真人真事改篇﹕師生戀﹕《最接近的陌生距離》: 第三十八章之二

放學，操場。

我睇到杰少心情靚晒喺球場打緊波，搞到我開始有啲躁。頂佢，佢好似置身事外咁！Miss拒絕幫忙呢件事我仲未同杰少講。應該話，唔知點開口。

我好清楚杰少個脾性。做得我兄弟，我同佢或多或少有相似嘅地方——講雷氣。不過佢就病態一啲，為雷氣可以唔講道理。甚至乎佢會要求身邊人都要有佢呢種「高尚情操」。所以⋯⋯我講到咁，大家都明我將要面對咩問題啦？

「杰少，埋嚟講兩句。」

「射埋呢粒先！」杰少邊打波邊講。然後佢射失咗，又對我講：「入咗先計！射多粒先！」





屌你⋯⋯我就忍唔住！而家咩態度呀？我望一望錶，仲要買餸煮飯架！

我望去教員室嗰層，見到Miss眼腫腫咁喺廁所行返出嚟，唉⋯⋯佢頭先應該又偷偷地喊！喺學校我真係唔可以即刻安慰佢！搞到我又急又煩又躁！

最後我忍唔住大叫：「杰哥！傾得未呀？我趕時間架！」

杰少射嘅波喺籃邊擦過，佢回頭用一個嬉皮笑臉嘅態度望住我，就抱怨話：「屌你！嘈乜嘢啫！搞到我射失咗。」

佢行埋嚟，個樣好輕鬆，唔似得今朝勁躁底。呢下開始搞到我想狠狼屌柒佢。你老味，我為咗你搞到差啲同Miss嗌交！搞到Miss唔開心！





「係咪有好消息呀？匡哥！」杰少烚熟狗頭咁。

我快講就算，我驚望多佢一陣，真係忍唔住即場濕佢一鑊！

「冇呀。」

杰少個傻笑慢慢凍結起嚟，再問：「你唔係講笑吓話？」

「冇呀！冇得傾呀！」





「喂！我⋯⋯屌你咩！」杰少攤出手，講嘢開始大聲：「我仲旨意你架喎！真係冇得傾？」

「呢件事唔係盈盈一個人話晒事！」我嘗試冷靜自己，再講：「佢要同好多人交代架！」

「喂！你唔好同我講呢啲！咁你係咪想托我手踭呀！兄弟！」

「唔係想托你手踭呀！係冇可能做到呀！」我感覺到自己個心好似乾咗水嘅水煲，但啲火仲燒緊。

「叫你條女講一句『算數』未得囉！有幾難呀？！一啲著數都冇！你媾Miss返嚟把撚呀？」杰少嬲到塊面紅晒：「屌，你條女真係廢架！」

「仆街！你講咩呀！」我推咗佢一下！

我緊接想上前濕多佢一拳。好彩阿波即刻攝咗過嚟，撳住咗我。

「哇！兩位大佬搞咩呀！」阿波。





「仆街仔你講多次呀！邊個廢呀！邊撚個廢呀！」我好激動咁叫：「 大聲啲講一次！你夠膽再講呀！講咗就冇兄弟做！」

「哎吔！一人少句啦！」阿波手忙腳亂緊又撳住我，又推開杰少。

杰少比我兇多兩兇，佢即刻驚咗，因為我好少晒發脾氣咁對佢。佢即刻話：「得啦！係我衰。我唔應該咁話大嫂嘅！」

佢道咗歉，我條氣順返少少。點講都係由細識到大嘅朋友，我唔想搞到咁僵。

「對唔住呀。我⋯⋯我一時心急唧。所以口快快講咗呢啲說話。」杰少都算誠懇。我點一點頭當係接受咗佢道歉。

「咁你地揸個手先啦。」阿波

我同佢杰少揸咗手之後。杰少就一面為難咁，再同我講：「不過匡哥呢鋪我真係唔掂呀。幫多我一次咁多啦。」





「你又想點呀？！」我唔耐煩咁講。

「小過就記硬，冇得避。咁我考好個試，應該仲有得救嘅。」

「咁你拿拿聲而家返屋企溫書啦！」

「點溫得切呀！」杰少埋嚟喺我耳邊講：「即係咁⋯⋯你同阿盈咁熟。你覺得——」

.

.

「你覺得你有冇可能知道中文卷會點出呀？」

= = = = 

(提一提大家，今日三更啊)

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師