真人真事改篇﹕師生戀﹕《最接近的陌生距離》: 第五十二章之三

李Sir車我到盈盈屋企前嘅馬路，催促我快啲落車，佢話：「你應該有佢屋企鎖匙架啦？」即使李Sir隔住個頭盔，但我感覺到佢表情好寬容，對住我微笑。
 
而我卻吃驚佢知道我有Miss屋企鎖匙呢啲咁秘密嘅事！
 
我一面不解咁望住李Sir，一時間我理解唔到呢刻嘅狀況。佢唔係Miss男朋友咩？點解呢一刻就好似⋯⋯將自己女朋友交比另一個男仔咁嘅？
 
當我想追問李Sir到底係咩一回事時，李Sir卻搶先講：「一陣Miss Wong問你點解會嚟，千祈咪答我送你嚟呀！佢殺咗我架！嗱，學校做仲有嘢做，我返去先啦！你醒目啲呀，唔好再衰衝動啦！知唔知？」
 
李Sir拍一拍我肩，就放返頭盔嘅眼罩落嚟，然後又劈返去學校。
 




「搞⋯⋯搞咩呀？」留喺原地嘅我依然諗唔明。言下之意李Sir想我去探Miss，但點解要係我呢？我係咩身份呀？
 
我帶住呢份不解，同呢半個月嚟種種同Miss發生嘅事上緊去Miss屋企度。唔知點解，我內心有一種忐忑係同蟲蟲有關。就好似因為原本件事真係唔複雜，但因為我嘅情緒、我做錯咗某個決定，令到而家件事複雜晒。
 
我就係有呢份不安嘅直覺！我好似⋯⋯我好似傷害咗人咁！
 
叮——𨋢門開啟，我飛快地行去Miss屋企門前，馬上解開鐵閘同大門嘅鎖。喺開門一刻，熟悉嘅氣味撲鼻而嚟，係Miss屋企嘅氣味。眼前環境依舊都係咁整齊，只係食飯桌比較亂，堆咗一埋學校嘅工作同埋——
 
 
.




 
「醫療報告？保險單？⋯⋯咦？財務公司借據？」
 
 
.
 
我大惑不解，Miss有病？要claim保險？最後唔夠錢睇要問財仔借？條數仲要唔細喎⋯⋯嘩！借咗一百萬？！
 
我內心嘅不安擴張緊，好擔心過去半個月⋯⋯唔係！甚至更耐，Miss要面對好多佢應付唔到嘅問題。我心急咁環視全屋，間屋好靜，難道Miss唔喺度？過咗幾秒後，我聽到啲呼吸聲喺佢睡房內傳出。
 




於是我行去佢睡房，動作好輕咁慢慢拉開房門，然後我見到令我心酸嘅畫面——Miss病到落晒形，好安靜瞓緊覺。
 
由佢呼吸聲我感覺到Miss唔只病得唔輕，仲好攰。呢種攰唔只來自身體，仲係來自精神。我好自然諗起之前發生嘅事，我對佢講過嘅說話、發過嘅髀氣⋯⋯仲有佢工作上嘅唔如意、杰少、考試卷⋯⋯天啊！我心痛到碎開！我不知不覺只憑自己感覺、情緒，一味迫Miss！一味對佢爆情緒！
 
佢同我分手⋯⋯我⋯⋯⋯我⋯⋯真係抵死架！
 
不過自責都冇用。我睇Miss應該都唔係好照顧到自己，不如留低睇住佢先。我埋去佢床邊，見到佢臉龐發熱，額頭貼咗個退熱貼，明顯發緊燒。
 
Miss應該瞓咗好耐，因為佢頭頂嘅退熱貼已經冇晒藥力，乾到好似塊膠咁。於是我靜雞雞咁幫佢換咗。我手腳向來都粗魯，好怕會整醒佢，所以我動作都變得小心翼翼。
 
「唔⋯⋯？」當我貼咗塊新嘅退熱貼時，Miss微微地叫咗聲，然後轉身背住我側睡。我見佢踢開晒啲被，於是馬上幫佢冚返好。
 
「Al⋯⋯ex？」
 
Miss叫緊李Sir個名，我個心開始痛。




 
「⋯⋯多謝你⋯⋯你真係對我好好⋯⋯」
 
Miss含糊咁講，似係發緊夢話。佢連發夢記住另一個男人⋯⋯
 
「⋯⋯對唔住呀⋯⋯我屋企啲事要麻煩到你⋯⋯搵日請你食飯啦⋯⋯」
 
原來係咁。Miss搵李Sir去處理佢家事。可見李Sir嘅地位真係非比尋常。
 
「⋯學校啲嘢幫我放喺枱度⋯⋯幫我買啲嘢食上嚟⋯⋯唔要呀⋯⋯唔要呀⋯⋯我唔要食粥呀⋯⋯」
 
即使講夢話，Miss不忘咁撒嬌。
 
「⋯⋯我知呀⋯⋯唔好咁對佢呀嘛⋯⋯我知呀⋯⋯」
 




咦？佢講緊咩呢？
 
「⋯⋯我唔想影響到佢嘛⋯⋯我唔想佢留班呀⋯⋯」
 
咦？Miss講緊我？
 
「⋯⋯我想佢快啲大個仔⋯⋯唔好咁衝動⋯⋯」
 
我個心⋯⋯我個心⋯⋯眼腺被刺激，我兩眼已盈著熱淚。
 
「⋯⋯佢咁樣做人真係會出事架⋯⋯我唔想佢受傷呀⋯⋯」
 
原來⋯⋯佢仲好關心我。
 
「⋯⋯我好心痛⋯⋯佢每次唔開心、唔知自己受緊傷害嘅時候⋯⋯我就好心痛⋯⋯」




 
盈盈，佢眼角流淚⋯⋯
 
「⋯⋯唔識就慢慢學啦⋯⋯唔緊要架⋯⋯有我陪你嘛⋯⋯」
 
佢哽咽咁講。
 
「⋯⋯低B仔要讀好啲書呀，知唔知？⋯⋯低B仔⋯⋯我⋯⋯」
 
盈盈仲係好關心我！
 
唔⋯⋯唔只係關心——
 
原來⋯⋯
 




.
 
 
「我愛你呀，低B仔。」