精子is money: 第一百十一章 莫名痛楚

「呢，你咪話你係返黎報……既，喂！做咩整我姐。」我望到唐梓晴即刻掩住吳亦菲個嘴，之後佢地兩個又互相整黎整去，望住呢一切情景既我真係大飽眼福。

「阿！唔好意思。」佢地兩個玩到太癲，吳亦菲唔小心撞埋黎我張檯。

「唔緊要……」我臉帶微笑係女神面前保持紳士風度。

「係你？」

「做咩？」



「無野……你好似一個我識既人。」

「哦，我諗你認錯啦，我都唔識你既。」我心諗唔通吳亦菲認得出我就係情聊果個人？

「哦，唔好意思。」
 
「咁一陣圖書館見啦啵。」唐梓晴帶住微笑對住我講，聽到呢句既我個心唔知點解有種窩心既感覺。

「好呀，咁我去洗野先。」我帶住興奮既心情拎住個飯盒去洗手間。




洗完飯盒後，我匆匆忙忙咁將個飯盒擺返係課室，然後即刻趕去圖書館，似乎好期待今次既溫習。

數分鐘後，我黎到圖書館門前，正諗住推門而入既時候，我從玻璃窗外望到唐梓晴同藍佑龍正坐埋一齊，佢地坐緊既位置正正係我同唐梓晴尋日坐既位，只可惜既係男主角個位並唔係我。

只見唐梓晴眼笑眉飛，貌似傾到興高采烈，樂極忘形，完全無人留意過窗外既我。此時，唔知唐梓晴發生咩事，突然間，捉實藍佑龍粗壯既手臂，表現得非常親暱，就如一對熱戀中既情侶般。

望住呢對郎才女貌既男女，唔知點解我心入面有種莫名既痛楚，絲絲既失落感。唉！望到呢幕情景，我只好忍痛咁調頭行返班房。

或者，唐梓晴本來就係對每一個同學都非常熱情，而我只係一個茫茫人海中非常常見既過路人，相反地唐梓晴就係鳳毛麟角，非常耀目既女神。或者我對唐梓晴來說，只係一個偶然坐係佢後座既男同學……


 
 
「師父你唔係話去溫書咩？」我一返到班室金天羽就行黎我個位同我講。

「都話左咪叫我師父呀！」都唔知呢條友仔係咪Gay既，成日係咁痴埋黎我到，不過呢句野我當然無講出口。

「好既，阿積……師父。」金天羽仍然繼續講。

「……！」我已經無心情應佢了。

「哈哈，溫書？講笑咩四眼積，唔似你啵。」阿花已經食完飯返到班房，或者阿花講得好岩，我決定做返自己！

鐘聲響起了，又到上堂時間，可是仍然未見唐梓晴既身影，明明已經狠心地放下她，卻再次無意地想起她，或者我早已經被她深深地吸引住……

數分鐘後，唐梓晴終於返黎，佢臉色帶住笑意，好開心咁走進班房，望到佢既真摰既笑容令我心底裹更加悲傷。