真人真事改篇﹕師生戀﹕《最接近的陌生距離》: 第二十三章之二
「⋯⋯你知唔知呀？學校可以將功抵過架。幫自己搵多啲小功返黎，咁你積落嘅缺點、小過、大過呢啲就慢慢咁抵消返晒架啦！嗱，我有個方法，你睇下得唔得啦⋯⋯」
我坐緊黎Sir車，只係短短車出校門路程，佢已經可以不斷咁對我進行精神轟炸。係！黎Sir真係好好人，但佢實在太煩，太膠啦。
坐喺助手席嘅我完全冇心機聽黎Sir嘅幫我大計，我剩係目光呆滯咁望住車外景色遊移。
就好似走馬燈咁。
.
「我地分手啦。」
.
個世界又得返Miss同我講嘅最後一句說話。
「喂，阿匡。你冇事呀嘛。」黎Sir緊張嘅聲音，將我從思念中拉返嚟現實。
呢個時候我地架車原來已經停左喺紅燈前，黎Sir拎左張紙巾比我，話：「做咩無端端喊呀？」
原來我自己喊左都唔知。
「唉！傻仔黎嘅，記過好閒架咋！你肯改嘅，真係過眼雲煙咋！又唔係留案底，唔怕喇！」黎Sir唔知我喊緊咩，不意外，佢又繼續發表偉論：「嗱，聽我講。我安排你見下社工吳姑娘啦！佢有好多義工活動架。完成一個活動，我記你一個優點，三個優點就一個小功⋯⋯」
佢繼續叭喇叭喇有佢講冇人講，我終於忍唔住講句：「黎Sir, 其實你係咪唔講嘢會死架？」
「係啊！」
我頂你呀，你夠膽死答得咁爽快？
呢下我真係比佢激親，我又話：「其實你係咪唔係好識感受人地嘅感受架？」
我應該講中左佢，佢遲左兩秒先講：「點解咁講呢？」
「你見到我而家呢個樣，真係會因為記大過而喊咩？」對住呢個傻佬，真係乜眼淚都慳返。
黎Sir開車前望左我一眼，話：「你仲有嘢要煩架咩？」
我反左白眼，話：「黎Sir, 你失過戀未？」
黎Sir個戇樣傻笑左一下，佢副厚鏡片眼鏡令佢添更多傻氣：「嗱⋯⋯見係你。唔好同人講⋯⋯我連女仔手都未拖過！」
「What the⋯⋯」我真係比佢突擊，但好快又覺得好合理，我話：「咁就真係唔怪得你，你根本都唔知咩叫失戀！」
我再指住自己話：「望清楚咩叫失戀啦！」
講完我又望返出車。我以為黎Sir被我收左皮，但佢好快又話：「唔係呀，我知失戀係咩感覺架！」
「你冇戀過，點失呀？」我冷笑一下：「咪吹水扮Fd喎。」
其實我咁講有啲冇禮貌，但黎Sir又冇咩所謂，只係笑一下，話：「失戀個感覺就好似個心穿左個窿咁囉，唔止痛，啲風好似不斷吹緊入心咁，好凍，點避都避唔到。會無端端自己流眼淚，但明明心情冇特別差，甚至可能你開心緊或做緊你鍾意嘅嘢。」
我有啲驚訝黎Sir形容失戀嘅感覺咁真實⋯⋯係我而家嘅感覺。
「估你唔到喎黎Sir。」我好奇咁問：「你究竟係點樣喺冇拍過拖嘅情況下感受到失戀架？」
我竟然唔怕佢長氣，想聽佢嘅故事。
「失戀唔一定要拍過拖先感受到嘅。真心愛過一個人，你都會感受到。」黎Sir:「我之前有一位由中一就識嘅女性朋友，我地一直同班到中學畢業。我同佢太老友嘅關係，其實中學時代真係對佢冇意思。但緣份就係比你第二次機會，我同佢去左同一間大學，讀同一科。嗰時我就鍾意佢。但我份人真係太老土，我覺得要出黎做左嘢先可以正式追人⋯⋯」
「唉，你真係戇居！」我忍唔住指住佢黎笑。
「係啊！好戇居架！但喺大學嗰幾年，我同佢嘅關係好好，然後發展曖昧關係。我地成日出街，會關心大家。會互相呷醋、嗌交。其實同情侶一樣，但就係差我嗰一步。」黎Sir嘆左口氣：「到出左身之後，一切都變晒。佢同左佢上司一齊，而佢冇打算一開始同我講佢已經有男朋友。當時我唔只覺得失去左識左十年嘅朋友，個心好似穿左個窿咁。然後我就一直頹到而家啦！哈哈哈⋯⋯！」
佢好少有地講嘢咁有吸引力。或者，我感受到佢明白我呢刻嘅難受。諗諗下，我又不自覺流緊眼淚。
「一齊左好耐？」黎Sir揸緊車講。
「兩星期都唔夠。」
「第一次？」
「嗯！」
「哇！好傷。我明白。」
「咪吹水啦。你一定覺得我好幼稚兒戲，兩星期貨仔有咩感情可言。」
「唔係架！就算係愛得嗰一秒，到失去時都好痛架。」傻佬呢句說話直接打左入心：「兩星期⋯⋯夠架啦。」
原來被人明白個感受真係好舒服。呢刻我有少少愧慚自己成日笑佢係傻佬。
「阿Sir, 對唔住。」
「做咩呀。」
「我以前對你好冇禮貌。上星期三同埋琴日你幫咗我好多，我都未同你講多謝。」
「你都傻嘅！我係你嘅老師嘛！保護你同教好你就係我個責任！」啲人話熱血嘅人係傻傻地⋯⋯唔係，唔可以咁講。
傻傻地嘅人，通常都有一份單純嘅熱血。
黎Sir唔再係傻戇咁簡單，佢好似日本啲熱血漫畫跳出黎嘅大哥人物。係差個夕陽喺背景，如果唔係就fit晒。簡單嘅對話，我對位呢老師嘅觀感改晒。佢都成功開解左我失戀嘅情緒，成個人有返少少感覺。
不過⋯⋯同情敵講自己失戀個感覺都幾奇怪。
「咁你有咩打算呀？追返人？定係算數啦？」
「算？」我搖頭講：「我係唔會就咁算數嘅！」
「好事啊！咁你知點做啦，最緊要呢點！」
「我打算繼續守住我同佢嘅約定，我要大個仔啲。我希望佢會知道我仲未放棄！」
「Very Good！ 男人就係要咁樣戰鬥到底！黎Sir撐你！」黎Sir笑住咁開車：「你唔知我係點樣喺失戀中振作架？」
「點架？」
「睇得起自己！好好咁令自己變強！」
「打機咩。」
我笑左一下，但諗落有啲道理。
所謂變強⋯⋯就係長大吧？
就算Miss決心離開我，我都唔可以自暴自棄。
失戀⋯⋯或者係一個令我成長嘅契機。
= = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學 #女教師