真人真事改篇﹕師生戀﹕《最接近的陌生距離》: 第四十二章之二

我同蟲蟲慢慢行出海濱公園，仍然一句說話都冇講。氣氛老尷到我唔敢搵話題。我同佢向地鐵站方向行，隔咗一個身位嘅距離。

點解我同蟲蟲瞓完一覺後會變得咁陌生？

琴日我同佢從未如此親密過。雖然飲醉酒，但我好清醒。我知自己做緊咩——

.

我想錫蟲蟲。





.

係好想，好想一啖Kiss落去。

我更加清楚明白呢份慾望嘅本質係我想嘗試發展Miss以外嘅感情。我知道咁做係好仆街，我等同思想出咗軌，甚至係實行緊出軌計劃！喺酒精之下令我呢個想法可以大膽地實行、唔理後果咁實行。

而家尷尬嘅氣氛，要兩個人都覺得個關係變化咗先會造成。難道⋯⋯琴晚我醉咗想越界時，蟲蟲同我都有一樣嘅想法？我地嗰一刻都好想⋯⋯？！如果唔係蟲蟲突然醉暈咗，我相信我地嘅關係徹底變晒！

總覺得蟲蟲當時唔係咁快醉暈咗。而係喺緣崖勒馬之時，蟲蟲做咗個正確決定。蟲蟲其實比我清醒，佢知道我有女朋友，我同佢都唔可以越界。





「係呢，你住邊架？」我抵唔住尷尬嘅氣氛，嘗試打開話題。

「筲箕灣。」蟲蟲語氣好平息，冇晒尾音，佢繼續話：「不過唔係我屋企。係家舍。」

咁都印證咗蟲蟲琴晚嘅分享，佢家庭複雜又被人虐待過先要住家舍。

「其實你應該唔可以隨便出嚟。」

「家舍星期六會比我放假，返去自己屋企同家人過週末。但我唔想返。通常星期六我會一係去apple度瞓，一係就喺海濱坐天光。不過apple、冬冬同樂樂佢地呢排拍晒拖，都冇咩時間理我。」





唉，聽落真係好凄涼。

「咁呢個星期六你未冇屋企返？」

「嗯。」

「自己一個女仔喺出面點得呀？不如返家舍啦。」

「我唔想七日都困喺同一個地方呀。」

「咁⋯⋯」我諗一諗，又話：「不如我嚟陪你啦。」

「唔要！」蟲蟲斬釘截鐵咁講：「你應該要陪女朋友架。」

我搖搖頭，嘆氣：「佢都冇時間陪我啦。」





蟲蟲冷冷一笑，話：「想搵我攝時間？彩你都傻！」

「喂！係咪咁講呀！話晒都brother 喎！」

「唔係呀。」蟲蟲變得真誠咁講：「冇女仔會鍾意自己男朋友成日搵第二個女仔架。」

佢咁講都有道理嘅。

行下行下，我同佢已經去到港鐵站，係同蟲蟲講再見嘅時候。

「我⋯⋯坐車走啦。」蟲蟲表情變得有啲腼腆：「咁⋯⋯bye bye！」

「嗯。bye bye。」





蟲蟲點一點頭，擰轉身走，不過佢收快轉返過嚟同我講：「阿匡！其實⋯⋯」

「嗯？其實咩呀？」

「多謝你！其實我琴晚⋯⋯」

蟲蟲講得好吞吐，有似有一句好重要但難於啟齒的說話想講出口咁。

幾秒後佢抖咗啖大氣，就鼓起勇氣講：「其實我琴晚好耐冇試過瞓得咁舒服！多謝你！」

呢一句我入咗心。我知道佢因為我比佢嘅安全感令佢可以瞓得好好。

「嗯！客咩氣呀？brother呀嘛！」

「嗯！」蟲蟲點一點頭，開懷咁笑：「brother! 咁⋯⋯再見。」





佢行咗幾步，到我叫停返佢：「蟲蟲！」

「嗯？」

「不如星期一放學見呀！我想比返條手鏈你！」

「真係整返好呀？」蟲蟲嘅緊張又開心。

「係呀！」見到佢開心，我都開心起嚟：「星期一見啦，好唔好？」

「嗯！好呀！嘻⋯⋯！」

我同佢一直微笑望住對方，氣氛唔止冇頭先咁尷尬，而且好似又變返之前咁，係單純嘅朋友關係⋯⋯咦？我⋯⋯我做咩會咁講？我同蟲蟲不嬲都係朋友關係！





難道我⋯⋯？！

難道佢⋯⋯？！

= = = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師