真人真事改篇﹕師生戀﹕《最接近的陌生距離》: 第六十四章之三
「做咩事呀？盈盈！」我招架不住突如其來嘅改變，連忙咁講：「我⋯⋯係咪我⋯⋯係咪我做錯咗嘢呀？」
「噫——！」Miss終於忍唔住，放聲痛哭，卻連忙搖頭想講:「唔⋯⋯唔係⋯⋯唔關你事。」
「咁係咩事？你做咩要同我講呢啲嘢？乜嘢搵到啱嘅人呀？！」我緊張咁問
只見Miss忽然間鬆開我攬緊佢嘅手，喊住講：「唔係⋯⋯你冇做錯⋯⋯做錯事嗰個⋯⋯係我⋯⋯」
「吓？盈盈！我唔明呀！我地頭先仲好地地⋯⋯」
Miss 推開我拋低一句：「夜啦，你返屋企啦。我自己返去就得！」好冷淡咁轉身走開！
天啊！咩事呢？個氣氛，我同Miss嘅關係，做咩一下子變成咁架？忽然間，我靈光一閃，難道——關蟲蟲事？
咩啱遇到嘅人呀？
佢講緊蟲蟲？
難道Miss一早知我同蟲蟲⋯⋯？！
唔會！佢頭先話唔係我錯，係佢嘅錯！即係唔關蟲蟲事啦！咁⋯⋯咁即係咩事呢？
佢話自己有錯⋯⋯佢錯⋯⋯難道佢同Vick⋯⋯？！
我懷住滿肚子嘅疑問追上前，截喺Miss面前，話：「盈盈⋯⋯到底咩事？乜嘢你有錯呀？」
Miss傷心咁望咗我一眼，就側身避我，繼續向前走！
呢一刻個感覺就好似上次周Sir件事咁，佢瞞住一大堆理由，只係拋低一句「分手」！
我好驚好似之前咁呀！⋯⋯好驚呀⋯⋯開始慌緊，標緊冷汗，好暈⋯⋯成個世界開始同我割離咁⋯⋯
唔得！件事未搞清楚我唔⋯⋯唔可以崩潰架！
「盈盈！」我追返上去拉住Miss。
「放⋯⋯手⋯⋯」
Miss加快步伐，我同佢並肩行，我緊張地問：「因為你覺得你影響緊我成長？」
「⋯⋯」
「因為你覺得你害到我冇晒朋友？」
「⋯⋯」
「害到我被周Sir逼害？」
「⋯⋯」
「定係關琴晚嘅事呀？」
「！」
Miss好似觸電咁，成個人停咗落嚟，兩手抱胸，一雙悲痛嘅淚眼望去另一邊。
此時我走喺佢面前，忍住熱淚，問：「琴晚你為咗氹我，用咗以前氹阿Vick嘅方法⋯⋯噫⋯⋯嗯⋯⋯嗄⋯⋯其實係關阿Vick事，係唔係呀？！」
「哇⋯⋯！」Miss抱面大喊，喊聲之大令本來睇緊燈飾嘅人都望咗過嚟！
佢話自己有錯⋯⋯原來因為琴晚件事！
我上前緊抱住佢。緊抱住滿身傷痕嘅佢，喺佢耳邊講：「做咩咁傻要提返琴晚嘅事呀？我都冇怪你。」
「嗚⋯⋯嗚⋯⋯！」
「琴晚嘅事完咗架啦。今日係新開始呀⋯⋯」
Miss邊喊邊擰頭。
「你冇做錯呀。」
「嗚⋯⋯嗚⋯⋯」
「我冇覺得你害咗我。自從有你喺我身邊，我就好幸福啦！我幾跩、幾唔鍾意返學、幾吊兒郎當都好⋯⋯盈盈！係你呀！係你教好我架！」
Miss好激動咁喊，佢抱住我嘅手好用力咁抓住我背脊，即使隔住好厚啲衫，我都感受到Miss從指尖而嚟嘅力量——佢好愛我。
「係你畀咗奮鬥嘅目標我！我地係有差距！我好似爬緊一座隨時都會跌死嘅山咁！因為係你呀，我決定要好好成長！迫自己快啲大個仔！爬到同你一樣嘅位置！我今生今世要同你喺埋一齊！你係我嘅奮鬥目標呀！」
「低⋯⋯低B仔⋯⋯唔係咁簡單架⋯⋯」
「盈盈，遇到你係我嘅福氣。我愛⋯⋯」
點知我個「愛」字一出口，Miss被刺激到，連忙將我推開。
「我⋯⋯我唔值得⋯⋯架！」Miss邊喊邊退後，慚慚同我保持距離。但佢喊聲、佢嘅表情卻話畀我知佢好唔捨得。
「⋯⋯你⋯⋯你唔使咁愛我架！唔好咁愛我呀！我⋯⋯我⋯⋯」Miss欲言又止，呢份矛盾令佢痛苦咁喊，斷斷續續咁講：「⋯⋯我⋯⋯我唔值架⋯⋯」
「乜嘢唔值呀？」
「我⋯⋯我唔值得你咁真心去愛架！我⋯⋯我⋯⋯噫！！⋯⋯」
Miss轉身奔走，淚水飄盪喺空中。
「我唔介意呀！」
我立即追上去！但我愈叫，Miss走得更快！
「你同Vick以前係點！即使你而家仲鍾意阿Vick!我一啲都唔——」
我句「介意」未出口時——
「——你會呀！」Miss就回頭向我大聲反駁：「我⋯⋯我唔係好人嚟架！我嘅過去好亂七八糟！我唔乾淨呀！我⋯⋯我⋯⋯我——」
.
「我做咗一件原諒唔到自己嘅錯事呀！」
.
Miss向我大聲吶喊！成個世界好似被佢嗌停咗咁，我成個人都僵硬咗，只識得一面茫然咁望住佢。
望住喊緊嘅Miss，佢好唔捨得講咗聲：「我⋯⋯我唔值得——」
.
「我唔值得你咁真心真意去愛呀！」
.
Miss冷漠地轉身離開！呢次佢走得好快，好決絕！我好唔甘心，明明今日我地仲好幸福！窮窮地食個七仔快餐都好sweet！好滿足！我做到Miss同細佬嘅溝通橋梁！但係到底咩原因令情況急轉直下呢？！
我要知點解？！
點解Miss會話自己做咗一件無法原諒自己嘅錯事呀！
點解呢個錯事⋯⋯呢個錯事會搞到我地而家瀕臨分手呀！
我一邊叫Miss，一邊追佢。但佢完全收埋晒個天線，當我唔存在。視覺、聽覺同觸覺開始迷糊，我捕捉唔到Miss身影，唔知佢去咗邊。我同個世界嘅連繫開始消失，即使我身體好自然咁大叫「盈盈！」，但我覺得好似唔係自己嘅身體咁，直至——
「哇——！」
混身劇痛，令我精神同靈魂返去肉身。我而家先知道我跌咗個五體投地，手掌都擦傷！我四處張望，喺我身後係尖東行人天橋，我應該唔小心碌落樓梯？
唔重要，我傷成點都唔重要。
最緊要係——
「Miss Wong！」
我想搵返佢。
「Miss Wong！」
但佢唔再出現。
由呢一秒鐘起，我個世界開始崩塌…