我嘅職業係專溝人地個女朋友: 6.12

「你跟踪我？」當佢拎住包碳去渡假屋果陣，終於發現左我，應該係話我故意比佢發現到我。
 
「嗯...因為好擔心你會做傻事。」我直認不諱。
 
「我好多謝你幫左我呃阿Wayne，但你唔好理我啦...」Queenie迴避我眼神dup低頭講。
 
「我知Wayne最擔心就係你受唔住打擊會做傻事...」我代Wayne講。
 
「你唔會明我衣家到底有幾絕望，有幾傷心幾想死架喇...」佢繼續唔敢望我咁講。





「信我，我好明白你嘅感受… 但我已經辜負左Wayne嘅委託，如果再比你做傻事，我真係會好愧對於佢...」
 
衣段時間我知我要搵野轉移Queenie嘅注意力，而我亦諗過因為本身Queenie對我就係假唔係真係有感情，所以知道真相對佢嘅影響並唔會大。

「Wayne嘅委託？我唔明你咩意思...」果然佢即刻問。

「我都唔瞞你...其實當初我係有目的咁接近你，所以先會出現係拳館。介紹返，我嘅職業係專溝人地個女朋友，大家都叫我”壞人”。」我盡量淡然咁講。
 
「你嘅意思係Wayne委託你叫你黎溝我？」Queenie消化左陣後就明白。





「係，當時佢同我講佢鍾意左第二個又唔想見到同你分手果陣你會太傷心，所以佢搵我幫手希望我可以令你移情別戀。不過之後聽完你講你地嘅故事，我先知佢背後真正嘅用意...」我開始解釋。

「... 佢到底當我係咩? 點解會覺得我咁易就會移情別戀? 而且你個職業咩黎架? 咁離譜? 會唔會太奇怪太陰質呀...」Queenie聽完後有d受傷，似乎仲有少少想將佢嘅憤怒轉移發洩係我身上。
 
「咁我估佢當時都真係無辦法所以先咩都試下... 而且我口碑一向好好成功率好高，係信心嘅保証。事實上你最後咪又係喺度扮移情別戀？其實如果唔係佢搵左我在先，我估佢最後都未必真係咁易信你變左心…
 
不過我都唔否認，本身我確實無任何方法可以插入到喺你地中間，... 衣個係我第一次遇見咁嘅情況。 如果唔係你咁岩主動搵返我幫手，我應該真係完成唔到衣個任務…」我解釋亦坦然承認衣個任務嘅難度。
 
「咁你當然無可能會成功啦… 唉，佢真係好傻...」諗起Wayne，Queenie又開始眼濕濕。
 




「其實你地都係一樣，心目中只係為對方著想...」我不其然講。
 
「所以你應該明白我衣家有幾唔開心同絕望啦... 求下你幫埋我衣次唔好再阻止我!」Queenie帶有少少哀求嘅眼神望住我講。
 
「我明，但Wayne真係唔希望你為佢咁呀...」我當然不為所動唔會由佢做傻事。
 
「佢走左就梗係講得容易啦，知唔知留低嘅人先係最辛苦...」終於Queenie開始崩潰式暴喊。
 
「我真係明，因為曾經，我都有一個對我好重要嘅人離開左我，而且某程度上仲要係我害死左佢...」
 
聽到我嘅說話，Queenie稍為收左佢嘅喊聲，然後一直望住我，期待我繼續講落去。
 
於是我嘆氣左一聲，然後開始將我嘅故事講比Queenie聽。
 
 




真係唔知發生咩事，竟然連續兩個客都要我主動分享返我嘅往事佢地聽…