精子is money: 第三十章 心事

我地搵左個比較少人既地方，果到岩岩好有張長椅，張椅岩岩好可以坐落三個人，我坐最右，林舒寶坐中間，阿牛坐最左邊，Ｄ啤酒擺落地下。我見林舒寶開左罐啤酒，

身為男仔既我緊係拎返罐飲啦，順手俾左罐阿牛。我拎住罐冰凍既啤酒，我好享受呢種冰涼既感覺，寒冷可以令人頭腦清醒。啪一聲我打開左罐啤酒，

飲下我人生中第一啖啤酒，入口既時候牙齒有種好冰凍既感覺，凍到我打冷震，渾身唔舒服咁，隨後舌頭帶俾我苦澀既味道，我吞左一啖，
 
眉頭一皺覺得好難飲，呢個就係我第一次飲酒既感覺。林舒寶見狀即以嬌聲嘻笑，而阿牛為左佢心愛既女仔都拎左罐啤酒飲，我諗佢都係第一次飲酒，

我望住阿牛飲第一啖，第二啖，第三啖如是者，佢好快咁就飲曬一罐，又開左一罐新既啤酒，唔通阿牛飲啤酒無感覺定係佢好口渴？我心諗。
 



 
林舒寶一路飲一路講出黎，佢話：「其實係我中一既時候阿爸阿媽離左婚，我跟阿媽姓，但係跟阿爸住，阿爸沉迷賭博，將自己大部份精子賭左，

一Ｄ都唔俾阿媽，所以阿媽離婚，後來仲鐘意左其他男人。我無一個完整既家庭，同我同班既同學都笑鳩我，我真係好唔開心呀。」講到呢到，佢眼睛悄悄落淚。
 
我做左口型叫阿牛掃佢背脊，俾紙巾佢，安慰佢。「唉，我明既，我地又何嘗唔係單親家庭，至少你中一之前都有一個完整家庭，而我同阿積由好細個既時候就無阿爸。」阿牛好大膽咁講出，


佢講到好灰，同時一路講一路照做我教既野。林舒寶慢慢咁挨落我個身到，我緊係無俾佢挨，我即刻閃開，然後企起身。


 
「係啵，時候唔早啦，我返屋企先，阿牛你地就繼續傾啦，記得送埋人返屋企阿！」
 
我望一望手機既時間顯示九點鐘咁講，有一半係想幫阿牛同林舒寶制造單獨機會，等佢地可以傾多Ｄ心事，而另一半係我真係想早Ｄ返屋企，廢事阿媽擔心。
 

「掰掰。」我望住臉色微紅既林舒寶同埋面不改容既阿牛講，講完之後無等佢地回應就急急腳咁行走。回家既路上，我抬頭望住黑夜，

此時此刻既我心入面好空虛好孤單，縱使我今日破左處都好，自己亦明白果種並唔係真愛，睇黎我都要溝返條女先得。