真人真事改篇﹕師生戀﹕《最接近的陌生距離》: 第四十二章之一

呢一刻，我同蟲蟲被現下氣氛所牽引，面龐愈靠愈近。

我知道我係行緊鋼線，我再唔制止自己想錫落去的話，係一定出事！我唔可以再當蟲蟲係細妹、係brother,因為 ——
.

我好似鍾意咗蟲蟲。

.

呢條係單程路，係冇得返轉頭架！





蟲蟲悲痛嘅經歷好觸動我，令我好想比到關心同愛佢。

冇⋯⋯冇事嘅！呢一吻，只係代表我關心佢啫！正當我想做主動親吻蟲蟲時，忽然我膊頭一重，我張眼一望，就見到蟲蟲已經醉暈咗伏喺我膊頭上面。

「喂⋯⋯喂⋯⋯蟲蟲？」我輕輕咁搖佢，但佢秒速入睡，叫極都唔醒。

佢呼吸好平靜，感覺好似好難得會瞓得著咁。的確，怕黑嘅佢應該一直都唔敢熄燈瞓覺。呢一刻有我喺身邊，佢先有難得嘅平靜。

我唔敢打擾佢，我自己調整返坐姿，伸手搭返佢膊頭，好驚佢會冷靚。天啊⋯⋯我搞緊咩架？我會唔會對佢太好，過咗火位？





我有Miss架！

但頭先意亂情迷之下，我竟然閃出親吻蟲蟲，甚至愛上蟲蟲嘅念頭⋯⋯痴線架咩！一定係酒精嘅錯！

或者，我都要瞓一瞓先，所有嘢到咗聽日應該會回復正常。

= = = =

呼⋯⋯呼⋯⋯呼⋯⋯唔？





我眼簾好重好重，暈眩嘅感覺消失，但換嚟嘅係口乾同嚴重嘅頭痛。唉⋯⋯宿醉嘅感覺真係唔講得笑。當我醒返時，發現黎明嘅晨光出現喺天邊。我全身感覺都超痲痺，特別係蟲蟲挨緊嘅臂彎，直頭好似唔係屬於我自己咁。

蟲蟲仲瞓緊，我地嘅姿勢應該維持咗四五個鐘。蟲蟲依然都瞓得好淰，呼吸好安靜。佢呢刻個樣就好似BB咁惹人憐愛。

不過我最終抵受唔住不適感，微微郁動身體，等啲血行得好啲。亦都因為咁，我唔小心整醒咗蟲蟲。

「唔⋯⋯唔？」蟲蟲睡眼惺忪，個樣望落都幾可愛。佢東張西望一下，一面疑惑，好似對琴晚嘅事忘記得一乾二淨。

直至蟲蟲同我同望一下，佢好似察覺到有啲唔對路。一粒聲都唔出咁坐開少少。佢抱住膝，將披住嘅外套幾乎包住自己。

我同蟲蟲都唔敢出聲，氣氛有啲尷尬。之前做普通朋友時都唔會咁。好快，呢一刻嘅尷尬同寂靜被我連續打咗十幾下嘅黑次破壞咗。

「嘻⋯⋯」蟲蟲偷偷一笑，就比返件外套我。





「你著得咁單簿，你披住先啦。一係⋯⋯」我猶豫緊好唔好講接落嚟嘅說話，幾秒後我就話：「好似琴晚咁，你坐埋啲，我地一齊披住。」

講完我自己都驚訝，冇酒精影響之下，我竟然對佢講啲咁flirt 嘅嘢！

惟獨蟲蟲聽完之後，靜靜咁搖頭，將件外套交返比我。
我拎返件外套後，蟲蟲就行出涼亭，喺草地上伸懶腰。回頭望返我時，已經眼仔碌碌，又精神又可愛。

「返去囉？」蟲蟲微笑。

「嗯！」
= = = = =

ar_hong_91






#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師