真人真事改篇﹕師生戀﹕《最接近的陌生距離》: 第二十八章之三

愉快嘅心情，係會令時間好快過，又到Lunch Time。

Miss係我嘅奇蹟女神，自從同佢一齊後就發生咗好多奇蹟。例如中文科進步咗、冇再欠交功課、冇再遲到同缺席⋯⋯一切一切旁人睇嘅唔止係奇蹟，仲係神蹟添。

而今日最大嘅奇蹟，就係可以好好咁享受Miss為我精心準備嘅Lunch Box呀！

為咗成件事望落去自然啲，當Lunch鐘響起時，我就第一時間去咗教員室等Miss。 而Miss亦都好聰明咁喺教員室門口等我，將叮好嘅飯盒收咗落紙袋入面。

「你嘅。」Miss遞咗個紙袋比我，佢眼神充滿期待。





「Miss, 我幫你拎啲簿上去課室呀。」

以幫Miss手拎嘢做掩飾去拎愛心飯盒，咁成件事望落去自然好多。

我同Miss並排咁行返課室，換係平時佢會搭𨋢返上去。不過佢今日太忙，喺學校除咗上中文堂，我同佢真係少接觸。所以我地又偷下時間暗中拍拖。

「其實呢⋯⋯我第一次咋⋯⋯」Miss收起嚴厲，腼腆咁講：「我係第一次幫男朋友準備午餐！」

呢下簡值甜到入心！佢以前咁多男朋友，冇一個試過佢手整嘅午餐！ 天啊！我真係太幸福啦！Miss嘅第一次！係我架啦！





「Miss, 你琴日返到去都已經十一點左右。咁你未⋯⋯」

「係啊！都⋯⋯搞咗好耐架。嘻⋯⋯」Miss怕怕醜醜咁講，佢好努力變返個威嚴樣出嚟，但佢阻止唔到嘴角邊嘅幸福甜：「⋯⋯好緊張添。唔知你鍾唔鍾意！」

「Miss！」

「嗯？」

「我⋯⋯」呢一刻我感動到唔想理身邊有同學老師經過，好想大大聲講愛佢。





Miss應該一眼睇穿我想點，佢即刻甜笑住話：「得啦！我知啦！你一日講十幾次啦！」

我笑一笑，諗下又係嘅。朝早返學講、放學又講，連Whatapps不斷轟炸佢我好愛佢。講到連Miss都知咩時候我係會發作。

「低B仔。」Miss：「我都係呀。」

「嗯！」我點一點頭。

返到課室，係我同Miss期待一刻！

踏入課室一刻，Miss又完全嚴厲起嚟。而阿偉亦幫手派完飯，Miss就宣布我地可以開餐。

「阿波呢？」我地四兄弟食飯一定會痴埋，但今日開始食Lunch，阿波都仲未見影。

「你唔知咩？」杰少古古惑惑咁講：「佢去咗『空中花園』呀。」





我即刻瞪大眼：「哇！嗰度呀？」

「空中花園」係位於舊翼中層嘅露台，大約有一個課室咁大。本來就光頹頹冇咩嘢嘅，但經園藝組打理後就變成咗個好靚嘅花園。但重點係咩？就係空中花園同女校嘅露天花園好近，只係隔咗一條馬路。歷年以來好多師兄想媾對面女校嘅女仔或者同對面女仔拍緊拖，都會去「空中花園」會一會佢地嘅愛人。

言下之意，阿波⋯⋯佢告別A0啦！

「Brother !」我地三個又做指定碰拳動作。

「我地敬波哥。」然後再扮奠酒姿勢

「敬波仔！」「敬肥波！」

「佢條女係咪就係⋯⋯嗰個肥妹仔呀⋯⋯叫咩名呢？」我。





「Apple!就係佢啦！」阿偉。

「係啊！」我諗一諗又講：「啊⋯⋯！唔怪得條死肥仔嗒晒糖咁啦！佢都幾快手喎！琴日啱啱識，今日就⋯⋯」

「嘿！」杰少一下冷笑就打斷我說話：「佢快？問過我未？」

「吓⋯⋯？！」我大吃一驚：「你又⋯⋯」

「Brother ! 」阿偉比出拳頭。

「Brother !」我同杰少跟機。

「喂！係邊個呀！一齊咗啦？」我好興奮咁問杰少。

「孖辮妹，冬冬。就琴晚走人時被我媾掂咗啦！」杰少好自豪咁講，我記憶中冬冬係啲得意妹，樣都唔差！





咁我地四條粉腸中有三個已經脫單，係得阿偉一個仲係單身，我頂一頂佢手踭，問阿偉：「咁你呢？智神應該唔愁冇女喎！」

「冬冬同我講，佢有個姊妹覺得阿偉好醒，好型。」杰少：「偉哥，使唔使幫你搭下路呀！」

「唔洗啦。」阿偉笑一笑：「我呢啲就無謂累人啦。」

我同杰少聽到皺咗下眉，只感覺佢呢句野話中有話。

= = = =  =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師