真人真事改篇﹕師生戀﹕《最接近的陌生距離》: 第六十四章之一
咁樣搞一搞，就冇咗三個幾鐘。而家時間差唔多到六點，天邊留低咗火紅色嘅晚霞，四周吹起涼涼嘅微風。
我企喺學校門口等Miss出嚟。過咗冇幾耐，我見到學校嘅人送Miss到大門前。
「黃小姐，轉監護人嘅手續已經辦理好晒。咁以後關於梓康嘅事會直接聯絡你。」
「嗯！好呀。梓康嘅事辛苦晒各位老師啦，唔該晒。」Miss對學校嘅人鞠咗個躬就轉身向我行過嚟。
我同Miss冇拖住手行，亦都冇講嘢，我地好似唔識咁。我唔知佢而家係咩心情，只知Miss一直唔出聲又冇表情搞到我好擔心。直到行到去巴士站時，Miss先對我微笑，再輕輕搣我塊面，我先放心落嚟。
「你同細佬傾成點呀？」
Miss深吸一口氣後，卻笑住答非所問咁講：「不如今晚我地食好啲囉？」講完之後佢拖住我隻手，小鳥依人咁挨住我。我對佢勉強笑一笑，因為盲嘅都知Miss呢下反應實在太造作。
我地坐車出尖嘴，Miss揀咗間幾貴嘅餐廳食晚飯，搞到我唔係幾好意思。Miss見我望住個餐牌呆晒，皺一皺眉頭問我：「做咩呀，唔啱食呀？」
「呃⋯⋯」我本來好想講太貴，但心嘅另一邊又諗到男朋友對女朋友講呢啲會唔會羞恥咗啲呢？於是改口咁講：「咁多選擇，我⋯⋯唔知食咩好嘛⋯⋯哈哈！」
Miss定一定睛望我，佢已經睇穿咗我心入面點諗，微笑咁講：「唔使同我客氣啦。今日⋯⋯好多謝你！」
「多謝我？我⋯⋯我冇做過啲咩喎。」
Miss笑住搖頭，繼續話：「唔傾住喇，揀嘢食先。啊⋯⋯突然間好想飲香檳啊！」
「我又要！」
Miss輕輕打我手背，就鬧咗句：「等你18歲先飲得呀！」
「唓⋯⋯你喺學生面前飲酒呀，咁又好好咩！」
「咩呀？邊個係我學生呀？你係我男朋友喎！嘻！」Miss兩手托腮，甜笑對我講。
我完全招架唔住Miss呢刻嘅可愛同任性。如是者，我同Miss好開心、好sweet咁食咗餐飯。然而，我卻覺得Miss喺度逃避緊情緒，佢嘅寬容同微笑都做得好造作。
喺食緊甜品時，我終於忍唔住同佢講：「盈盈，其實頭先見細佬係咪唔係幾愉快？」
Miss聽到我問後，本來想放入口嘅雪糕都停咗喺嘴邊。佢神情呆咗一兩秒後努力擠出想令我安心嘅笑容：「不如一陣我地去海傍睇燈飾呀！」
「⋯⋯嗯。好呀。」
佢愈扮冇事，我愈擔心。如果我再追問落去，就會破壞埋呢一刻愉快嘅氣氛。我唔想Miss喊住咁食雪糕，所以都係唔追問佢。
食完飯之後，我同Miss行咗去海傍，由文化中心做起點向住尖東方向行。今晚天氣好涼，Miss怕凍就想我搭住膊頭同佢行。行行下，Miss對我撒起嬌嚟，索性成個人挨住我嚟行。而家呢一刻應該係我地拍咁耐拖以嚟最親密嘅一次，完全唔驚被熟人撞到。
當我地到咗尖東時⋯⋯
「盈盈，你記唔記得嗰張櫈呀？」我指住遠處嘅石櫈講：「嗰晚我搵唔到你，好唔開心。我坐喺張石櫈將所有嘢都話晒畀大海知。」
我提返之前發晒癲衝出去尖沙咀搵Miss嘅事，嗰一晚先係我地愛情嘅起點。所以呢一張石櫈對我地來講有著好深厚嘅意義。
Miss用微笑話我知佢記得嗰晚嘅事。佢再輕聲鬧咗聲：「衝動仔。」我地慢慢行返去同一張石櫈坐低，靜靜望住維港景色。
時間一點一滴咁過，我地彼此冇講嘢。即使身邊有唔少人出嚟睇燈飾，氣氛有少少熱鬧，但我卻感覺到寧靜。Miss好怕凍，成個人好捐晒落我個身度。我同Miss share咗條頸巾嚟戴，佢先冇咁凍。
「鍾唔鍾意呀？」Miss摸住佢織嘅頸巾講。
「唔鍾意都唔會戴啦！」
「嘻⋯⋯」Miss笑一笑之後成個人散發住好sad嘅能量，但佢仲係好強顏歡笑咁講：「低B仔，你真係好好呀。」
「嗯？」
「你冇迫過我做一啲我唔鍾意嘅事。即使知道我唔開心，都唔會迫我講出嚟。」
「以前⋯⋯Vick係咁樣對你架？」
Miss喺我膊頭上搖頭，平淡咁講：「除咗Vick，仲有之前嗰啲。即係⋯⋯」Miss攤出兩隻手數數指，成個動作好似細路女學計數咁，好可愛。佢話：「Vick之前嘅一、二、三⋯⋯定第五個嘅男朋友呢？」
「嘩！咁多男朋友？你都好唔得閒喎！」
「嗯⋯⋯嗰時換畫好快。最快幾日換一個男朋友囉！」講完佢自己都忍唔住笑，然後佢繼續個話題：「每一個男朋友都會迫我做一啲我唔想做嘅嘢。迫我同Alex絕交、唔畀我返part time、唔畀我有朋友、迫我要退學、迫我將所有野都話比佢知，唔畀我做老師。」
「你每一個男朋友都好有控制慾喎。」
「嗯⋯⋯佢地冇安全感嘛。嗱，即係咁，我生得咁靚，佢地實驚我被人搶走啦！」Miss好自豪咁笑，難得喺咁low mood嘅情況下佢都仲識得講笑。
「好靚咩？睇過。」我輕輕托起Miss下巴後就忍唔住同佢Kiss。
熱吻後，Miss挨返落嚟，繼續講：「⋯⋯不知不覺間，當我被人迫時，我就諗起爸爸點迫我、迫媽咪、迫梓康⋯⋯低B仔。」
Miss叫住我，當我回望佢時，Miss已眼泛淚光，佢話：「見完細佬之後我個人好煩、好亂⋯⋯多謝你畀咗空間我抖下。」
「我呀⋯⋯其實冇做過啲咩。」我傻笑，我真係咩都唔知。
Miss見我一面傻氣，笑住搣我鼻頭一下。然後佢起身行咗去海傍嘅欄杆上。清涼嘅海風令佢要抱住自己嚟取暖。我即刻上前，除咗件外套畀佢披住，就話：「其實我都冇做啲咩⋯⋯咦，盈盈？」呢個時候原來Miss已經開始喊緊。