我嘅職業係專溝人地個女朋友: 11.24

「咩推測?」黎浩明不解。
 
「你有無聽過有個職業係”專幫人溝人地個女朋友”?」Celia諗左陣後問。
 
「無... 咩職業黎架?」
 
「好多年前，曾經有個男人係專做衣個職業，佢會專幫d想同女朋友分手但又唔想hurt到女朋友嘅男人溝佢個女朋友等女朋友變心，然後調返轉主動同個男仔分手，咁個男仔分到手之餘自己唔駛做衰人個女仔又唔駛點傷心...」Celia解釋。
 
「竟然有d咁嘅職業?」黎浩明聽完覺得有d匪夷所思。
 




「釋囚講果陣我都係第一次聽，而衣個神秘人當時正正稱自己為”壞人”... 不過有一年衣個壞人突然金盆洗手唔再接生意，所以就再無衣個職業。聽聞壞人收山後本身都有唔少人想繼承佢衣缽繼續做衣門職業，但因為佢地成功率太低所以漸漸都無人會再幫襯佢地...」Celia繼續講。
 
「雖然個idea聽落其實係幾好，不過真係實行起上黎確實唔太現實...」黎浩明約略諗左陣後講。
 
「但衣個”壞人”就偏偏做得到。 聽聞佢接過嘅case，好似真係從未失敗過...」Celia接道。
 
「咁犀利? 咁因為佢都係叫”壞人”所以你懷疑佢其實係你爸爸?」黎浩明問。
 
「本身我都係諗咁岩得咁橋，但聽完你岩岩講嘅事，知道左我爹哋同姨媽之前原來有衣層關係同經歷，我就覺得成個推測好合理，因為我搵到當中嘅動機...」Celia開始一副偵探上身咁嘅樣。
 




「動機?」
 
「如你所講，因為姨媽嘅事，我爹哋當年一定好內疚覺得自己有份害死姨媽，而佢從事衣個職業嘅原因係因為佢唔想再見到有人為情傷心而自殺... 」Celia解釋。
 
「但點解佢可以咁叻做到其他人都做唔到嘅野?」黎浩明提出疑問。
 
「我爹哋間感情輔導所之所以可以咁成功，係因為佢好叻搵到情侶間嘅問題所在同埋女方真實想要嘅係d咩野然後再比意見佢地補救。而衣種能力，其實同樣好適合搶人女朋友，因為知道左情侶間問題所在後，佢可以選擇比意見幫佢地嘅同時，其實都可以利用衣點加以破壞兩人關係再乘虛而入...
 
另外仲有一點係，我爹哋叫立仁，英文名係Ryan，加上姨媽嘅事所以佢叫自己做壞人...」Celia滿有邏輯咁推斷。
 




「你嘅推理能力都好好喎... 咁點解你又唔繼承父業而會選擇做個記者?」黎浩明邊佩服邊問。
 
「或者係我無佢地果種使命感掛... 由細到大雖然佢地好恩愛，但就不斷會同我講其實失戀都好正常，每次戀愛其實都係人生成長嘅一部份，唔駛過份追求完美或者太在意一次半次失戀。不過岩岩聽完你嘅故事，我終於明白點解佢地成日咁同我講，大概佢地都驚我有日如果失戀會步姨媽後塵掛...
 
另一方面，我自己其實都無拍過拖又邊好意思仲去教人點拍拖呀...」Celia有少少尷尬咁講。
 
「咁大個女都未拍拖? 你生得咁靚，無理由架喎...」黎浩明唔太相信。
 
「我自細有個由細玩到大嘅青梅竹馬，好細個開始我個心就已經比佢偷左...」Celia難得有d面紅。