真人真事改篇﹕師生戀﹕《最接近的陌生距離》: 第三十六章之一

當大門被打開嘅一瞬間，呢間屋嘅氣溫瞬間跌落冰點！

唔只我同Miss呆晒，連企喺門外面嗰個人都呆咗！

「你⋯⋯返嚟啦？——」

.

「——家⋯⋯家姐⋯⋯」我把聲驚到震晒。





.

「Hi⋯⋯你好呀⋯⋯家姐⋯⋯」Miss好尷尬揮手，佢個屋企Look又跌膊又長腿，係性感咗啲嘅。

家姐原本揪住一大袋嘢，都嚇到跌咗。舉起手指住我，一面狐疑咁講：「細佬⋯⋯佢係⋯⋯」然後家姐大叫一聲：「哦——！」佢意會到咩事啦！

「家姐入嚟先！」我拉家姐入屋後，就嘭一聲關門。我貼住度門講：「家姐，我可以解釋！唔好同老豆阿媽講！會死人架！」

「解咩釋唧？我知啦！」家姐講講下就興奮起嚟：「你真係追到呀？叻仔喎！」





「吓？」我一面不解咁望去Miss度。

家姐見到我疑惑起嚟，就問：「吓？你吓咩呀？唔係嗰個女仔咩？」

我靈光一閃，醒起好耐之前同家姐呻媾Miss嘅嘢！我當時求其話自己鍾意咗對面女校嘅中七女仔。大佬呀，鍾意自己班主任點講出口呀！

我本來想同家姐解釋，但Miss聽到家姐咁講之後，到佢疑惑起嚟，企起身講：「咩嗰個女仔呀？」

家姐望返Miss，就疑惑起嚟，就話：「係喎！呢個大咁多嘅？」佢再對返我講⋯⋯屌⋯⋯呢句就真係死人啦！





「細佬你唔係話追緊隔離女校嘅中七姐姐咩？」

「唔係呀家姐！」我連忙大叫！

「咩隔離女校呀？」Miss一聽到隔離女校就好鬼敏感，即刻上前問：「你一早就識蟲蟲？」

家姐望住Miss就講：「哦？嗰個女仔原來叫蟲蟲！」

「唔係唔係！複雜咗啦！」我耍晒手咁講。但Miss面色唔多好，嚇到我亂晒陣腳，連忙咁講：「蟲蟲今年中四咋！邊係中七呀！」

「咁邊個係中七姐姐呀？！」Miss開始發惡！

「九月份佢愁緊要追嗰個女仔未就係中七姐姐囉！」家姐對Miss講。

「唔係咁架！錯晒！全部錯晒呀！」救命呀！我唔知自己講緊咩呀！





「謝子匡！你⋯⋯呃我？」Miss谷到塊面紅晒。

「中七姐姐！冇呢個人！冇存在過架！」我亂到唔知自己講緊咩！

「咩呀！你仲問佢借書睇架喎！咪扮野啦細佬！」家姐招招無情力嘅飛劍真係攞命架！

「謝子匡！你表白嗰日話你鍾意睇書！原來實情係咁！」Miss就快急到喊出嚟：「即係你追唔到中七嗰個女仔先要我啦？你⋯⋯你仲趁我啱啱同Vick分手⋯⋯」

「No! No! No! 錯晒！」我嗌救命啦：「複雜晒！複雜晒啦！」

「你又係嘅細佬！一開始坦白啲而家未唔會咁囉！」

「你同我收聲呀！」我忍唔住要噴家姐：「係你搞到而家咁複雜呀！」





「謝子匡！我地分手呀！」Miss喊咗出嚟！

「阿盈！唔好呀！件事一啲都唔複雜架！係家姐搞錯晒咋！」

「喂！由細到大你冇喝過我架喎！我邊有搞錯呀！」

「你唔好再嘈呀！」我一邊鬧家姐，一邊拉住Miss。

「你唔好掂我呀！」

女人真係！痴線架咩！一個就口噏噏，一個就唔聽我講喊晒！冇一個肯聽我慢慢講清楚！終於忍唔住到我要爆啦——

.

「你兩個！即刻收聲，聽我講啊—————————！」




.

我嘅叫聲應該嘈到隔離屋想報警。

但呢下怒吼，我係成功令佢地靜咗一秒。

我喘晒氣望住佢兩個。Miss情況危急好多，於是我先同Miss講：「阿盈，由始至終，你係我惟一。冇中七姐姐。冇架！唔存在架！九月我仲未識蟲蟲架！」

家姐呢個時候想駁我，我即刻指住Miss同家姐講：「家姐，佢就係中七姐姐啦。」

「吓？！」兩個女人同時吓咗出聲。

我一面苦笑，我含住泡眼淚，話：「不如咁，加多雙筷。我地一路食飯一路傾呀！」我誠懇咁望住佢兩個：

「你地話好唔好呀？」

== = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師