真人真事改篇﹕師生戀﹕《最接近的陌生距離》: 第二十四章之七

星期四。

今日係聯校家教會參觀探訪活動。除咗要求啲老師嘅衣著轉晒正式嘅suit外，亦都洗咗太平地，大規模咁捉學生髮飾校服儀容。我嚇咗一跳，冇諗過學校咁重視。當然，我又被周Sir捉到正，由朝鎖咗喺「臭格」度，睇怕我都會比人鎖到放學。

我被周sir剝奪咗讀書權利足足有一星期，老豆老母日返兩份工，佢地都想黎學校投訴，但無奈佢地最後都揀咗搵食，就叫我忍耐下。老實講我唔怪佢地嘅，鬼叫屋企窮咩。

而Miss⋯⋯佢今日終於有返。

提起佢⋯⋯原來分咗手一星期。我唔敢講自己已經適應左。因為提起佢時嘅情緒好複雜亦好矛盾。佢點解會請假唔返學？因為學校啲傳言？





差唔多Lunch，「臭格」度門傳咗下敲門聲，隨即有人入咗嚟。

「班長。」Miss, 佢用老師身份叫我。

「Miss。」我用學生身份回應佢：「你而家先黎睇我嘅？」

我打趣咁講。連我自己都驚訝，呢份虛偽竟然可以黎得咁自然。而我比較驚喜嘅係佢終於有返學。

「Sorry呀。」Miss笑一笑，係一種老師對學生嘅寬容：「我知你辛苦架喇。今日我黎係想同你跟返中文嘅課堂進度。不過開始之前，Miss想讚下你先！你好乖呀，你已經清晒所有科嘅功課啦！其他科任老師都讚你進步咗好多。呢個Miss獎你嘅！」





然後佢擺咗盒糖喺枱上面。

「拎本中文書出黎，我同你講下我教到邊。」

「喺開始前，Miss，我都有嘢想同你講。」我開始扮唔到落去。

「嗯？」

「呢三日你冇返學，你冇事嘛？」我。





「冇事冇事。」Miss繼續用老師身份同我講：「我地開始啦！」

「係咪關啲流言蜚語事？」我感覺到我個表情開始慢慢變沉：「話你同周Sir啲⋯⋯流言。一啲傷害緊你嘅流言。」

Miss定一定，然後又擺出老師嘅微笑：「學生唔需要知咁多喇。我地快啲開始，就放Lunch啦，我仲要管住班馬騮食Lunch架。」

我⋯⋯我實在扮唔到落去！

「咁你而家走啦！即刻返上去課室！」

Miss呆左下，佢應該預唔到我會有咁大反應。

「我都喺度一星期啦，有啲咩係唔慣架啫？」我努力去忍耐住：「我已經冇咗你一星期喇，咩都應該慣晒啦！我被人打都打到慣晒啦！」

Miss慢慢收起佢扮出黎嘅微笑。





「我日日坐喺度，你知唔知呢間房唔隔音架？你同事喺隔離房話你，我全部聽到晒架！我仲點可以喺呢一刻做返你嘅學生呀？」我好想大大聲怒吼，但仍然好努力壓抑住：「阿盈！我係有感覺架！我冇可能而家喺你面前扮冇嘢架！」

Miss繼續唔出聲，我已經對住佢灰到一個點。

「你唔見咗三日，難道我真係唔在乎咩？」我慢慢變得懇求起嚟：「Whatapps唔覆我。我又唔可以問你啲同事。我每日都要估你發生緊啲咩事。我每日要驚你比隻狗公騷擾。我仲好掛住你，因為⋯⋯因為⋯⋯」

我將個頭放得好低，盡力細聲啲去講：「因為你揀咗喺我最愛你時候分手啊！」

分手呢個字我讀得特別咬牙切齒。

我冇辦法大聲講，我只好將聲嘶力竭嘅力量轉化咗為傷害自己動力，用力咗咬自己嘅嘴唇，幾乎要咬出血嚟。

我睇唔到Miss而家嘅反應係點，亦都唔知佢諗緊咩，我只想將呢一星期嘅感受話比佢知。





「我真係寧願你討厭我，當我唔存在。但你若無其事咁做返我個老師，我⋯⋯我好辛苦啊！」

我頂唔順，情緒已經到咗臨界。我冇理Miss佢點樣，我就奪門離開！一枝箭咁跑咗去男廁。
= = = =

沙————！

洗手盆注滿咗凍水，我成個頭浸落去。想用冰冷嘅感覺將我情緒降溫。

我抬頭望鏡中嘅自己，回想頭先我對Miss發脾氣，但我心中鬱結冇因為咁而解開。喺我心煩意亂嘅時候，我見到鏡中有個倒影慢慢喺我背後出現。

「咦？又見到你呀匡哥？」
= = = = 

ar_hong_91





#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師