真人真事改篇﹕師生戀﹕《最接近的陌生距離》: 第二十七章之五

「喂⋯⋯！你個痴線妹呀！」我被呢下突擊嚇到唔知反應！只知道佢唔只用外套包實咁我個頭，仲綁咗個結。一腳伸開我之後，我就聽到好急嘅跑步聲。乍聽之下，佢應該去緊七樓美術室！

「你咪比我捉到你呀！痴線妹！」

我幾經掙扎之後，終於解開咗個結，除低咗佢件外套。就一個快身衝上去七樓！我穿過走廊，再經天橋，去到新翼！呢個時候，我聽到美術室有啲雜聲，我見到美術室開咗燈，地上面有晃動嘅人影。我悄悄咁行去門口時，見到蟲蟲搵緊放喺美術室嘅寶物！

「搵到啦！」蟲蟲滿足笑。

但佢笑得唔耐，因為「啪——！」一聲，成間美術室黑晒！





「啊——！」佢尖叫咗聲，成個人蹲低咗。聽聲⋯⋯佢今次應該堅驚！我估係因為佢冇預到我會咁快嚟，即係話⋯⋯佢係驚緊「中七師兄斷頭鬼故」啊！

搞鳩我咁過癮呀嗱！

我悄悄咁爬入去，佢一定唔知我入咗嚟。而家佢喺正美術室嘅中央蹲低抱住咁個頭。我好似貓咁既快又輕地行，期間仲得登掃低啲雜物。

啪——！

「邊個！」蟲蟲望咗過嚟：「喂呀！唔好玩啦！」





我即時潛咗落枱下面。因為環境太黑，加上美術室係用唔透光嘅窗簾，所以冇街外燈射入嚟，成個美術室基本上係伸手不見五指。蟲蟲啲呼吸聲愈來愈急，佢應該真係驚，佢驚到腳都震晒，唔敢行埋嚟，只係慢慢咁起返身。

我繼續繞到佢身後大約至兩米嘅距離，然後發現到兩件好有趣嘅嘢——

一件外套同一個人頭模型。

我阻止唔到內心嘅邪惡，嘴角已經揚起微笑。

呢個時候，蟲蟲終於鼓起勇氣，慢慢行返去出口。





崩——！蟲蟲右邊有雜物落咗落嚟！成功吸引到佢注意。

然後我一手碌個人頭出去，個人頭慢慢咗滾到佢腳邊。

當蟲蟲感覺到有嘢掂到佢左腳時，佢好戰戰兢兢咁望向腳邊⋯⋯

「啊———！」

蟲蟲見到個人頭模型之後就即刻嚇到尖叫！腳軟！

「比返個頭我！！」我突然出現!呢個時候我著咗件外套，拉起拉鏈，將個頭攝埋落個外套入面。望落去真係好似冇咗個頭咁！

「哇——！」

蟲蟲嚇到尖叫，抱住個頭，擰晒頭咁!





呢次仲唔係我羸？!

我見到蟲蟲嚇到個表情扭曲，冇晒儀態，一邊大叫，大邊擰頭。我就慢慢行埋去，就好似喪屍咁想撲埋去，點知……

噗——﹗﹗

「嗚!!!」

係我痛到叫唔到! 我本能反應掩⋯⋯掩住個春袋，然後跪低咗。

我睇唔清蟲蟲個樣，但聽佢亂晒嘅呼吸聲可以知，佢驚到失晒控，本愈之下亂咁打人，就一嘢踢中我個春袋！

蟲蟲見我咁慘都唔打算扶返我，一個轉第就想走！走？邊走得咁易？





我拾起個人頭，睇準蟲蟲行緊嘅時候，將人頭碌出去！就喺佢提起腳嗰下，佢就踩中咗個人頭！

「哎呀——！」蟲蟲叫咗一聲，然後就踩咗個波車，成個人失衡跌低咗！

啪——！一個屁股鄧咗落地！

「哎——！哇——！」佢嘅痛叫雖然好細，但聽得出佢係痛到叫唔到。

呢個時候我同佢都兩敗俱傷！兩個人都暫時起唔到身。喺地下痛叫連連。

過咗一陣，春袋嘅劇烈痛覺慢慢消失後，我撳住枱角慢慢起身，再除咗件外套。

「痴線妹！今日我遇到你真係黑仔呀！」

我一拐拐咁行埋去佢度，見到佢痛到標晒眼水，面容扭曲，我個心就涼晒！然後我搵到美術室嘅寶物，再對佢話：「你慢慢喺度坐啦痴線妹！」





然後又一拐拐咁行去出口。

「喂！」蟲蟲叫住我：「你真係走呀？」

「係呀！痴線妹！無頭師兄過嚟搵你呀！」

「唔准走呀！我⋯⋯我⋯⋯今次真係傷咗呀！」蟲蟲哀求我：「我隻腳扭親呀！最衰都係你呀！係你整到我咁架！你要負責呀！」

「咁我第三隻腳又點計呀？」哎呀⋯⋯仲係好痛！

佢又扮可憐咁氹我過去，擺明想陰多我一鑊！呢次我冇咁易上檔呀！

「唔准走呀！我⋯⋯我怕黑架！我怕自己一個人呀！」蟲蟲用把喊聲同我講：「我真係怕黑架！」





「咁你又自己上到嚟！」

「我頭先開燈架嘛！你一入嚟就熄燈嚇人。」蟲蟲開始急到想喊：「你都整返我啦！打和啦！咁得未呀？」

「今日我俾你摑又俾你踢春袋，想就咁算？！痴線！」

「你⋯⋯你⋯⋯！ 你真係好Cheap呀！賤人！賤人！賤人匡！！」蟲蟲原本扮cool嘅外表慢慢崩潰，感覺就好似個細路女咁求大人幫佢：「由得我喺度！賤人！賤人！賤人！！」

「搵鬼信你呀！慢慢嘆啦你！痴線妹！」

「喂⋯⋯！喂呀！賤人匡呀！唔好走呀！」

卡嗒——！？我走出美術室，仲好有手尾咁閂埋度門。

當度門一閂埋嗰刻，蟲蟲嘅喊聲好似解除咗個限制咁喊得好慘好凄厲！

「哇⋯⋯！我冇呃你架！我真係怕黑架！嗚⋯⋯！」

「唔好掉低我呀⋯⋯嗚⋯⋯」

「哇⋯⋯個個都咁對我⋯⋯嗚⋯⋯我冇講大話呀⋯⋯！」

「好驚呀⋯⋯！好黑⋯⋯⋯嗚哇⋯⋯好驚⋯⋯唔好傷害我⋯⋯」

「⋯⋯唔好困住我呀⋯⋯對唔住呀⋯⋯」

「⋯⋯我唔敢啦⋯⋯以後唔敢啦⋯⋯嗚⋯⋯唔好呀⋯⋯嗚⋯⋯」

「⋯⋯唔好打我呀⋯⋯我唔敢啦⋯⋯」

「⋯⋯我知錯啦⋯⋯嗄嗄⋯⋯對唔住⋯⋯嗄⋯⋯」

「嗄⋯⋯嗄⋯⋯⋯好黑⋯⋯好黑⋯⋯嗄⋯⋯唔好走⋯⋯」

「嗄⋯⋯⋯嗄⋯⋯唔好⋯⋯嗄⋯⋯得返我一個⋯⋯嗄⋯⋯」

聽到呢度，我再行唔到落去，細細講句：「我頂。」

喊到咁慘，我真係心硬唔嚟。而且佢把聲開始弱⋯⋯死啦！會唔會出事架？！

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師