真人真事改篇﹕師生戀﹕《最接近的陌生距離》: 第三十六章之二
「簡單講，中七姐姐其實只係個代號嚟。」我講完，Miss同家姐兩個停手冇食嘢，呆晒咁望住我。我繼續話：「咁我第一次好認真鍾意人呀嘛，我唔敢同人講。得家姐你可以傾，所以未求其作個身份代替佢，話我想追隔離女校嘅中七姐姐囉。」
「所以⋯⋯」家姐。
我夾餸比家姐，示意佢食。我話：「所以中七姐姐唔係中七姐姐，其實一直都係佢！」我指一指Miss：「佢叫阿盈，係我女朋友。」
家姐狐疑起嚟，就問：「阿盈唔好意思我咁樣問。你地年紀望落都差好多喎。你地係點識架？阿盈你讀緊大學？」
「呃⋯⋯」Miss一時間都唔知點答，就話：「我同阿匡相差⋯⋯七年？」
「咁即係大過我？」家姐好驚訝：「即係阿盈你已經出嚟做嘢嗱？」
「哈⋯⋯哈⋯⋯係呀⋯⋯」
「哦！咁我明啦！」家姐好興奮咁對我講：「細佬，你地係做兼職識嘅！」
我望返Miss，好想答家姐話係。但Miss搖一搖頭，表示再隱瞞佢身分落去其實都冇意思。所以我就咁講：「我地唔係兼職識架。」
「吓？」
「我地其實⋯⋯」我深吸一口氣話：「喺學校識。」
「吓？！」家姐瞪大對眼：「咪⋯⋯咪住先⋯⋯我load唔到！即係⋯⋯咪住先！你嗰間男校嚟架喎！」
「啊！係呀，男校呀。冇女同學架！」我用筷子搔一搔個太陽穴。
「佢係校務處書記姐姐？」
Miss接住講：「其實阿匡係我嘅⋯⋯」
我同一時間都講：「其實盈盈係我嘅⋯⋯」
家姐飲淡湯，當飲茶咁定一定神。
.
「阿匡係我個學生。」
「盈盈係我班主任。」
.
「噗——！」家姐即刻濁親！噴晒啲湯出嚟，連續咳幾聲：「咳！咳！咩話？！」家姐一面疑惑又狼狽望住我同Miss。我嗱嗱聲拎紙巾比家姐。
「我正式介紹自己先！我係阿匡嘅班主任！可以叫我做Miss Wong！請多多指教！」Miss腼腆咁笑：「嘅然你係阿匡個家姐，你叫我做盈盈啦。」
「冇咩人可以咁叫佢架！家！姐！」
家姐定一定驚後，仲一面吃驚咁講：「你地點解會一齊到架？我呢個細佬好廢架！你⋯⋯你⋯⋯點解會鍾意我細佬架？」
「喂！謝子瑜！比下面好喎！」我接著講。
「嘻⋯⋯我初初都唔明點解阿匡會鍾意我。但而家我明啦！」Miss對家姐微笑：「佢做慣細佬，鍾意姐姐！而我呀⋯⋯我可能原來都鍾意弟弟。嘻⋯⋯！」
我好想反駁，但諗諗吓⋯⋯姐姐係吸引啲！原來我係百分百嘅姐控！
「咁⋯⋯咁你地平時喺學校點架？偷偷地拍拖？盈盈佢係你學生，實有在公在私嘅問題喎！點處理呀？」家姐。
「唔洗問。一啲男朋友福利都冇！」我發下晦氣。
「嘻⋯⋯唔洗擔心。喺學校我一定會做佢老師。佢比人記大過我都唔會特登救佢架。」Miss甜笑：「放咗學我先做佢女朋友。我盡量做到公私分明架！」
「嘩——！好爆呀喂！」家姐突然有一種莫名嘅興奮：「有冇白花油呀？就暈低啦！」
Miss見到都家姐嘅反應忍唔住笑。
「所以，家姐你明點解我要老吹係中七姐姐啦！我鍾意自己班主任喎！你一定笑我啦！」
「咁阿爸阿媽知道咗未架？」
「盈盈有次上嚟家訪時就見過阿媽啦！」我雙手合十求佢：「家姐你一定要保密呀！老豆阿媽知道咗真係會死人架！阿盈都會死架!」
「細佬！我估你唔到呀！好嘢！你好嘢！」家姐好豪邁咁比個like我。佢對Miss講：「我都奇怪架啦，第一眼見到你。都唔似中七嘅？咦⋯⋯細佬講過你係港大中文系，言下之意！啊——！」
兩個女人突然好興奮咁同一時間講——
「你係我師姐呀！」「你係我師妹呀！」
係喎！佢地兩個都係讀港大中文系喎！然後Miss突然變到勁熱情走去同家姐坐，兩個人好快就熟咗。嘩——！好險，頭先差少少比啲戇鳩嘅誤會搞到分手！冇諗過啲氣氛可以變得咁快！
Miss同家姐好好傾。咁啱家姐都想做老師，佢即刻同Miss取經。而Miss就話一直都見唔到家長，而家識到家姐就可以知道我個成長係點。由細到大，我同家姐都有唔少牙齒印，家姐好自然喺Miss面前數臭我啦！
「佢到今日連底褲都唔洗架！係我幫佢洗架！」家姐。
「謝子瑜！你講呢啲！」我提出抗議。
「唔係呀！阿匡其實好識照顧人呀？」Miss好甜咁笑：「起碼佢識煮飯呀！呢幾日佢仲幫我整Lunch Box添。」
「聽到未呀！」我指住家姐講。
「你仲好講！原來你識煮飯嘅！」家姐奸笑咗一下，就同Miss講：「盈盈，陣間爆啲料你聽。關於個衰細佬睇白先勇小說嗰啲！」
「喂！」我大吃一驚。當時睇白先勇啲書我冇完全睇晒，我都係問家姐借懶人包咋！
「好呀好呀！」Miss好雀躍。
氣氛開心到唔知時間。兩個女人傾到唔停。傾傾下，仲知道咗家姐做咩返咗嚟屋企——佢同男朋友散咗。家姐喺Miss面前喊晒，Miss就好似做咗大家姐咁好言安慰。
唉⋯⋯總之今日感覺太奇妙。當然啦，我真係好想可以同Miss以後都好似今晚咁開心生活落去。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學