真人真事改篇﹕師生戀﹕《最接近的陌生距離》: 第三十八章之一

「唔得！」Miss聽到我幫杰少求情時，佢即刻斬釘截鐵咁拒絕咗我。

頭先Lunch食飯嗰時，杰少係咁同我打眼色，提我一定要幫佢同Miss求情。我趁午息啲人一散，就同Miss去咗空中花園傾呢件事。

「杰少有苦衷架。」我唔敢同Miss太埋，因為呢度距離女校太近：「你不如聽咗佢點講先啦。就好似⋯⋯你初初關心我咁，你都冇一嚟就罰我啦！」

Miss見我幫杰少求情時，我已經feel到佢嬲嬲地，搞到我綁手綁腳唔敢去太盡。唉，手背同手心都係肉啊！可惜Miss聽完我咁講之後，佢更嬲！

「我唔聽佢講？「你知唔知佢頭先個態度係幾咁差？！佢完全都唔覺得係自己有問題！一返嚟擺晒款咁呀！根本就想恃熟賣熟呀！」





總覺得，Miss呢一下感受係夾雜咗好多女朋友嘅成份喺入面。

「杰少頭先同你點講？」Miss成個人嘅氣息變返未拍拖前咁，睇嚟佢今次企得好硬。

「佢話你唔比佢解釋。」我誠懇咁講：「盈盈，佢爸爸斷咗腳開唔到工。得杰少一個要撐住頭家咋。就好似我嗰時咁，你話我為父母走堂返兼職，你都體諒我嘅處境啦，你都冇罰過我呀。」

「即係話我唔體諒佢啦！」Miss壓唔住憤怒，向我爆發。

「我唔係咁嘅意思！或者你聽下佢講，可能件事唔會咁僵呢？」講真，我有少少躁。呢句說話我開始出緊情緒。





「咁你會唔會聽我講呀？」Miss開始眼泛淚光：「我而家係用盈盈呢個身份！我用女朋友呢個身份嚟問你！」

見佢想喊我就心軟，最衰呢度好近女校，如果唔係我會好好安慰佢。

「你知唔知我都好難做架？杰少唔返咁多日學，我要同好多老師交代架！訓導組所有老師！我上司！仲有副校長呀！！」Miss開始流淚，佢緊閉雙眼抖大氣，想好好冷靜落嚟：「其實⋯⋯開學嗰陣你逃學件事，我已經被副校長警告咗唔可以再姑息學生！」

原來當初佢救我背後有咁大隱情！

「唔係話一句唔記就唔記架！你明唔明呀！」Miss大聲鬧我：「仲有！杰少屋企上個月開始拎綜援，你覺得佢逃學返工真係為咗養家咩？」





我沈默落嚟，聽緊Miss嘅飲泣聲。可能佢都怕比對面女校嘅人見到。佢即刻背住我，再匿喺啲花架後面。

「份考試卷又有問題。我要再改過份卷。」Miss稍為冷靜少少，但仲哽咽緊。佢好想藉機會去同呻工作嘢。

「咩事呀？」

「我都唔知呀！已經來來回回改咗好多次啦！」Miss委屈咁講。呢個時候剛好打預備鐘，Miss再見都冇講就走咗。

睇到佢咁我又心痛又難過。佢嘅工作煩惱，我真係冇嘢可以幫得到手。仲有杰少嗰邊，唉，可以點平衡到呀？

定係⋯⋯我只可以是但幫一邊？

= = = = 

ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師