真人真事改篇﹕師生戀﹕《最接近的陌生距離》: 第二十五章之六

「子匡媽咪你好，我係班主任Miss Wong⋯⋯」繁忙嘅急症室中，Miss嘅甜笑、親切嘅聲音特別出眾。

到咗急症後Miss不斷打電話比我父母，終於幾經辛苦之下⋯⋯Miss都係仲未搵到我阿媽。

不過我唔意外，父母佢地為口奔馳，唔肯過嚟係意料之事。此時，我回憶起頭先程車入面，當我講出自己感受之後，Miss好快咁放開咗我。嗰下我成個人冰封咗直到而家。

「⋯⋯唔使擔心，我而家陪緊阿匡喺醫院驗傷。稍後會同佢去警局落口供。你而家會唔會過到嚟？你聽到呢個口訊之後請快啲覆我電話⋯⋯」

我分唔到Miss呢一刻咁努力去幫我係因為我係佢學生，定因為我係阿匡？





「仲未搵到你媽咪呀。」Miss坐返埋，嚟時疲態盡現。

我：「我都慣晒。手停口停嘛。」

Miss眉頭一鎖，就話：「咁惟有搵你爸爸先。」Miss喺手機搵爸爸嘅電話。

我忍唔住偷偷咁望住Miss個電話簿，我見到有個名令我好驚訝！

「老公」，然後旁邊嘅係——我個電話號碼。





呢個時候我個心好似被啲嘢喚醒咗，開始跳得好快。我好似有返啲希望，但伴隨住希望嘅⋯⋯竟然係嬲？？？

呢個女人究竟想點架？

= = = =

由於急症室人流多，而我又唔係緊急Case，所以一等我就等咗六個鐘，時間已經係晚上八點。

喺呢六個鐘入面，我同Miss甚少交流。有時會見到佢聽住電話喺我眼前來回咁行。我聽到嘅大概都係同上司匯報我個狀況、同社工交換下情報、問下社工點做，同埋搵我老豆老母。





係，老豆老母佢地電話仲未打得通。

Miss又坐返埋嚟，嘆氣：「等咗好耐添！你肚餓未呀？呢個鐘數你應該食晚飯掛？」

「冇人煮晚餐比我，有時我會唔食。老豆老母開工，照顧唔到我。所以你都唔洗再搵佢地。」

「唔係架，我責任上一定要搵你爸爸媽媽⋯⋯sorry，你等一等。」Miss講到一半，電話又響，佢接咗之後就話：「⋯⋯未搵到佢父母。你想過嚟接力？唔洗架啦，我想跟返自己班學生⋯⋯」

跟返自己班學生⋯⋯跟返自己班學生⋯⋯跟返自己班⋯⋯

我係佢班學生⋯⋯學生⋯⋯學生！

我見到Miss收咗線後，我問：「黎Sir？」

「係呀，佢話想嚟接力睇住你。我話⋯⋯」





「跟返自己班學生嘛！」

Miss笑一笑，話：「呢度咁嘈都聽到嘅？」

「Miss, 我想問一下。」我發現自己內心嘅不滿慢慢膨脹。

「嗯，你問呀。」

「今日你好落力幫我，係因為我係你班嘅學生？定因為我係你嘅低B仔？」

剎那間，四周沒入一片寂靜。等待緊Miss嘅回答時，我好似剩係聽到我同Miss嘅呼吸聲。

一秒、兩秒、三秒咁過去，Miss仍然呆呆咁望住我，佢全完唔識答，反而令我個心更痛⋯⋯更痛⋯⋯





「好難答咩？你好似頭先咁樣答黎Sir我係你班學生未得囉！」

Miss依然唔出聲望住我。

「點解要諗唧？你自己都有答案架嘛！我係你學生咋！！」我內心不滿漸漸具體起嚟，係一種悲憤：「你索性答我係你嘅學生，我會舒服好多架！」

我吸咗一口大氣，忍住眼淚，再望住Miss。

「Miss, 我係有感覺架！」

「我！係！有！感！覺！架！」

我撐唔到落去，好想即刻走！但偏偏呢個時候⋯⋯

「謝子匡請到四號房見陳醫生。」





而家先輪到我！

「行啦。」

Miss好淡然地講，就陪我去見醫生。 
 
 = = = = 

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師