真人真事改篇﹕師生戀﹕《最接近的陌生距離》: 第二十二章之五
氣氛又變返平靜時，Miss抹一抹啲眼淚，就話：「鍾副校。」
「Miss Wong咩事呢？」
「頭先謝同學講得啱。周Sir佢公報私仇。」Miss:「仲要遷怒我學生，令佢受不公平對待。」
周Sir好想怒吼，但礙於形勢，佢只可以啞忍。
「點解咁講？」
「你地都知，好多老師都知。喺開學初期我同周Sir嘅關係。」Miss每一句都好似充滿怒意咁，佢話：「冇錯，我同佢有短暫嘅曖昧關係。但當我知佢有老婆時，我已經劃清界線。冇再同佢有工作以外嘅瓜葛。」
Miss抖一口氣，又講：「但係周Sir並冇比返空間我。佢透過唔同方式去表達佢想追求我。仲不惜要同老婆離婚都要同我喺埋一齊。」
副校長用懷疑嘅眼神望左周Sir一眼。
「佢近排嘅接觸甚至可以用滋擾去形容！包括佢以權謀私，將我調離我熟悉嘅工作，再將我編埋同佢一齊做嘢。方便佢可以長期同我接觸。而且⋯⋯」Miss停一停，個樣變得愈來愈嬲，就話：「行山嗰日，佢冇經我同意就觸摸我身體，包括搭膀頭、掃腰同摸背。佢仲帶我去見佢嘅朋友。佢啲朋友仲言語性騷擾我。」
成間房嘅氣氛比Miss嗰種沉靜又帶有濃濃怒意嘅氣息所改變，嗰日嘅事搞到Miss好嬲，佢等咁耐就係等今日出招。就好似boxing咁，你以為你出拳進攻好有利？其實好多破綻。周Sir應該估唔到佢唔單止要二打一，仲要比Miss呢招重拳直接Ko！
不過以周狗個性格，佢一定點都為自己拎返面子。
「Miss Wong唔好信口開河。請你提出證據。」
「你日常Whatapp已經有紀錄。而你用職權去方便接觸我，一方面學校行政係有紀錄我嘅工作更替另一方面你咁樣做已構成性騷擾。」Miss面無慍色，但說話啲殺傷力就好勁！
「咁掂你、掃你背呢啲呢？有冇人證呀？」周Sir仍然囂張自大。
「有，人地男朋友嘛？」我喺旁邊講：「可能除左見到你輕薄人地女朋友，仲聽到你啲朋友點樣言語性騷擾Miss，仲有——」
.
「——佢男朋友一定聽到好多花生嘢！」
.
周Sir咬牙切齒，但佢嘅怒氣無從發洩！因為嗰日佢朋友講嘅咁係足以令佢收皮。任佢權再大，副校長應該都接受唔到佢搞埋隔離女校嘅Miss。
呢個時候我好淡定又得戚咁望住佢。佢從我表情應該意會到我將同Miss嘅秘密同佢星期六嘅衰嘢綑綁埋一齊，你想我自爆同Miss嘅關係同時，我都要爆你搞隔離女校嘅Miss。
周Sir繼續嬲到冇嘢好講。Miss繼續出招：「我懷疑行山當日，周Sir誤會謝同學係我男朋友。佢求愛不遂，就遷怒於謝同學。琴日仲用佢嘅權力點都要記謝同學小過添啊！」
Miss既嬲又冷靜咁講：「鍾副校，今次呢件事係好無謂。我同謝同學係清白嘅。反而，周Sir對我嘅滋擾⋯⋯鍾副校長，你認為呢？仲有，我一定要為謝同學攞返一個公道！」
副校長諗左一陣，就話：「你被懷疑性騷擾嘅事，可以向平機會求助。校方會全力協助你。至於謝同學件事⋯⋯我安排黎Sir負責重新調查件事。再重新考慮個罰則。兩個小過暫時唔記住。」
聽到之後，我同Miss開心咁對望一笑。呢次雙打真係好險！
「謝同學同周Sir出返去先。我同Miss Wong仲有嘢要傾。」副校長。
Miss喺我起身走之前，對我輕聲講左句小心啲，我就離開副校長室。但走唔夠幾步，我被人好用力咁推埋牆。
當我搵返焦點時，我見到周Sir怒到又紅又黑嘅樣已經喺我面前。
「我一大聲叫『阿Sir打人』，副校長就會知咩事。嚟呀，等緊你。」我見佢唔出聲，我補多句：「琴日你好威架喎！今日成隻狗咁嘅！」
「細路你唔好咁撚得戚。」周Sir篤一篤我心口。
「有時用腦都可以解決到問題嘅。唔洗靠嚇架。比晒權你都煮我唔死。你收皮啦！」
周Sir用力揪起我衣領，佢面目想貼近我。佢真係嬲到一個點想將我食左落肚，佢應該三十幾年黎都未試過比個細路撚狗咁撚。
佢嬲到冇講任何嘢，就將我放低。慢慢消失喺樓梯間。
Lunch, 我同Miss偷吻嘅樓梯間，我又被Miss「罰企」。
「暫時叫做冇事啦。」Miss企得比平時開：「副校長佢地相信我同你係清白。」
「其實好彩隻狗公嗰日冇影相咋。」我細細講：「如果唔係我同你都唔掂。」
「你今次好叻仔呀！」Miss好欣賞咁講：「夠冷靜，夠機智，夠無賴。做戲⋯⋯唔得！扮喊好假。哈⋯⋯你真係好低B呀！」
「但我啲戲呃到你喎！」然後我心存感激咁講：「Miss多謝你，我嗰個兩個小過可以暫時唔記住。」
「暫時唔記架咋。你唔可以鬆懈架！」
「嗯！絕對唔會有事！從今以後我唔會再比人記過！」
「哈？咁有信心？」
「嗯！因為已經我決定左啦！Miss!」我好認真咁講：「我會好好咁努力讀書！我唔會令你擔心！我唔會再添麻煩比你！我會好好咁改變、改正、改好！！」
Miss「嗯」左一聲⋯⋯
「總之！為咗你我會成長！我會大個仔！唔再衝動！做你嘅⋯⋯成熟嘅男朋友！」
我好開心亦都忍唔住咁表達愛意，但Miss冇我預期中嘅反應。佢有微笑，仲要好sweet好冧咁。但我總覺得好奇怪。只見佢表情慢慢地變化，我感覺到係一種欣慰，但令我更感受到嘅係⋯⋯悲傷同不捨？
Miss低頭無端端開始喊，當佢抬頭時，已經喊左出聲，掩住面咁喊。
我唔知咩事，我好擔心，好想開口叫佢一聲阿盈，問佢發聲咩事。但我準備出聲時，佢就舉起手，示意我唔好再出聲，亦都唔好埋嚟。
「低B仔⋯⋯」佢聲震晒，哽咽咁講：「我好開心你同我講會好好讀書。你決定為咗我而生性、好好咁成長⋯⋯我真係好感動！好開心架！但係⋯⋯」
唔知點解我內心中有一股不安正極速擴張。
「當我一諗到你呢幾日受左好多痛苦。你唔應該承受呢啲事⋯⋯我就好難過、好自責！我唔想你再受影響，所以⋯⋯」
.
.
.
「我地分手啦！」
剎那間，我個世界⋯⋯
末日。
= = = = =
ar_hong_91
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學