真人真事改篇﹕師生戀﹕《最接近的陌生距離》: 第二十三章之三

黎Sir知我今晚老豆老母要開工搞到冇飯開，佢就車我去食好嘢，佢好人到話呢餐係佢請。喺坐車嘅過程中我同佢好好傾，原來呢個傻佬平時正正經經，戇戇居居咁，但鍾意嘅興趣原來同年青人好相似！

「咩話？！你都鍾意高達？！」

「有男人會唔鍾意架咩？」

佢竟然認識「高達」呢個國際男人語言⋯⋯唔止添！佢仲鍾意幪面超人啊！雖然佢鍾意昭和時代嘅超人，我就係平成超人嘅鐵紛，表面睇係有啲代溝架啊！但因為我同佢興趣係一致，我竟然同呢個傻佬一下子就做左無所不談嘅朋友！

更令我意外嘅係，黎Sir原來係攝影高手，仲要係玩最燒錢嘅鳥攝啊！





「一支500mm鳥攝鏡成⋯⋯成三皮嘢架喎！」

「哈⋯⋯哈⋯⋯係架，所以我好窮架！」黎Sir:「我車尾箱就放左部機同鏡，要唔要感受下鳥攝個威力？」

「好啊——！」我兩眼發晒光。

講講下，我地又喺紅燈前停低。我地本來傾打機、攝影傾到慶慶地，但就被路邊嘅嘢吸引住。

「黎Sir你睇下！」我指住遠處路邊嘅車，話：「架車咁熟嘅？好似係⋯⋯周Sir架喎！」提起仇人，我就開始燥底。





「係喎。」黎Sir好平淡。

我再望下街邊情況，竟然比我發現佢泊左喺時鐘酒度附近！言下之意，條狗公一定又走去爆房！

佢今次爆房嘅對象係邊個呢？隔離校嘅學生？金髮外藉老師？定係⋯⋯Miss?

痴線！唔好亂諗嘢！Miss憎到佢死，又點會咁做！

呢個時候黎Sir開車，當行駛到時鐘酒店時，我見到有個男人攬住條女行緊出黎。但我睇唔清楚男人個樣，只係知個身形好似周Sir！





「黎Sir 揸慢啲！」我已經準備好手機。如果我捕得到佢，咁我就可以收佢皮 ！

「慢啲呀！好似係周Sir呀！」

但黎Sir冇咁做。

「大人嘅嘢你唔好理咁多啦。」

我嗤左一聲，有啲不滿

黎Sir愈走愈遠，倒後鏡上疑似周Sir嘅身影亦愈來愈細。

= = = =

Whatapps





「阿盈⋯⋯」22:00（雙灰剔）

「我做晒今日嘅功課啦。我冇鬆懈到呀！以後都會交齊功課！」 22:01 （雙灰剔）

「其他科我都會追返上黎。我應承你嘅嘢，我一定要做到。即使已經同你分咗手都好，我都會守住個承諾。」 22:04 （雙灰剔）

「我會繼續聽你話，會學識控制情緒、唔再衝動，我會大個仔架啦！」 22:08（雙灰剔）

「阿盈，其實我唔相信我地咗咁就完咗。你係咪有苦衷？」22:10 （雙灰剔）

「阿盈⋯⋯」22:10 （雙灰剔）

「我仲好鍾意你。」22:11（雙灰剔）





唉⋯⋯

= = = =

一早起身，我第一時間Check whatapps 。值得高興嘅係，我send 比 Miss嘅msg都雙藍剔左。雖然佢冇覆，但起碼佢知我諗緊咩。

但係今日又點會係順利嘅一日？一返到學校校門口又見到面目可憎嘅周Sir。今次我望都廢事望，直行直過。但條撚樣硬係要撩我一兩句，而且佢嘅說話係直接衝擊我個理智。

「失戀呀？」

本來我已經行過左佢，都比佢呢句叫停左。我回頭望佢，佢一面滿足同囂張。

佢慢慢行黎，嘲笑住講：「真係慘，成個人頹晒。」

我有萬般嘅不解，分手係我同Miss嘅事，佢點會知架？啊⋯⋯係啦。琴日Miss同副校長傾左陣，應該係傾我同Miss嘅事。雖然副校長信我同Miss係清白，但我估副校長要求Miss同我保持距離，所以Miss先決定同我分手。而周Sir應該係從副校長知道咗呢件事，所以佢就估到我地已經分手。





不過，其實都唔洗估，睇我今日呢個樣都知咩事啦！

「琴日做唔死你兩個，但搞到你地分手，唔錯啊！」佢一面得戚囂張。

我攤一攤手：「仲好添啦，你永遠都唔洗查我同Miss啲嘢。你慳啲啦！」

「我要搞死你兩個有好多方法嘅。」

我廢事再同佢嘈，佢以一個勝利者姿態咁望住我走。但我走唔夠幾步，忽然諗起啲事，忍唔住要同佢講。

「周Sir, 下次泊車唔好亂咁泊喺街。特別喺啲唔正經嘅地方出面。」

「哈哈⋯⋯！」周Sir冇比我激親，反而開懷咁笑：「係呀？」





雖然串佢就冇咩用。但起碼拎個尾彩，我條氣順返少少。只係佢笑得令我有啲唔舒服。

喺返上去「臭格」之前，我特登走左去校務處扮拎嘢。事實上想睇下教師缺席表，睇下Miss有冇返學。

結果⋯⋯Miss有返學呀！

嗯，一個好開始。

= = = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學