真人真事改篇﹕師生戀﹕《最接近的陌生距離》: 第三十一章之三
花咗半個鐘，我同蟲蟲終於行返出大馬路嘅小巴站等車。蟲蟲清醒返之後，就默默咁企開咗，同我拉返開個距離。
我趁呢個時候打比吳姑娘講返頭先嘅事，報下平安同埋通知佢探唔到伯伯。喺收咗線冇耐之後，Miss就打咗比我。
「低B仔，你冇事呀嘛？！」聽得出Miss好擔心。
聽到呢度我個心甜咗一下，而我雙眼係望住受驚嘅蟲蟲。蟲蟲望咗我一眼後就好刻意咁避開。然後我都好自然咁走遠少少先傾。
「吳姑娘咁快通知你嘅？」
「傻瓜，佢咁啱嚟搵我傾班上其他同學嘅事嘛！你講得咁大聲，咩都聽到晒啦！」Miss:「點呀，啲狗係咪好惡？你有冇嚇親？」
「冇事。平時行開荒山野嶺，遇過唔少村狗啦。我搞得掂嘅！」
「嗯！冇事就好！」Miss停一停，又話：「咁你啲partner 呢？佢冇事嘛？」
咦喂？我總係覺得Miss呢句問得有啲古惑。佢應該想知我同邊個做partner所以先咁問。瞞佢又會令佢唔安心，坦白講又怕佢會唔開心，點做好呀⋯⋯唉！冇計，Miss問得嘅，佢一定係唔安心，我愈瞞愈衰的話盞搞到更大鑊，咁惟有坦白算啦！
「蟲蟲都冇事。」
「嗯。」
呢下「嗯」代表啲咩呢？
仆街⋯⋯我係咪估錯咗Miss諗咩？佢根本唔care我係咪同蟲蟲一齊呀？佢可能預咗我partner係阿偉喎！啊屌！點解我諗唔到架？呢次我team kill咗自己！
於是我特登再行開少少，細聲講：「唔係咁架。阿偉同咗另一個女仔一組。所以我先至⋯⋯」
「蟲蟲係咪喺你隔離呀？」
「係⋯⋯係呀。」
「你傻架？你仲講呢啲？」隔住個電話都感受到Miss被我激到反咗一下白眼：「你唔驚穿煲咩？」佢把聲都壓低咗。
「我更驚你嬲嘛！」我將把聲進一步壓低啲。
「嘻⋯⋯好呀，咁你繼續驚落去啦！哈哈⋯⋯」Miss甜笑地打趣咁講，聽落佢又好似唔太介意我同蟲蟲一齊：「你傻到咩都同我講嘅！得啦，我信你呀。你比心機做義工啦！好冇？」似乎Miss好信我唔會對蟲蟲做啲咩嘢。
「嗯！我會架啦！拎返個小功返嚟抵過呀嘛！」
「乖仔！咁一陣見啦。bye。」
「bye! 」
啱啱收線無耐，頂佢個肺個天又落起雨嚟！
蟲蟲好狼狽咁匿咗喺樹雨下面避雨，我即刻開咗把遮比蟲蟲。因為把遮太細，遮到我時又遮唔晒佢，所以我決定將成把遮比晒佢，我就企咗出遮外面幫佢擔遮。
「落雨呀，你做咩唔遮埋自己呀？」蟲蟲。
「把遮咁細。遮到我就遮唔到你啦。」我微笑咁講：「唔洗擔心我喎。啲雨好細之嘛！」
蟲蟲一句說話都冇講，就向我行埋黎。因為咁，我地同撐喺一把雨傘之下。我同佢企到好埋，近乎係身貼身嗰隻。我有啲驚訝蟲蟲會擔心我比雨淋親。
呢個時候我先意會到蟲蟲個身高只係剛剛到我膊頭，正正係傳說中嘅最萌身高差。唔知點解，呢一刻我地匿喺呢一把雨傘之下，當中嘅氣氛開始變得古怪，有一種奇怪嘅寂靜。我同佢好似都唔敢去越過一條無形嘅戒線。
由於呢個最萌嘅身高差嘅關係，我幾乎可以聞到蟲蟲嘅髮香。佢今依然扎住個馬尾辮，髮尾攣攣地且帶住明顯嘅啡色。
「你冇比人捉髮色咩？」我想令個氣氛好過啲，試下搵啲話題講下：「你啲啡色比之前明顯咗喎。」
蟲蟲望住我之後，就望一下條辮，就話：「好啡咩？」
「啡呀！陽光底下一定好明顯。」
「我成日都比人捉架啦。唔係裙短就髮色，然後就係化妝同埋耳環。」
「你釘耳釘得好跨張咩？」
「左邊四隻，右邊三隻。」蟲蟲笑說，表情開始變得寬容：「我返學只係載一隻之嘛！咁都照捉，啲老師成日針對我！」
「唔重架咩？戴晒啲耳環唔驚耳仔會成隻甩出嚟？」我打趣咁講。
「哈哈⋯⋯」蟲蟲好少有咁對我真心笑，話：「乜嘢甩出嚟呀！痴線！」
幾句說話之後，拘謹嘅氣氛漸漸緩和咗。我見佢神色仍有餘悸，於是喺背囊搵一啲嘢出嚟等佢個心再定一啲。
「請你食呀。」我向佢遞咗枝珍寶珠：「買兩包十枝裝平啲嘛。所以我今朝買咗兩包。」
蟲蟲有啲驚訝我會請佢食糖定驚，一時間表情都複雜起嚟，好似想講多謝但又講唔出口。佢嘅水汪汪大眼望住粒糖，又望下我，似乎唔知要點做先好。我感覺到佢慢慢咗緊張起嚟，然後喺佢自己個袋到拎咗我送比佢嘅珍寶珠出嚟。
「我⋯⋯我⋯⋯我都請你食呀？」佢向我遞咗枝珍寶珠。
「交換禮物？」我笑說。
「嗯！」佢點頭
「咁好啦。多謝你！」我接咗佢枝珍寶珠。
「多⋯⋯多謝。」佢又接咗我枝珍寶珠。
我好似慢慢了解到蟲蟲嘅性格。從佢兩次嘅驚恐反應可以估計到佢曾經受過好深刻嘅傷害。面對陌生人，佢好鬼惡，惡到會出手打人，但其實佢都係保護緊自己。當建立咗一定嘅關係後，真正嘅佢先慢慢表現出嚟。
真正嘅佢其實係非常脆弱，脆弱到連簡單同人相處都唔識。講句多謝都要搵啲道具幫手先講到。同一時間，脆弱嘅佢真係好需要被人關心。
呢個時候，食住珍寶珠嘅蟲蟲見我遲遲都未食粒糖，於是就問：「你唔識開架？」然後佢接咗我粒糖，好細心咁解開包裝而唔係趁機嘲笑我。佢面上原有嘅冷漠同反叛一掃而空，展現出佢唔常見嘅一面。我見到佢嘴角含笑，原來正常時候嘅蟲蟲真係好可愛，係典型惹人憐愛嘅類型，有妹妹屬性嘅魅力。
「嗱！」蟲蟲好似啲小朋友送花比人咁遞返枝珍寶珠比我。
「嗯。」我接過枝珍寶珠，呢次到我有啲不知所措，連多謝都唔記得講！
咩⋯⋯咩話？ 我居然⋯⋯會被蟲蟲搞到不知所措？我搞咩呀？
====
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師