我無啦啦同隻芝娃娃交換咗身體，跟住無啦啦又遇上喪屍大爆發: （29）

「細佬你癲撚咗呀！阿哥你都敢打？」

「嘩！拳頭好有power！爽呀！」跟住大波妹連環出拳狂毆。

粉衫大隻佬聽見「細佬」把聲變咗女人聲，嚇咗一跳。

佢一邊擋隔，一邊問：「點解細佬你把聲變成咁嘅？」

「因為我唔係你細佬囉，懵柄！」大波妹出手超狠，拳拳到肉。





「阿哥！你喺邊呀？」忽然間，有把聲音呼喚緊自己阿哥。

粉衫大隻佬認出細佬把聲，立即東張西望。

大波妹想趁機起飛腳，點不知俾對方避過咗，然後大隻佬反過嚟起腳還拖，將大波妹踢到退後幾步，隨即更低頭發現有隻老鼠叫緊自己。

「細佬？係你？」

「阿哥！做乜你變到成個巨人咁嘅？」





「細佬！你…你變咗老鼠？」粉衫大隻佬捉起隻老鼠。

「阿哥小心！」

大波妹舉起成張圓形餐檯，一嘢車埋去大隻佬。

好彩隻老鼠提一提，咁大隻佬先及時踎低避開。

結果張圓檯撼咗埋去封住大門口嘅木板度。





「卡喇」一聲，成塊木板裂開咗，出面啲喪屍開始撞門想湧入嚟。

手腳同我一樣都被綁住嘅恤衫男，呢個時候彈吓彈吓咁行埋我度：「Irene！你無嘢呀嘛！頭先條友有無搞你？」

「我唔係Irene！你個Irene家陣上咗嗰個紋身佬身！」

「吓？你講咩呀？同埋你把聲點解唔同咗嘅？」

「頂！總之成件有啲複雜，依家唔好講呢啲嘢嘅時候，出面啲喪屍隨時衝入嚟，你快啲去廚房搵把刀又好、較剪又好，總之搵嘢解開我地身上啲繩啦！」

「但你唔係Irene，咁你係邊個？」

「屌你仲問？去啦！」我大聲喝佢佢先肯郁。