我嘅職業係專溝人地個女朋友: 6.11

「你知唔知個傻仔諗住點同我解釋佢之後會消失? 佢話因為佢想散心所以決定要去外國做野，諗住咁就可以解釋到點解我以後都唔會搵到佢。
 
而最可笑嘅係對住一個咁假嘅大話，我唯一可以做嘅就只有扮信佢然後祝福佢係果邊會開開心心...」過左一個多星期後Queenie笑住但又流住眼淚咁同我講。
 
然後過多唔駛好耐，Wayne就靜悄悄咁離開左人世...
 
 
當我收到衣個消息後，我好緊張之後Queenie嘅反應，所以即刻一直暗地裏咁跟踪佢，然後跟左一輪後我就發現佢果然諗住偷偷地跟阿Wayne一齊去另一個世界報到...而在公在私我都要阻止佢咁做。
 
其實我有咁嘅預警，係因為我曾經同善柔睇過一套戲，叫做”比悲傷更悲傷的故事”...




 
我好記得當時當女主角決定跟男主角一齊去死果陣，善柔撓住左我隻手係我膊頭喊左好耐好耐…
 
「傻瓜…唔好喊啦，戲黎架咋…」我邊拍善柔膊頭邊安慰佢。
 
「仁仁，你可唔可以應承我第日如果你有咩絕症一定要話我聽唔可以暪住我?」善柔邊喊邊講。
 
「嘩，你咁咒我嘅... 放心啦，所謂”好人不長命，壞人禍千年”，我邊會咁易死啫~」我嘗試講下笑想舒緩下氣氛。
 
「應承我呀!」但善柔好堅持要我應承佢。




 
「知喇，放心啦我咩都會講你聽… 如果第日我生cancer你一定第一個知~ 咁放心未呀?」於是我只好笑住講。
 
「喂呀! 唔準講衣d呀!」打左我一拳然後佢就終於破涕為笑。
 
明明係你要我應承你，到到我應承又話我講埋衣d野，d女仔真係呢…
 
只係當年我咁應承左你，但就唔記得叫你都要應承返我，結果你就粒聲唔出咁走左去掉低我一個人…
 
鄺善柔你衣個自私精…