真人真事改篇﹕師生戀﹕《最接近的陌生距離》: 第二十五章之一

「放開我！」我不斷掙扎。

「死狗公，放開我啊！！」我力竭聲嘶咁大叫！

我感到我已經成為咗全校嘅焦點，成個操場就好似個舞台咁，睇住我同周Sir上演緊一場鬧劇。

「你知唔知今日係咩日子啊！」周Sir將我個頭撳咗落燙辣嘅操場地：「今日有校外人黎！即刻同我冷靜！」

今日係聯校家教會到訪，嘉賓應該差唔多到。所以周Sir而家非常之焦急。





佢今日就好似啲政府場合嘅保安隊長咁，如果出咗咁大壇嘢，佢一定要揹鑊！所係我反擊嘅機會到啦！

.

惟一一次嘅反擊機會！

.

啲家長未到，唔可以咁快被周Sir收檔！如今之計，惟有拖一拖先！





我目擊到啲老師仲未黎齊，冇咩人可以支援到佢。啲師奶Miss更加唔會幫手撳低而家發晒癲嘅我！

所以——！

「仆街啦狗公！」

我向上鬆肘，正正打中周Sir臉骨，聽到佢痛叫嗰下，我個心舒暢到不得了。周Sir被我打咗下，佢對我嘅制肘都鬆咗，就係呢一瞬間我已發力衝向肥B度！我要搞到成件事有咁混亂得咁混亂！

「⋯⋯唔⋯⋯唔好啊！」肥B見我兇神惡殺咁衝過黎，佢招架唔住，避無可避之下正面又食咗我一拳。佢失衡跌低，我再擒上去揪佢食領狂打！





「哇———！唔好——哇——對唔住呀！匡哥！唔好打呀！」

「雞呀啦！雞呀啦！雞呀啦！」我一拳一拳咁發洩落肥B度：「黑社會！垃圾！你大佬呢！垃圾！」

我打到成個拳頭都係佢啲口水同血，我舉起拳頭準備再黎一擊時——

「阿匡！停手啊！」一把女人聲令我動作遲緩，同時令我分神咁望向前面，我從模糊嘅影像中見到一個焦急嘅身影奔跑過黎。

「Miss?」我回復返少少理性後。見到佢非常焦急。

「唔好打呀！即刻停手！」Miss。

喺呢個分神嘅瞬間，我跨下嘅肥B順利掙脫，一邊大叫：「阿Sir! 救我呀！佢痴咗線呀！佢打到我咁呀！」佢跑咗去圍觀緊嘅老師嗰邊！佢扮成受害人咁叫：「快啲上去三樓男廁！我有兩個朋友比佢打死咗呀！」

部分老師即時上咗去三樓男廁。





「你要同Miss道歉——唔？！」當我要力竭聲嘶咁怒斥肥B時，我突然呼吸困難！係周Sir從後鎖我頸，再用警察常用嘅方法將我制服喺地！
=  = = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師