真人真事改篇﹕師生戀﹕《最接近的陌生距離》: 第六十六章之一
好幸福呀⋯⋯
短短幾日，我就經歷咗充滿溫馨、甜蜜、性福嘅聖誕假期。仲有成個星期慢慢玩，真係想像唔到餘下嘅假期可以有幾好玩！
食完Miss嘅「聖誕大餐」後，我地先正經食返餐正常嘢。食完飯一齊洗白白，互相抽下水，上床攬多陣錫多一陣就瞓覺。
「老婆早抖。」我親吻Miss額頭。
Miss點一點頭，就攬住佢最鍾意嘅史迪仔瞓。
呼——！呢幾日都冇出街，但過得特別開心。今晚真係太興奮，而家都仲係好想扑野呀！於是我偷偷地用手機上網，搵下「女教師系列」嚟J下。
不過正當我懷滿興奮時，facebook 有一個訊息卻令我嘅興奮漸漸冷卻起嚟——Apple 出咗個post 講佢地去玩。
點解係Apple? 件人形豬會影響我嘅心情？當然唔係Apple啦，係佢身邊嘅姊妹——蟲蟲。
自從上次狠狠傷咗蟲蟲嘅心後，蟲蟲喺我生命中完全絕跡。facebook都block埋我。我真係好想知蟲蟲過得好唔好，但係我又怕⋯⋯去發掘⋯⋯怕？我⋯⋯我怕啲咩呀？
好奇心驅使下，我撳入去Apple嘅Facebook，揀咗最新嘅post嚟睇。
「我真係愛死呢隻肥豬仔呀！」第一張相就放閃，Apple同阿波面貼面自拍相⋯⋯呃⋯⋯佢兩個塊面真係好肥，肥到幾乎填滿晒成張相呀。
「又冇脾氣，對我又好，又聽晒我話。呢啲男朋友邊度搵呀？」第二張相係影住兩隻拖埋一齊嘅手⋯⋯呃⋯⋯點解我有種佢地一都齊去屠場赴死嘅感覺嘅。
「有人遲到囉！不過唔緊要啦，因為冬冬要等男朋友收工。人地男朋友真係好上進呀！肥豬仔要學下啦！」第三張係佢同孖辮妹冬冬嘅相，染晒金毛嘅杰少都入咗鏡。
佢地兩per人一齊拍拖去咗唱K。睇咗幾張相都冇蟲蟲時，我唔知點解個心好矛盾，好想見到佢，但又好唔想見到。啲相愈嚟愈難碌，我內心正在阻止自己繼續睇落去。
終於，我見到一張相係佢地好開心咁食糖水，但啲字卻唔係形容碗糖水，而係⋯⋯
「咁到撞到嘅？哈哈⋯⋯傻妹有異性冇人性啦！」
張相只係影住碗糖水，背景模糊，只係見到另一張枱有一個女仔背住鏡頭⋯⋯隱約個女仔好似⋯⋯扎住個馬尾嘅？
當我睇埋段文字時，就知道背景嘅女仔係邊個。
「衰妹一早話唔同我地玩，原來約咗⋯⋯哈哈！點都好啦！見你振作返我就放心晒啦！忘記嗰個玩你感情嘅人渣匡啦！」
「人渣匡」⋯⋯都好明顯啦，嗰個女仔就係蟲蟲。此時我放低手機，望住天花板，思維好亂，心情都好複雜。睇Apple寫嗰段嘢，蟲蟲似乎有咗男朋友？
我應該開心架嘛？始終佢都叫振作起嚟，我對佢嘅傷都過咗去。
但點解⋯⋯我會有啲失落嘅？
有啲⋯⋯不忿？
唔捨得？
我兩手作枕，思緒愈嚟愈亂，直至——
「嗯⋯⋯噫⋯⋯⋯！」Miss瞓瞓下忽然叫咗出聲，我望過去見佢眉頭深鎖咁，瞓得好唔舒服，之後仲發埋開口夢添：「⋯⋯走呀⋯⋯走啊！⋯⋯走開啊———！！」
Miss大嘅叫一聲就成個人彈起身，標晒冷汗！兩眼驚惶咁四處張望！
「盈盈？」我柔聲叫佢，但Miss啲神經好敏感，一聽到我叫佢就好驚咁望咗過嚟。
Miss望住我一兩秒先認到我，猶有餘悸地叫我：「低⋯⋯低B仔⋯⋯」
「發惡夢呀？」我起人抱一抱佢，再抹一下佢額頭上嘅冷汗。
「嗯。」Miss點頭：「冇事啦，瞓啦。」我同Miss一齊瞓返落床。佢背住我側身瞓，但即使佢閉起雙眼想瞓返，聽佢急促嘅呼吸，佢應該仲未定驚。
我伸手去抱佢腰時，Miss捉實我，想我抱緊啲。其實，Miss都唔係第一次發惡夢。之前喺我屋企過夜時，佢兩三晚就會發一次惡夢。嗰我見到佢好辛苦，好似有人捏住佢頸，想捏死佢咁。又有時見到佢想叫，但全身僵硬，就好似被鬼壓咁。聖誕假呢幾日，佢其實係每晚都見佢瞓得唔好。
到底Miss咩事？初初我以為因為工作壓力搞到佢發惡夢。但呢幾日我地咁開心，應該唔會有壓力啦？
咁即係話⋯⋯令Miss發惡夢嘅係因為一啲纏繞住佢好耐好耐嘅事？
= = = =
「啊～～～～！我屌你咩！謝子榆！」我對住電話大叫。
「喂！」Miss又大力掹我耳仔鬧：「對住家姐講粗口！作死你呀！」
「哎哎⋯⋯甩啦甩啦！Miss Wong對唔住！」
「同子榆講。」
「得得⋯⋯家姐對唔住！」
「哈哈⋯⋯唔該晒你呀盈盈！係呀！我今晚就返屋企陪阿爸阿媽過聖誕啦！」佢返屋企的話，意味住我唔可以同Miss住呀！家姐而家笑得咁得戚，激到我想打柒佢！
「喂！你特登架？想報仇呀？！我——」我想講個屌字前，本能反應地望去Miss度，佢冷冷一笑就等緊我爆粗。我即時改口話：「我被你玩死啦！今晚我同盈盈本來去食聖誕大餐架！」
嗱，今次聖誕大餐真係食得落肚嗰啲嘅。
「之前做冬阿爸阿媽返咗大陸呀。今晚佢哋想補返做節呀。」
「我⋯⋯」我爆粗前又望Miss一眼，頂佢一面期待我爆粗咁。我即刻改口話：「我⋯⋯被你地玩死呀！唔返嚟呀！我今晚要陪盈盈呀！盈盈book咗餐廳食飯啦！」
「拎嚟。」Miss伸手問我拎電話。我交部電話畀佢後，佢就話：「子榆，同你爸爸媽媽講，今晚阿匡會返嚟食飯。」
我瞪大對眼講：「喂！盈盈！」
「喂咩喂！叫Miss Wong！」
「哈哈哈⋯⋯」電話一邊嘅家姐用勝利者嘅姿態笑我：「盈盈唔該晒呀！真係得你治到我個衰細佬咋！」
「Welcome!」
「唉！反正都係⋯⋯家姐，同老豆阿媽講，我帶埋盈盈嚟啦！」
「吓？！」家姐應該O晒住。
「又亂講嘢！」Miss一掌巴落我天靈蓋！佢話：「帶我去你屋企？你點介紹我呀？女朋友呀？你想穿煲呀？」
「嘩⋯⋯！好痛呀！⋯⋯咁⋯⋯咁未話班主任家訪囉！」
「痴線。」Miss輕輕鬧完我一句，就同家姐講：「放心啦，阿匡今晚會準時返到屋企。」
「嗯！唔該晒盈盈。⋯⋯喂！死人頭謝子匡！阿爸今日氣喘呀，我唔想佢咁操勞呀。一陣你幫阿爸買餸！」
聽到老豆氣喘，我即刻好緊張，笑都笑唔出，問：「老豆冇事呀嘛？」由細到大，我最驚老豆食煙食出事。所以一聽佢突然氣喘，我就好擔心。
「唉⋯⋯天氣凍搞到佢氣管唔好。仲成日食煙，畀佢激死！放心啦，佢冇事。你幫到阿爸手就得啦！」家姐。
「咁得啦⋯⋯要買啲咩你再Whatapps我啦。係咁先，bye。」
卡嚓——！收咗線後，我望返Miss，見到佢對住我笑，我就話：「你笑咩呀？」
「笑你⋯⋯乖仔囉！本來扭晒計，成個小朋友咁。一聽爸爸唔舒服就認真晒，唔托手踭！」Miss埋嚟抱住我面，佢嘅笑有一種欣慰：「我最鍾意就係你好錫屋企人。你好Man呀。」
「我乜心情都冇晒啦，你仲喺度笑⋯⋯哎吔！」
Miss捏我塊面再左右拉長，好似當我塊面係橡膠做咁！佢邊笑邊講：「冬大過年呀！我同你嗰餐聽晚食都得啦！」
Miss放開手，我面塊赤赤痛，摸住兩邊面頰講：「⋯⋯我今晚唔想返去屋企瞓呀⋯⋯」
「都係返去一晚啫！唉⋯⋯你真係⋯⋯哎吔！成日都咁痴身！被你激死呀！」Miss鬧我，但佢好冧。
「得啦得啦。老婆話咩就話咩啦！」我無奈咁擰頭。Miss錫咗我額頭一啖，氹我幾句後，我就離開Miss屋企。