真人真事改篇﹕師生戀﹕《最接近的陌生距離》: 第二十八章之一

「你唔好誤會啊⋯⋯我⋯⋯我唔係對你有意思架。」蟲蟲表情腼腆咁講：「你頭先陪住我，我好想多⋯⋯多⋯⋯嗯⋯⋯！」將手中嘅珍寶珠再遞前一啲。

蟲蟲努力扮到唔在乎咁，以反叛嘅神情強行掩飾漸漸發紅嘅臉龐。但係佢愈係扮落去，佢就愈係腼腆。

蟲蟲愈腼腆就只會令Miss覺得我地係有嘢。

Miss一值都保持微笑，冇講啲咩，佢好似等緊我點去回應咁⋯⋯頂，呢個微笑好危險。只要我一做錯回應就一定慘過死！

粒波交到我腳邊要點踢好呢？我唔可以拖，愈拖就愈奶嘢，因為身有屎先會拖拖拉拉。但我又未諗到點做，咁惟有幫自己爭取下時間先。





「喂⋯⋯唔好玩我啦。係咪又整蠱我架？哈⋯⋯哈⋯⋯」

蟲蟲聽完，表現得有啲生氣，話：「喂！我一番好意喎！你咁樣諗我架！」

我見佢想收返份禮物但又舉棋不定咁，似乎係因為擺上咗面子又好難落台。睇嚟佢又唔似想整鬼我咁喎！所以⋯⋯

「多謝你！」我好爽快咁接收佢份禮物。

喺泛黃嘅街燈下，我見到蟲蟲好難得咁好真心咁對我微笑。





「嗯！我走先啦。Bye。」蟲蟲對我講完之後，就對住Miss鞠咗躬。然後佢就慢慢離開。

呼，起碼佢走咗令氣氛冇咁老尷先。

你可能會問點解我會接受呢份禮物？ 一來由活動結束到而家已經過咗半個鐘，蟲蟲頭先個表情又好真心。如果拒絕佢又真係好衰嘅。第二個原因係，我同蟲蟲事實係冇嘢架嘛，如果我拒絕呢份禮物未即係代表我身屎？！ 諗過度過，都係順其自然最穩陣啲。

最重要係，Miss係成年人，我覺得佢點都會成熟啲去諗我同蟲蟲嘅事。

蟲蟲離開嘅時候，我同Miss行緊去的士站，打算送埋Miss上車就返歸。





「請你食呀。」我遞枝珍寶珠比Miss。

「你慢慢嘆啦，人地專登送比你架。」Miss笑住咁揶揄我。

「做咩呀？你介意？」我趁住條街冇咩人，我地啲同學又走晒，而我著緊便服，所以決定拖住Miss隻手一齊行。

Miss笑咗聲：「你驚我介意咩？」

「驚架。我地咁難先可以一齊到。」我：「我唔想我同你因為一啲小事而出問題啊。」

「咁你要好好珍惜我啦！」Miss：「我唔識蟲蟲呢個女仔。但睇落佢應該都幾留意你⋯⋯」

然後Miss突然對住我瞇起眼，笑到成隻狐狸咁，好古惑咁講：「老實答我，你對佢做咗啲咩？」

哇⋯⋯！先係扮唔介意，然後等我放心再嚟一招回馬槍！點答呀? !





「冇呀！我整喊佢之後，我覺得自己好衰未陪佢行返落去禮堂囉！」定啲嚟，唔好口快快講揹蟲蟲落去⋯⋯仲有唔好提「面貼面事件」啊！

「你地真係冇做其他嘢？」Miss一面狐疑咁貼埋嚟。

「比佢咬囉！」我向Miss展示出仲痛緊嘅牙印。

「你一定仲有對佢做其他嘢！」Miss手指指咁指住我個鼻。

「我真係冇做其他嘢呀盈姐！」我投晒降。

「哼！佢由初初憎你、摑你到頭先等埋你，就係為咗送份禮物比你呀！一日之內就有咁大轉變⋯⋯」Miss突變掙脫我隻手，向前街咗幾步後就轉身嬲爆爆咁指住我：「唔准呃我！你有冇錫過蟲蟲？！」

痴線架咩！又嚟回馬槍？





「點錫呀？！」

「咁樣錫——」Miss忽然行上前——

嘖———！

女人呢⋯⋯好古惑，Miss又好，蟲蟲又好，佢地永遠都會對你做出意想不到嘅事。當我以為Miss要問責時，佢又突然錫埋嚟。仲要唔係青蜓點水咁錫，係好深情咁錫。我真係比佢搞到唔識反應！

「嘻⋯⋯低B仔。」Miss錫完我後抱住我面：「你睇下你個樣驚到⋯⋯哈哈⋯⋯好得意呀！玩你咋！」佢大大力搣咗我鼻一下。

「我地經歷過分手，好難先一齊返。所以我頭先真係驚架！阿盈！」我額頭輕輕咁擦Miss個額頭。

「嗯。」Miss點一點頭。當然以為佢收貨時點知⋯⋯

「講！點解頭先咁驚青！！係咪身有屎！！」Miss做返老師嘅角色指住我嚟鬧。





「喂呀，放過我啦!」我就嚟比Miss搞到喊出嚟。

Miss放聲咁笑，搣我鼻頭就話：「哎吔！真係好得意呀！哈哈⋯⋯得啦！唔玩你啦！低B仔，你知唔知一段關係要點樣先維持得耐？」

「係咩呀？」

「係『信』呀。」Miss兩隻手攬住我條頸：「我同Vick分手係因為我唔再相信佢。」

「嗯。」

「低B仔，我信你。」Miss甜笑，親我面一下，說：「雖然頭先我有比蟲蟲嚇親，我係擔心你地之間發生咗啲事。但係⋯⋯我信你！」

「嗯！」我笑住點頭：「我唔會令你失望嘅！」





Miss挨落我胸前：「你係一個願意守護住開始咗幾日感情嘅低B仔，所以我相你。」

「盈盈，我會好珍惜你。」

我抱住佢，再輕輕摸佢髮尾，感受佢啲髮香。我真係好幸運又好幸福可以有一位成熟、體貼嘅女朋友。

呢一刻，我同MISS唔理路人當中有冇我地識得嘅人。我同Miss只想好好享受得嚟不易嘅浪漫時光。不過呢一刻嘅浪漫好快就要結束。而終結個浪漫嘅人竟然就係Miss。

「啊——！」Miss忽然大叫，好似被嘢嚇親。

「咩事呀？」我周圍望，好驚係有熟人。

「你好似未交飯單喎！」

我怔一怔，心諗咁咋話！嚇得我呀 ！

「未呀！」

「一早叫你交架啦！」Miss嬲嬲地講，好似阿媽咁嘮叨住：「你聽日Lunch點算呀？你媽媽最近有冇比零用你？」

「冇呀。阿媽會一次過比一個月零用我。我就嚟用哂啦！」我停一停，再講：「Lunch呢啲好閒唧。挨下餓之嘛。」

「唔得！」Miss好用力搖頭：「點可以餓住個肚返學架！」

「你心痛？」

「哼！咁大個仔要識照顧自己呀！」Miss：「我幫你諗掂佢啦！剩係今個月架咋！」

然後我地抱多一齊，我就送咗Miss上車了。

= = = =

夜深，我躺喺床上。

閉眼入睡前，眼簾裡漆黑嘅視野最容易彰顯出最掛念嘅人——Miss。 佢嘅倩影、佢嘅說話喺寂靜中盤旋喺我腦中。

然而，有一個瞬間。

教室裡的Miss切換成黃梓盈的一瞬間。

喺呢一個瞬間，我見到一雙淚眼閃過。然後我再聽見苦苦哀求嘅聲音，激起我內心嘅情緒。

烙喺我手臂上嘅牙印又隱隱作痛。

= = = =  =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學