我嘅職業係專溝人地個女朋友: 6.23

聽完Wayne嘅歌聲同埋最後喊到聲嘶力竭嘅哭聲，我心情都變得異常沉重…
 
佢地真係好了解對方好重視對方… 為左以防萬一，佢一早亦都已經預備好補底方案。果然係一對無任何切入點可以拆散佢地嘅情侶，除左個天要格硬黎之外…
 
不過好彩佢嘅努力同遠見起到作用，至少令Queenie暫時肯放低自殺嘅念頭。
 
而且聽完佢段錄音，我都有少少被觸動同點醒嘅感覺。
 
「佢真係諗得好周詳… 」我對Wayne衣個人由衷嘅欣賞和佩服。
 




「佢就係一個咁嘅人…」Queenie亦一樣。
 
「所以衣張支票你代佢收返佢啦，我受之有愧呀…」我喺銀包拎返之前Wayne比我張支票 Queenie。
 
「佢嘅錢我無資格代佢收返呀… 佢比你你就照袋啦，始終佢本身都唔肯定你會唔會失敗，所以你都真係令佢安心左唔少。」Queenie拒絕。
 
「但唔係佢段錄音，我最後好可能都係失敗… 一係咁啦，衣筆錢你當係佢比你嘅資助，等你將來可以係度完成佢嘅心願。如果最後真係用唔著，你都可以選擇捐左佢…」我換個方式再勸佢接受。
 
「咁我暫時keep住先，如果將來真係用得著就當你入股啦。」聽到Wayne嘅心願Queenie終於肯暫時收左張支票。
 




「好~」
 
 
幾個月後，Queenie打比我話我聽果間餐廳嘅老闆娘突然移民唔做，所以佢就用晒自己嘅積畜再加Wayne留低果筆錢頂左間餐廳黎做。
 
之後間中我都會去探下佢搵佢傾下偈，一來睇下佢過成點，二來佢都係少有知道我秘密嘅人，有需要時我都會搵返佢傾訴一下。
 

直至大概兩年後嘅一日，有次我去探佢嘅時候發現佢同個男顧客好似好friend好好傾咁，一問佢之下先知原來衣個男顧客住喺附近，每日朝早都會黎飲杯咖啡，所以慢慢同Queenie就成為左好朋友每日都會見面傾下偈。
 




望住佢地傾偈開心嘅笑容，我有預感Wayne嘅委託或者不久後就可以由另一個男人代替我去完成。
 
 
最後嘅一堂課，真係好難學又係我地必需要學會嘅一課。
 
柔柔，你…係咪都係比緊同樣嘅課堂我?