精子is money: 第118章 聖誕告白

眨下眼咁就黎到聖誕節當日，我提早出門去到約定地點，當晚街上日來人往，一對對情侶係狹窄既街道穿往。街道上掛滿燈飾，燈飾五光十色，閃閃發亮，非常炫目，令人深深體會到聖誕節既氣氛。

「無錯，今年係我第一次聖誕節出街玩。」我挨住其中一枝電燈柱望住呢一切既情景。


十分鐘後，阿牛，李右婷都陸續到達。李右婷身穿樸素既白色外套，下身一條藍色長牛仔褲，再加埋一對簡單既波鞋，無化妝，更加顯出李右婷既清純自然。

冇幾耐，林舒寶都黎左，佢身上只係著住單薄既白色冷衫，紐仲要無扣，露出一件黑色Ｕ型小背心，下身一條碎花短裙，一對黑色長靴，

長靴入面再加上一對黑絲，黑絲的確為林舒寶添加左幾分姿彩，不過望住佢呢身裝扮真係會有Ｄ擔心佢會唔會冷親。




「ＭＥＲＲｙ　ＣＨＲＩＳＴＭＡＳ.」林舒寶望住我地講，之後林舒寶既視線唔知點解不斷係我身上游走。

「聖誕節快樂。」我地幾個齊聲回應。

 
「做咩係咁望住我？乜我塊臉有野？」我對住林舒寶講，跟住林舒寶從腰間拎左一個小禮物俾我。

「多謝晒啵。」林舒寶向我伸出左手。



「其實我有買到架，只係唔記得左帶姐，咁啦下次返學先再俾你，今次我請你飲野當頂住數先。

我拍一拍自己褲袋扮搵禮物，原來岩岩林舒寶只係望緊我身上有無禮物，但係身為毒撚既我又點會記得買禮物呢。

「唔洗啦咁，過左節日咁就無意思啦。」林舒寶話

「你地口唔口渴？我有Ｄ口渴，可以順便買埋野飲俾你地。」阿牛講完呢句就轉身行去買野飲。

「好呀，檸檬茶呀。」我同林舒寶望住遠方既阿牛齊聲講。



「我唔洗啦，多謝你。」李右婷講完呢句後，自己一個行左去前面睇燈飾。



此時，周圍既人不斷歡呼，原來前方有對情侶，男方踡地正向女方求婚。

「阿積呀，其實我有野想同你講。」林舒寶顯得有Ｄ緊張，唔知佢想同講咩呢？

「係？」同時周圍非常嘈吵，隔黎情侶求婚成功，周圍既路人係到歡呼鼓掌。

「其實我鐘意左一個人，但我又唔知佢對我有無好感。」林舒寶問我

「咁你咪試下同佢表白囉。」我講既同時亦好擔心佢鐘意既人係我。



林舒寶沉默左幾秒，只見佢深深咁吸左啖氣。

「其實我……其實我……鐘意既人係你。」林舒寶好緊張咁講完呢句，即使已有心理準備既我，聽到呢句既我個心都離一離，再加上呢個尷尬氣氛，當堂唔知點應佢好。

「我諗你誤會左啦，係咪我做錯左Ｄ咩令你誤會左？
 
「我有咩唔好？」

「唔係，你樣樣都好，只不過我已經有鐘意既人啦。
 

此時，李右婷剛好擰轉頭，我向李右婷打左個眼色，聰明既李右婷立即知道現狀，李右婷行到過黎時，我捉住李右婷隻手，望到呢幕情景既林舒寶立即轉身跑走，

林舒寶一路跑既時候，一點點白光從佢眼中一直掉落，佢經過既街道都微微滴濕左幾點，我並無追上去。



「唔該晒你。」我鬆開雙手，插返落自己褲袋。

「唔洗客氣，話晒你都幫過我咁多次。」李右婷溫柔地回應。


呢個時候我從褲袋拎出手機並打俾阿牛，點知幾秒後電話傳出一句「你所打既電話暫時未能接通，請你遲Ｄ再打黎吖。

我收左線，諗返擺返部手機落褲袋。

就係我擺返部電話落褲袋既時候，阿牛從遠處慢慢咁過黎，佢無出聲遞左個便利店膠袋俾我。