真人真事改篇﹕師生戀﹕《最接近的陌生距離》: 第六十四章之四

「Miss Wong 呀！」
 
我每嗌一聲，我個心就崩裂出裂紋⋯⋯
 
「嗄⋯⋯嗄⋯⋯Miss Wong⋯⋯呀⋯⋯」我攰啦，我冇力啦，冇氣啦，佢⋯⋯冇再出現。
 
握緊拳頭，狠狠打落地面：「啊——！」激動咁大叫，酒吧嘅人都望咗過嚟。
 
「次次都係咁！」我不忿。
 




「成日將啲說話收收埋埋，咩都唔同我講！」我吶喊。
 
「我被周Sir逼害嗰次話分手就分手！唔理我感受！」我控訴。
 
「屋企有事又唔畀我關心你！」我對住空氣講。
 
「又話驚影響我成長！怕影響我讀書！」
 
「但而家我咁樣就好好啦咩？！你粒聲唔出走咗，就唔影響我啦咩？！」
 




「你而家掉低咗我，就可以幫到我成長咩！」
 
「每一次都要我估估下！我好驚架！」
 
我狠狠咬住嘴唇，咬到流晒血，激動到想將自己撕開兩邊。我望住眼前嘅街景，影象再一次模糊起嚟。
 
我冇晒力啦⋯⋯呢座山我爬得好辛苦。任我想努力爬到同Miss同一個位置，但到頭來都只係徒勞無功？
 
最後竟然落得被遺棄喺街頭嘅下場？
 




我盈住悲痛嘅淚水，睇到嘅一切都化開⋯⋯
 
 
.
 
「低B仔⋯⋯」
 
.
 
 
熟悉嘅聲音喺我身後傳嚟，蹣跚嘅步伐從後經過我身邊再到我面前。
 
著住長裙嘅女人痞咗喺我面前，佢溫柔嘅雙手撫摸我面龐⋯⋯
 
.




 
「對唔住⋯⋯」
 
.
 
佢輕輕抬起我個面，我眼內化開嘅影像慢慢重疊，哽咽對面前嘅人講：「⋯⋯我好痛呀⋯⋯」
 
「Sorry呀⋯⋯」
 
「Miss Wong， 我個心⋯⋯好痛呀⋯⋯唔好掉低我呀⋯⋯」
 
「噫——！對唔住呀！」
 
Miss緊緊地，緊緊地抱我入懷。我感受到由佢靈魂深處而嚟嘅內疚與矛盾。佢想走，佢推開我，但最終Miss都係冇走到。
 




我地攬住喊，唔理旁人睇，只想好好捉緊對方。
 
= = = =
 
結果，我同Miss喊完一輪，就當冇事發生咁。但係即使我地拖住手行，我覺得我地之間充滿住隔膜，大家都好似靈魂出竅咗咁，肉身好似死咗一樣。
 
呢個隔膜唔係因為我地唔再愛大家，如果唔係頭先Miss都唔會再搵返我。呢個隔膜，係源於Miss心中唔願意講比我聽嘅「秘密」，一個令佢內疚嘅「秘密」。
 
「好啦⋯⋯」我送Miss到佢家門前，佢放開我隻手，柔聲咁講：「你返屋企啦。你爸爸媽媽應該好擔心你。」
 
「嗯。」
 
「唔洗擔心我。我冇事架啦。bye。」Miss講完之後就拉開鐵閘，打開度門。佢見我冇講再見，就回頭同我講：「你走啦低B仔，唔好要爸爸媽媽擔心。」
 
我心下有一股衝動驅使我上前，兩手抱住Miss面龐，再深深地、深深地親吻佢！




 
Miss被我突擊後兩眼睜大咗。我嘅情緒再一次激動起嚟，講咗句：「我唔走！」再錫一次，即使我有少少夾硬嚟，Miss都冇抗拒。
 
「我根本唔需要走，因為——」
 
.
 
「你就係嗰一個啱嘅人！」
 
.
 
Miss嘅情緒被我嘅舉動作影響，開始熱淚盈眶，哽咽話：「⋯⋯但係⋯⋯我⋯⋯我⋯⋯嗚⋯⋯」
 
我知佢又想講「佢有錯」嚟推走我。於是我——「——唔重要呀！」
 




「你以前係點，係以前嘅事。我同你係『而家』同『將來』嘅事呀！」我抱住佢，喺佢耳邊講：「盈盈呀⋯⋯你講過兩人係講個『信』字。你信唔信我？」
 
「⋯⋯」
 
「即使我知道咗你之前發生咩事都好，你嘅錯事錯得幾離譜都好⋯⋯我唔會走！我點都唔會走！你信唔信呀？」
 
「⋯⋯嗯⋯⋯」
 
「你過去係點，做錯咩事，算啦！你唔需要同我講你做錯咗啲咩事！我唔介意呀！我唔理呀！最緊要呢一刻、呢一秒、下一秒——我愛你呀！」
 
「⋯⋯低B仔⋯⋯我⋯⋯」
 
.
 
「我信你。」
 
.
 
 
我一怔，深深咁望住正在出內疚眼淚嘅Miss。
 
「對唔住⋯⋯我今晚⋯⋯又傷害咗你⋯⋯其實我⋯⋯我——」
 
.
 
「我唔想你走架！」
 
.
 
Miss好似被我解開咗心結，死寂嘅眼神有返光彩。佢抱住我塊面，深深咁Kiss咗我一啖：「低B仔，我真係好愛你架！」
 
「嗯！我知呀！我都係呀！」
 
此時，我將Miss抱到床上面，彼此四目交投。Miss兩眼流出幸福嘅淚水，充滿愧意講：「今晚⋯⋯嚇親你，對唔住。」
 
我微笑搖頭，輕輕撫佢髮際，再順勢擦乾佢淚水。Miss被感動，拋開年齡嘅差距，佢嘅成熟氣質慢慢轉化成為纖弱嘅少女。佢需要被人愛護、被人擁抱。
 
「阿匡，唔好走呀。」
 
我抱住佢，柔聲地講：「唔會。」低頭，深深親吻佢嘴唇。
 
.
 
.
 
「我唔會走。」
 
我好溫柔咁錫Miss，心怕連親吻都會令佢受傷。
 
畢竟佢嘅過去充滿傷痕，有啲傷口仲未埋口，我嘅愛一倒落去就好似火酒咁令佢灼痛。
 
我明啦⋯⋯我明白點解Miss會話唔值得我愛佢。
 
Miss Wong有一個傷口，一個永遠都唔會好返嘅傷口。