真人真事改篇﹕師生戀﹕《最接近的陌生距離》: 第四十一章之二

觀塘海濱公園附近都冇嘢好食，最後我地揀咗最近我地嘅七仔，睇下有咩即食嘢。

喺行緊嘅途中同蟲蟲傾咗唔少嘢。

「我以為你返教會添！原來唔係架？咁頭先啲大哥哥大姐姐你點識架？」

「大約半年前，我唔開心就會去海濱公園自己一個人坐。跟住就撞到佢地。」蟲蟲撥一撥頭髮，又講：「佢地係附近教會啲福音外展隊嚟。所以就識咗佢地啦。之後久唔久就撞到佢地喺海濱公園向年青人傳福音。哈哈⋯⋯多得我咋，如果唔係今晚佢地又食白果。」

「耶教⋯⋯咪搞我。」





「哈！我都係！不過⋯⋯佢地又真係好好人。當全世界都討厭我時，佢地反而最接納我。」蟲蟲好感動咁講。

「你信咗耶教記得唔好拉埋我入會。唉⋯⋯信耶穌一定冇得打飛機同睇四仔。」

「哈！咁我就一定會拉埋你入會！」蟲蟲嘲弄咁講。

「所以⋯⋯你今日本來都係唔開心嘅？」

「嗯⋯⋯」蟲蟲點頭。我地到咗七仔門口，佢語：「唔傾住，我地買嘢食先。」





於是我同蟲蟲入去揀嘢食。呢個鐘數，熱賣點啲撈麵都收咗爐。所以我同佢揀咗啲叮叮嘢食同杯麵，求其醫飽個肚就算，然後索性喺七仔開餐。

「高熱量，多防腐劑，呢餐真係不得了。」我望住一埋杯麵同即食腸仔無奈咁講。

「咁食法個胃唔腐爛就假。」蟲蟲咬緊啲魷魚絲。

我同蟲蟲有講有笑，好似都忘記咗今日發生嘅事。應該話由見到佢一刻起，我已經將唔開心嘅事拋到腦後。喺傾到最開心一下時，我先驚覺自己本來想打電話比Miss。於是拎電話出嚟，但係原來一早冇電。

「頂⋯⋯冇電。」





「做咩呀？你⋯⋯急住打比人？」

「係呀，我想打比⋯⋯」唔知點解，我突然之間講唔出「女朋友」呢三個字。

「打比女朋友？」

「嗯！」反正冇電，我收返部電話算：「算啦。佢應該瞓咗。」

「嗯⋯⋯」

然後我地繼續頭先話題。

只係我冇頭先講得咁放心，明顯係我諗起Miss之後我就變成咁。

「呼——！食飽飽啦！」蟲蟲食飽之後，面色特別紅潤，然後佢同我講：「阿匡，你想返屋企未？」





我心諗⋯⋯返到去喺自己房都係亂諗嘢多，所以擰晒頭講：「未呀。」

蟲蟲聽到就笑一笑，話：「不如我地⋯⋯」佢向我打個眼色，叫我望下我身後嘅雪櫃入面既啤酒。

「隊啤？我地未夠秤喎！」

蟲蟲即刻收起歡顏，抱怨咁講：「我唔信你冇劈過酒囉！你一定有偷偷買酒飲啦！」

「你聽住呀痴線妹！我呀！出名係酒筲箕！」我用手指公指一指自己。

「咁你證明比我睇啦。」蟲蟲笑嘻嘻。

「喂！阿大姑，你望下我呢身打扮？校服呀，你識唔識架？點買呀？」





蟲蟲帶住嘲笑咁講：「睇本小姐出馬啦！」佢經過我身邊時搭一搭我膊頭，就埋去雪櫃拎咗兩pack啤酒。嘩⋯⋯一嚟就咁兇狠？

呢個時候我先認真睇下蟲蟲今日一身打扮。嗯⋯⋯簡單講係典型16歲少女嘅衣著。除咗佢嘅招牌馬尾頭外，耳仔戴晒耳環。佢化咗個成熟少少嘅妝，眼影、大眼仔con基本都齊。上身嘅件T裇有啲榨身，露臍，搞到佢對波比平時校服Look時望落去大咗啲啲。女仔貪靚起上嚟真係唔怕凍，因為佢下身正正係著住條短褲，加對白波鞋。右腳腳眼仲戴咗條手織嘅繩仔，搞到我好自然咁注視佢對腳。

嗯⋯⋯佢呢個look的確比校服look成熟啲，但點睇都唔似成咗年。

蟲蟲拎住兩pack啤酒放咗喺收銀枱度，咩都冇講，只係托住個頭，對收銀哥哥微笑。

收銀哥哥一睇就知蟲蟲未夠秤，擰晒頭話：「唔得喎。你未夠十八歲。」

「我今年十六歲咋！」蟲蟲好誠實咁答，佢點住手指話：「哥哥，幫幫手呀。」

蟲蟲發揮佢嗲功，我見到個收銀哥哥有啲怕羞，將個Cup帽拉低啲，話：「妹妹，我唔做犯法嘢架！」

「嘻⋯⋯」蟲蟲笑住話：「成間鋪頭得我地三個怕咩喎！」




 
「一陣你係嚟放蛇我未大鑊？」
 
「點睇我都唔似警察啦！」蟲蟲苦笑，佢指住我同收銀哥哥講：「邊有警察著校服架？」
 
「你蝦我冇睇過逃學威龍咁喎！唔得呀，唔賣比你呀！」
 
蟲蟲笑嘻嘻一聲，就話：「哥哥呀，你有冇電話呀？」
 
「嗱！」收銀哥哥拎咗七仔嘅電話出嚟。
 
蟲蟲跳跳紮，搖晒頭：「唔係呀！我係話呀，你嘅電話呀。」把聲真係好嗲。
 
收銀哥哥意識到咩事，嘴角暗笑，就話：「即使係咁⋯⋯我都唔會賣比你架喎！」但佢身體好誠實咁將部電話拎咗出嚟。
 




蟲蟲接過陪電話，然後入咗個number，再比返收銀哥哥就話：「最多比個機會你請我飲嘢呀。」
 
收銀哥哥難忍興奮，就話：「而家就請你飲嘢啦！」
 
嗶——嗶——！佢用掃描器喺兩pack啤酒掃咗一掃，佢話：「盛惠80蚊，送多包花生比你。」
 
「好嘢！」蟲蟲拍晒手掌。
 
而收銀哥哥自己收咗自己錢後，就幫手用膠袋入埋兩pack啤酒。
 
蟲蟲拎住啤酒，走之前仲要對收銀哥哥做出「記得call我呀！」嘅動作。收銀哥哥開心到笑得好鬼咸濕。
 
我同蟲蟲行出七仔，我即刻好驚嘆咁同蟲蟲講：「你⋯⋯你⋯⋯好嘢喎！係有料到喎！你成日咁樣呃酒飲架？」
 
「哈哈⋯⋯！」蟲蟲好自然咁將袋啤酒交比我拎。
 
「你令到佢請你飲嘢真係好勁呀！犀利！」我讚完佢，梗係搵機會潤一潤佢啦。我話：「你小心喎。隻狗公實日日打比你。」
 
「吓⋯⋯點會呀？」
 
「吓？！佢冧晒咁嘅樣！實打比你啦！小心呃你蝦條呀！」
 
「你放心啦！一定唔會呀！係一定！」
 
「你又知？」
 
「係都打比你先啦！」
 
「吓？！」呢一刻我有唔好嘅預感⋯⋯
 
「嘻哈哈哈——！」蟲蟲一跑一跳走喺我前面，可愛嘅馬尾隨佢動作擺動。顯得佢一身青春活力！
 
佢擰轉身同我講：「因為——」
 
 
.
 
「——我留咗你個電話號碼比佢啊嘛！哈哈⋯⋯」
 
.
 
咩話？我頂！咁都比蟲蟲過咗一幢？！


= = = = =

 ar_hong_91 #小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師