我嘅職業係專溝人地個女朋友: 5.9

不過當我地好似無事咁一齊返後，我發覺我對佢已經完全無晒之前佢比到我果種安心嘅感覺，我成日會好擔心自己之後都會行返母親嘅舊路，但同時間我又唔捨得因為咁就同Joe分手，於是我開始會對佢作出各種試探同時亦為自己作出各種唔同嘅打算。
 
例如我要求層樓要有我個名，咁就算最後要離婚我都唔會一無所有。或者Joe覺得有愧於我，所以雖然衣個做法係投資角度並唔明智，但佢見我堅持都無再反對。
 
然後我又要求要同我母親以及小白一齊住。衣樣其實我本身一直都好渴望，因為我唔想扔低我母親同小白，我同自己講過以後我地三個都要一齊生活。不過一直我都唔知點開口，但衣家我就順勢提出埋衣個要求，順便測試下阿Joe有幾著緊我對我有幾認真。
 
Joe初初果然唔肯，但我就堅持。嘈完冷戰左幾日後，佢最後都係屈服，話諗過如果將來生小朋友有人幫手湊都係好事黎嘅。
 
佢應承我果刻其實我好開心，對佢好似又有返果種安心嘅感覺。但過左一排衣種感覺又慢慢消失左，我又會開始擔心然後再向佢提出左其他要求，例如住邊區，去邊影相，間屋要點裝修等等… 好似每次我都要佢順晒我所有意就晒我所有野我先可以得到返果少少嘅安全感。如果佢拒絕，我就會覺得佢唔愛我…
 




同時間我又開始諗如果佢有多錢傍身，佢就會身痕想曳，所以最好唔比佢出軌嘅另一個方法就係等佢無晒d錢。於是我用計偷偷地睇到佢嘅銀行戶口存款，然後就計劃將佢所有嘅錢都用晒喺我地嘅婚禮同間屋上面。
 
如果佢無晒閒錢，我估我對佢應該可以有返多d 安全感。
 
雖然因為以上衣堆問題我地鬧過好多次交，但最後阿Joe都選擇順晒我意。
 
理性上我知係有少少委屈左佢，但心入面我係開心佢最後都會向我屈服，我知如果我唔係喺佢心入面有足夠份量，佢大可以拒絕我再同我分手…
 
所以我打算做埋最後一樣野，之後我就應該可以完全信任佢。