真人真事改篇﹕師生戀﹕《最接近的陌生距離》: 第二十九章之一

蟲蟲用力揮手，一個白色殘影好似憑空出現喺我眼前！

噗——！一聲，我額頭就劇痛非常，應該被棒球狠狠地打中咗！今次仲失咗平衡，跌咗落地。一粒白色嘅棒球碌咗喺我面前。

「哈哈⋯⋯」對面嘅蟲蟲好滿足又愉快咁笑。

「痴線架咩！」我起返身之後對住蟲蟲大嗌：「夠啦！咪再掟嘢過嚟呀！」

「吓——？！」蟲蟲扮聽唔到，佢拎起包咗紙嘅棒球，似乎示意我拎起頭先掟過嚟嘅波。





我照佢說話做，剛剛掟埋嚟嘅棒球同樣包住咗紙。我攤開，入面寫咗啲字：「自己一個人？你毒撚嚟架？」

「咩毒撚呀！你自己夠一個人啦！」我對佢大嗌。

話口未完，我見到佢校裙又揚起，再一次將粒波掟埋嚟。呢次我醒，直接用手接！然後我聽到蟲蟲好欣賞咁叫咗聲。

我攤開張紙，入面寫住：「想同我傾計就用我嘅方法。（掟返啲波比我啦，我呢度冇晒啦！）你喺度做甚麼呀？」

佢真係傻架，屌。





我喺同一張紙寫：「係你迫我同你傾計架喎！⋯⋯我喺度溫緊書，所以未自己一個人囉！」

然後我掟返個波埋去，佢輕輕一跳就接住咗。

蟲蟲好期待咁折開張紙，佢望到啲字之後笑咗出聲，然後重施故技，將寫咗嘢嘅紙包喺粒波度再掟過嚟。

今次力度冇咁似炮彈，我用手接都唔覺得痛。

「哈⋯⋯你啲字好核突，又寫錯!哈⋯⋯！你都唔似會溫書嘅人，估你唔到喎！」





我對住佢黑起塊面，字醜關你鬼事咩！

「係啊！你估唔到我架！仲估錯晒添啊！我唔係變態佬啊！」

一球去，一球返。

「你咁小器架！仲記住琴日件事！⋯⋯你塊面仲痛緊？你隻手點呀？」

然後我地咁樣用棒球去互相通訊，傾咗好多嘢。就好似剛剛相識嘅人，好好奇對方嘅一切咁。

原來蟲蟲啲人緣好差，除咗apple、冬冬佢地，基本上佢係冇朋友。

「朋友？食得架？我唔需要朋友囉。」字裡行間都睇得出佢嘅倔強：「班女仔成日講是非，煩到死。我先唔需要佢地。」

我只係同佢相識咗一日，而且咁多牙齒印，佢竟然講咗好多關於佢嘅事情，好似完全冇戒心咁。我不其然咁諗，一個人到底要寂寞同孤獨到咩程度先會同仇人做朋友呢？





傾傾下都唔知時間。而蟲蟲比我嘅感覺真係同琴日初初識佢時唔同。琴日嘅佢就好似生晒刺嘅仙人掌，又或者似一隻好惡嘅貓仔。今日隔咗條馬路，各自喺自己學校，蟲蟲好似變返正常女仔咁。

「你以後仲會嚟架可？」蟲蟲啲字唔止靚，仲有陣少女味，而且我更感到仲有一份期待。

「想溫書未會嚟囉。」

我將粒波掟返去，然後我又接返粒波。

「嗯！到時見啦！粒糖⋯⋯請你食嘅！」

今次粒波痴咗粒珍寶珠，係士多啤梨味。我望返去女校嗰度，蟲蟲好似等緊我望返嚟咁。

「Bye。」蟲蟲揮一揮手，就一跑一跳好愉快咁離開。





咪住先⋯⋯佢講到好似約實咗我聽日會見咁喎！

喂！我冇應承架！

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師