真人真事改篇﹕師生戀﹕《最接近的陌生距離》: 第四十四章之一

「我地不如冷靜一下先。」

Miss邊喊，邊重複呢句說話。呢句說話好似寺廟啲鐘咁，敲起嘅鐘聲喺我腦中徘徊不散。

冷⋯⋯冷靜一下？即係咩意思？

「你⋯⋯你想分手？」我忍唔住咁樣問Miss：「你真係想同我分手呀？」

我以為個心嘅痛已經係最痛，但原來仲有更痛！





呢次嘅風波對比之前嘅「周Sir危機」確係微不足道，但點估到會發展到分手呢？

我一時想唔通，我感覺到靈魂同我身體又開始剝離緊。時間同官感彷似出現咗奇怪嘅唔同步。

直至Miss講咗聲：「唔係。」我先稍為醒一醒。

「⋯⋯我仲係愛你⋯⋯所以，我唔想分手⋯⋯」Miss抹一抹眼淚。

「咁咩叫冷靜一下？我地唔好見大家？唔搵大家？」





「就係因為我好愛你，我仲想挽救呢段關係。但我地真係好需要冷靜一下！」

「唔搵大家就可以救得到啦咩？」我依然唔明白Miss講緊咩。

「我同你⋯⋯需要啲時間冷靜⋯⋯嗚⋯⋯或者冷靜之後⋯⋯我地就可以溝通返⋯⋯」

「冷靜？咁冷靜幾耐？幾日？幾個月？幾年？定一世呀？」

「⋯⋯唔係呀！到呢一刻你仲係唔明？」





我想追問之時，可惡嘅鐘聲又響起。

「⋯⋯我⋯⋯我要準備去上堂⋯⋯」

Miss轉身想走，我上前緊緊捉佢手腕，問佢：「唔講清楚唔准走！咩叫冷靜？係咪即係分手呀！」

「你整到我好痛呀！」Miss同我拉扯：「放手呀！我真係要去上堂啦！」

最後Miss一股蠻力掙脫開我隻手，一雙紅腫淚目凝視注我，彷彿想同我講：「我都唔想分手！」不過，佢把口卻咁樣講——

.

「我地真係需要冷靜一下！」

.





然後佢急步離開「空中花園」。

我嘅靈魂慢慢自體裡剝離⋯⋯

= = = = =

冷靜一下？唔見面、唔搵對方就可以冷靜的話，咁同分手有咩分別？

點解分手嘅理由都咁無綾兩可？而家我同Miss嘅關係到底係點架？

只知道我情緒差到一個點完全唔想返去上堂。一直坐喺空中花園發呆，然後有老師見到我情緒唔對路，輾轉之間帶咗我去社工吳姑娘嗰度坐。

唔知幾時，我又聽到鐘聲。我先有啲反應，望一望個鐘原來係最後一堂嘅班主任課。





「你終於醒啦？」吳姑娘好擔心咁講。

我一面不解咁望住佢。

「你入到嚟坐，就一直發呆，叫極你都冇反應呀。都估到你咩事架啦。十成九因為感情事啦！所以比你繼續休息囉。」

「嗯。」

「抖夠就上返課室啦。」

「嗯。」

離開社工房之後，我行返上課室，然而氣氛卻非常古怪，有一種不安同嚴肅喺空氣中擴張。

= = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學