝娃娃交換咗身體，跟住無啦啦又遇上喪屍大爆發: （30）

另一邊廂，粉衫大隻佬似乎已經發現，眼前嘅紋身佬並唔係自己細佬。

佢真正嘅細佬反而上咗隻老鼠身。

「雖然唔知發生咩事，但快啲還俾個身體我細佬！」粉衫大隻佬將老鼠收喺褲袋，之後出招攻擊大波妹。

「有本事打贏我先講啦！」大波妹上前接招。

「砰！砰！砰！」





同時間，出面一大班喪屍不停咁撞門，十幾手已經喺中間條門喇度伸咗入嚟。

咁嘅情況下，佢地仲掛住打交，真係服咗佢地。

「搵到啦搵到啦！」恤衫男喺廚房搵到一把生果刀。

佢先𠝹斷我手上條繩，然後我就自己用刀，𠝹斷埋綁喺對腳條繩，最後再為對方鬆綁。

「哎呀！」上咗紋身佬身嘅大波妹中咗對手一腳，成個人飛身仆落地下，啱啱好仆到落我地面前。





大波妹掩住手臂嘅傷口：「可惡！估唔到條友咁抽得！」

「Irene？係Irene把聲？」恤衫男一吓就認出大波妹把聲，「Irene你…你…」

「係呀！我終於得償所願，變成男人啦！哈哈！」大波妹搶答。

「快啲俾個身體我細佬！」粉衫大隻佬怒氣衝衝。

就喺下一秒，一大堆喪屍卒之衝破大門，陸續湧入嚟茶餐廳。





大隻佬企嘅位置最靠近門口，因此即刻就俾幾隻喪屍纏上。

細個我喺呢間茶餐廳返過暑期工，知道後門喺邊，於是第一時間轉身搵地方走。

「喂！仲呆喺度做咩呀！走啦！呢邊呀！」我大聲嗌恤衫男同大波妹。

本來佢地俾啲喪屍嚇呆咗，俾我嗌一嗌個人先醒返，拿拿臨跟埋我一齊走。

「咪走呀喂！」聽把聲，粉衫大隻佬好似想追上嚟。

然而當我地再回頭嘅時候，佢已經俾淹沒喺屍群之中，成為喪屍嘅食物。

反觀我地則有驚無險，順利逃離出茶餐廳。