真人真事改篇﹕師生戀﹕《最接近的陌生距離》: 第四十四章之三

放學鐘聲響起。

Miss好似識隱身咁喺學校入面消失，想搵佢都搵唔到。Lunch帶嚟嘅痛苦同失落再次盤踞喺我心間。

「我地不如冷靜下。」佢講得出，真係做得到。我同Miss嘅距離同關係一下子變得非常之陌生。

我失落行出校門，唔經唔覺行到去分叉路上嘅電燈柱下。我好忘記咗自己點解要行去呢條燈柱下面，直至我聽到一聲——

「阿匡！」





蟲蟲喺女校方向邊叫邊跑緊過嚟，我先記起放學係約咗佢。

「嗨！蟲蟲！」我揮手叫道。蟲蟲步伐好快，每一步都好似帶住期待同愉快。

「你好準時喎！」蟲蟲對住我微笑，然後又攤大手板話：「手鏈呢？」

今次我一早收喺褲袋入面，所以好快送到比佢。蟲蟲見到我用木盒仔裝住，就話：「洗唔洗呀！」但聽得出語氣係開心嘅。

「搵個盒裝住佢穩陣啲嘛！」





蟲蟲對住我哼一聲，然後當佢打開個木盒見到條手鏈時，就忍唔住驚嘆咗一聲。

「新嘅一樣呢？」我笑說。

「係啊！你點做到架？」

「有幾難呀？整完個扣，再擦返靚啲玻璃珠就得啦！」

蟲蟲拎起條手鏈望住我，感激到一時講唔到嘢。同樣地，我望住佢一雙精靈嘅大眼時，內心有一種奇怪嘅感覺。





「戴返條鏈先啦！仲望！」

「哈哈⋯⋯係喎。」

蟲蟲手拎住個手提包，搞到動作好遴迍。

「得唔得呀？」

「換咗新扣，唔係好慣呀。」

「我幫你啦。一陣跌咗爛就斃啦。」

我接過手鏈之後，將手鏈圈喺蟲蟲手腕上。啪——！一聲，就扣實左。蟲蟲抬頭望住我，露出開心嘅笑容。

又係呢個可愛嘅笑容。剎那間，我心裡嘅鬱悶好似冇咁勁。





「多謝你。」蟲蟲搖一搖手腕，check下穩唔穩陣。

「客咩氣，brother嘛！」我擺個拳頭出嚟。

「嗯！brother ！」蟲蟲同我做咗個指定動作後，佢繼續話：「係呢！你而家有冇嘢做？」

佢問到呢問題，我心情不禁一沉，因為我同Miss冇嗌交的話，呢一刻喺學校等佢收工再偷時間拍拖。

蟲蟲見到我面色一沉又唔出聲，於是佢就問：「你冇事呀嘛。」

「啊⋯⋯冇⋯⋯冇事！你問我而家有冇嘢做？」

「嗯！如果你冇嘢做，我想報答你幫我整返條手鏈。」





「哈⋯⋯我而家得閒呀！你會點報答我呀？」

「嘻——！請你食好嘢！」蟲蟲對我單眨一下眼。

= = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師