真人真事改篇﹕師生戀﹕《最接近的陌生距離》: 第三十四章之一

到底我係咪同啲PE阿Sir有仇？首先周Sir, 跟住就李Sir?

好死唔死，今期學校做欖球推廣，借咗第一堂班主任節嚟做PE堂。變相我第一堂就要同李Sir交手！

周Sir係一個暴君，係人都憎佢，恨不得佢快啲死添！但李Sir就唔同，佢嘅出場已經好吸引人。佢簡直係男仔嘅成長模範！連男仔都比佢吸引，咁更何況女人呢？

Miss同李Sir由細玩到大，即係有感情基礎啦。有感情基礎即係互有好感啦！互有好感咁未———

嘭——！





「嘩——！」眼前一黑，我一嘢被人撞飛咗！

雖然著晒盔甲，但撞落嚟嗰下都痛架。我唔慣打欖球，搞到一時間起唔到身。

「你點呀！」

我聽到一把好有活力嘅男人聲。然後見到一個碩大嘅身影企喺我面前。由於太陽照個正著，喺我眼前只係一個剪影。呢個人係李Sir。

「有冇整親呀！」佢向我申出友誼之手想扶我起身。





「冇事。」我拒絕佢好意，自己起返身。

「戴住個頭盔唔慣呀？」李Sir露出陽光笑：「係咁架啦！打打下就慣。嚟啦！我教你玩！」佢拍一拍我肩就鼓勵返我。

無何否認，佢真係冇阿Sir架子。連佢自己都落場玩埋一份，仲玩得投入過我地。唉⋯⋯又真係憎佢唔落嘅。

可能我平時得罪人多，或者杰少同阿波葡萄我媾到Miss，佢地 喺呢半個鐘內係咁撞鳩我！

躁躁地，我同李Sir講休息一陣。李Sir冇托手踭，照比我去雨天操場休息。我坐喺小賣部啲櫈度，除咗啲甲，焗到成身都係汗。





突然間我面龐有一下冰凍感，嚇到我叫咗出聲。

「凍柑！」我背後有把好甜嘅聲叫緊。

我擰轉面就嗌：「Miss?!」

「獎你嘅！」Miss將個「凍柑」——可樂遞比我。

「好嘢！多謝Miss！」

我急不及待想開嚟飲。但Miss奸笑咗聲，話：「小息先飲呀！」

「哎吔⋯⋯！男朋友口渴喎！」我有啲掃興咁講。

Miss做咗個可愛鬼面，又話：「係咪唔聽Miss話呀？」我放返低，對佢做返個鬼面。佢嘻一聲笑，話：「咁就乖啦！」





Miss坐喺我旁邊，我就話：「咁得閒嘅？唔洗改簿咩？出晒試卷啦？」

「一早做晒啦！似你咩！」Miss輕輕抬起腳，合埋。我見到佢著咗對新鞋，佢好似細路女同人show玩具咁，用把撒嬌嘅聲講：「嘻⋯⋯低B仔，你睇下！新架，靚唔靚呀？」

「靚！」

「答得咁快！即係冇諗啦！膚淺！」Miss鼓起泡腮講。

「咁⋯⋯⋯」我遲兩三秒再講：「好靚呀！」

「答得咁慢！諗起邊個呀？吓？！係咪蟲蟲呀？！」

「嘩！你咁樣陰我？」





「嘻⋯⋯嘻⋯⋯唔玩你啦！」佢望返去操場，見到自己班學生玩得好投入，佢開心咁微笑：「班馬騮難得玩得咁開心喎！Alex真係有一手。」

聽到佢讚第二個男仔，我心入面不是味兒，發少少晦氣講：「係囉，李sir實好多女仔鍾意啦。」

Miss知我呷醋，擰個頭嚟笑住講：「係架！唔止女仔架。男仔都鍾意佢架！」

「咁佢有女朋友未呀？」

「可能係有男朋友呢？」

「吓？！」

「哈⋯⋯同佢做姊妹咁耐，真係未聽過佢拍拖喎！」

「唉⋯⋯咁今次大鑊。」我摸摸額頭，細細咁講：「九成扮基媾女啦。」





「嘻⋯⋯你擔心呀？」Miss好似好開心見到我擔心嘅樣。

「冇！邊有！」我扮作大方自然咁講：「我最大方添啊！」

「咁得啦！今日我會同Alex出去食Lunch喎！」

「吓？！」我嚇一大跳，叫道：「你講多次？兩個人呀？」

我嘅叫聲太大，有啲同學望咗過嚟。Miss瞄咗
我眼沈一沈面色就話：「洗唔洗呀你！坐返低先啦。」

我坐返低後，同佢講：「你兩個撐枱腳呀？」

Miss冇我咁好氣咁講：「係三個呀。我驚你呷我醋，我叫埋Miss Lau一齊啦！」





「啊⋯⋯咁都好啲。」我鬆一口氣。

不過我望去Miss時，就發覺佢好似有少少不爽。佢話：「講下笑都唔得！低B仔！」

「Sorry 囉！」

「算啦，又唔怪得你。慢慢學習啦好唔好？記唔記得Miss講過啲咩？」

佢修長嘅手指輕輕咁指我個心口一下：「要對自己有信心呀。對我都要有信心，正如我信你一樣！」

我諗一諗，我真係誇張咗嘅。諗通咗之後，我對Miss點頭：「嗯！」

我地對望微笑，因為喺學校關係，我地最多只係用微笑來表達彼此嘅愛意。

此時操場上有一聲哨子聲。

「大家休息陣先！」李Sir。

成班同學好似放羊咁衝埋嚟。

「女王大人嚟咗嘅？」「女王大人特登嚟睇我地架？」「女王大人頭先我型唔型呀？」「女王大人⋯⋯」「女王大人⋯⋯」

我地班都算係咁，愈來愈鍾意Miss。不過⋯⋯你班仆街仔比下面好喎！我條女嚟架！撩女仔都有啲分寸呀！

「知大家都攰啦。我幫大家買咗水，自己去小賣部拎啦」

「多謝女王大人！」

成班傻仔狗衝去小賣部拎水飲！哈⋯⋯我就唔同啦，我有男朋友福利！

「Alex! 唔該晒！請你飲呀！」Miss喺我面對拋咗枝水比李Sir。

「咁客氣呀盈盈！」

我屌你！「盈盈」你叫架咩！

「喂！喺學校呀！」Miss被佢搞到哭笑不得。

「Sor 呀！哈哈！慣咗添！」

慣咗？我記得Miss講過唔係最親最老友嘅人，都唔可以叫佢做「盈盈」喎！我嗌得，Ada嗌得，Vick都嗌得。男朋友、閏密同Ex⋯⋯李Sir算老幾呀？！

「多謝你枝嘢飲呀！」李Sir慢慢舉起枝水⋯⋯我睇到眼突！水咩水？可樂嚟架！下？！唔係啊嘛，我同佢都係飲可樂？佢仲要成枝喎！

呢次碌柒呀屌！

躁躁地，想開罐可樂嚟飲。

「喂！」眼利嘅Miss叫停我，話：「小息先飲得呀！」

「佢地都飲緊水喎！」我環視一眾飲緊水嘅同學講。

「你嗰罐係可樂！嘻！」Miss俏皮咁笑咗下，佢重新定義咗咩叫「男朋友福利」。

= = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師