真人真事改篇﹕師生戀﹕《最接近的陌生距離》: 第二十九章之二
放學後嘅禮堂，又係啲19義工訓練小組。由於突然出現兩對情侶關係，成個氣氛唔同晒。感覺兩間學校好似對咗親家咁，氣氛好融洽。聽吳姑娘講，嚟緊要探獨居長者，所以今日嘅訓練就冇琴日咁刺激，成個活動真係⋯⋯悶死我。
「嚟緊大家要分四個人一組，等大家可以互相照應！」吳姑娘：「最理想係有男有女啦，男仔夠力可以搬嘢，女仔細心可以幫手留意劏房入面嘅問題。」
杰少同阿波兩啤情侶好快自己組咗隊。作為一個有義氣嘅朋友，我當然埋咗去阿偉度陪佢啦。然後四條腸粉以外嘅男仔就好似條J咁，個個動L晒埋去班女仔度R埋組。個景象簡直可以用群魔亂舞嚟形容！呢個時候，我見到蟲蟲身邊圍住晒埋嚟R佢一組嘅男仔。都唔意外嘅，蟲蟲係成班女入面最高質，佢cool cool地嘅神情係好吸引人嘅。但蟲蟲一面冷若冰霜咁，對埋嚟嘅男仔不屑一顧，然後拖住個害羞妹行咗過嚟。
「你地好似冇人揀喎！」蟲蟲成個感覺又變返琴日咁，勁串嘴講：「咁得啦，我同樂樂陪你地啦！」
我啞咗，呢個女仔性格上唔止好似有雙重人格，仲要好口不對心添。雖然今日午息同佢傾得好愉快，但而家嘅蟲蟲變返琴日咁又築起咗又長又厚嘅心理城牆。然後我地就準備今個星期六探訪獨居長者嘅物資，pack下禮物包。成個過程，我同蟲蟲一句說話都冇傾。氣氛老尷到我都唔知點開口同佢傾計，心諗係咪有嘢得罪咗佢。
終於捱到七點鐘，可以返歸。我同蟲蟲咁嘅零溝通合作嘅組合，我對今個星期六嘅探訪活動不抱期待。
= = = =
第二日，繼續同Miss一齊返學，又偷下時間拍拖。我同Miss嘅關係因為咁而愈來愈親密。只要身邊冇咩人嘅時候，佢真變成個小鳥依人嘅小女人咁。當然⋯⋯佢又整咗個地獄Lunch Box比我⋯⋯
「你要嘅蕃茄炒蛋！」Miss笑得好開懷。
我緊記戲劇老師教誨，要自然啲自然啲自然啲⋯⋯
「多謝Miss!」唔講多餘嘅嘢，用眼神表達期待！但係我對自己演技冇咩信心。所以喺唔刻意回避眼神呢個原則之下，我好感激咁擁抱佢，抱到佢覺得夠為止。
「嘻⋯⋯夠啦！夠啦！有學生啦！」Miss輕輕拍我肩講。
唉⋯⋯我真係對今日嘅Lunch唔抱任何希望！
= = = = =
自從比心機讀書之後，我好似慢慢搵到讀書嘅樂趣，得閒就搵啲書嚟研究下。而家連啲科任老師都覺得我轉咗死性。最意想不到嘅係，科任老師甚至啲主任級嘅老師都覺得係Miss教好咗我。即係話，只要我愈乖，愈盡返學生責任，就可以幫到Miss連我呢啲壞學生都可以教好，咁佢就唔洗擔心嚟緊續約嘅問題啦！
「好！加油努力！」小息，我去咗「空中花園」溫書。溫書之前幫自己打個氣：「為咗自己亦都為咗阿盈！我要努力！」
今日我要攻略萬惡嘅英文！我唔係要過到今個學期考試。我係要考到大學！
冇錯！我決定咗啦！我要讀到大學！雖然仲未知讀咩好，但我相信讀大學係一定對我同Miss嘅關係最好！或者⋯⋯我跟隨阿盈嘅步伐成為一個老師？
我同Miss嘅差距好似爬山咁，我要一手一腳慢慢爬，慢慢拉近個距離。
老實講，「空中花園」靚係幾靚，但就真係幾當風，搞到我狂打乞嚏。話說我個鼻準過天文台，點解咁講？因為只要開始轉天氣，我個鼻敏感就會發作。最誇張試過一次過打十個乞嚏。
喺溫到差唔多完小息嘅時候⋯⋯噗———！又有粒波跌喺我身前。
「又係你。」我望去女校嗰度，見到蟲蟲刻意回避我眼神，過咗幾秒先腼腆咁望過嚟同我揮手。
「賤人匡！咁乖嘅，又溫書？」蟲蟲嘅字：「你啲黑嚏聲大到我呢邊都聽到啦！」
「又冇人陪你玩呀？痴線妹！」我啲字，非常醜。
一球去。一球返。
「哈⋯⋯你唔當自己係人？頭先我比老師捉髮色，所以遲咗嚟⋯⋯陪你溫書！」
呢個女仔又口是心非，我覺得佢係想係為遲嚟而致歉。正正因為咁，我想捉住呢個機會了解下點解佢個性會咁兩極。
「琴日義工小組，你一句嘢冇同我傾過。但而家又咁好傾嘅？你份人都好難捉摸喎。」
蟲蟲睇到張紙後諗咗陣，寫咗啲字然後又撕爛咗又寫過張。來來回回寫咗幾次後，佢終於掟返粒波返嚟。
「⋯⋯你比啲時間我⋯⋯」
「吓？即係點？」
棒球喺兩間學校中來回往返。
「因為我唔太習慣同人⋯⋯我覺得咁樣同你傾偈比較舒服啲！不過⋯⋯我慢慢適應緊⋯⋯我⋯⋯我應該可以剋服到架。」
字裡行間，我感覺到蟲蟲欲言又止，好似想講啲心事比我知。
然後我再睇埋落去，佢仲寫多句嘢：「我嘅事唔講咁多啦！我朋友樂樂佢對你朋友阿偉有啲好感。我想製造啲機會比佢地。不如星期六我地一齊食早餐再返學呀。」
都估到啦，阿偉同樂樂琴日啲互動好微妙，感覺到佢地係互相吸引嘅。之但係，返學時間係我同Miss僅有嘅拍拖空間，我就唔想答應蟲蟲住。咁啱呢個時候就打鐘。我覆唔切蟲蟲，惟有對住佢大叫：「喂！我要上堂啦！」
「一陣Lunch你再覆我啦！」蟲蟲喺對面叫過嚟，睇落佢有啲期待。
我地互相揮手之後就各自返上課室。
= = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師