真人真事改篇﹕師生戀﹕《最接近的陌生距離》: 第二十二章之三

「我去左行山。」Miss好鎮定咁講：「同埋我啲親戚去。」

「唔止架喎。仲有一個人，係邊個黎架？」周Sir氣焰擴張，睇到佢恃勢咁壓落Miss度我就好嬲！

「Miss Wong請答問題。」副校長。

「係，仲有一個人。」Miss Wong雖然好鎮定，但我睇到佢已經好慌張。然後佢抬一抬頭，好堅定咁講——

.
「我男朋友。」




.

我感到氛圍已經變左，場波又轉左打法。

「係咪佢。」副校長指住我：「謝子匡同學係咪你男朋友？」

周Sir笑緊，笑得好令人噁心，佢好想親眼睇住Miss答呢條問題，睇佢出錯。

副校長嘅問題就好似矛咁直插要害。我見到Miss個坐姿都唔自然起黎。





老實講我都一樣。雖然我明白係唔可比人知我地嘅關係，但⋯⋯我同Miss冇做錯事呀！我真心對Miss,Miss亦都一樣！點解要對我地！反而食女食到癲、絕無老師道德嘅仆街，而家可以坐喺審判台上如同判官咁樣治我同Miss死罪，何等諷刺啊！

所以我心底嘅感性希望Miss答「係！」，大方認左佢。可惜理性上，佢唔可以。

「唔係。」Miss。

我聽完內心唔多舒服，我知佢一定否認。但冇諗過答得咁爽快。

「謝子匡同學唔係我男朋友。」Miss再補多句。





副校長坐直個身，望左周Sir一眼。周Sir點一點頭。然後副校長又話：「今日咁嚴肅咁見你地，係因為有人見到你地兩個關係非比尋常。我哋懷疑你地發展出師生以外嘅關係。周Sir你補充一下。」

周Sir囂張氣焰上升：「係嘅。」佢將下巴微微提高，一面「睇我點捽死你哋」嘅樣，就話：「星期六嗰日我同朋友露營。營地係一個要『爆林』先去到嘅地方。喺我同朋友玩緊時，湖嘅另一邊我聽到有聲。我認得把聲好似係Miss Wong。所以我過去睇下，然後我發現Miss Wong同謝子匡兩個攬埋一齊。」

Miss 個樣好不安，但佢點都要望住周Sir，只要一個閃縮嘅眼神就會被人懷疑！頂，平時望佢一秒都難頂，而家仲要望到實一實！

「喂，成日覺得自己係全職差人嗰隻假差人。咁唔專業嘅你？」我保持鎮定，一於同佢耍無賴：「我最多只係叫『懷疑』咋喎。你咁樣引導副校長，好對我同Miss唔公平喎。」

周sir深呼吸一啖想再講時，又被我插把口埋黎：「更正返個說法先啦。阿！Sir！」

.

「激嬲你對手，令佢思路混亂。」

.





偉神，收到晒！

果然周Sir真係開始燥。咁又好難唔燥嘅，條柒頭諗住一心媾掂Miss，但就比佢成日睇唔起嘅學生搶左佢心儀對象。我諗唔止條氣唔順，嗰種嘅不忿同嬲一定比正常大好多倍！

「一個懷疑係Miss Wong男朋友嘅人攬住左Miss Wong.。」周Sir強忍怒意咁講：「我地而家懷疑你就係Miss Wong個男朋友！」

偉神教落，淡定有錢剩。

我深呼吸左一下，笑住講：「吓？！我同Miss Wong呀？」我扮作吃驚，再望一望Miss，講：「我何德何能同全校最靚嘅Miss拍拖？副校長，公道啲你望一望我個樣先。」

剛剛好，今日我怕被人捉髮飾，所以係冇Gel頭嘅！好彩呀！

「係！Miss的確又後生又靚。係男仔都一定鍾意Miss啦。我地成班男仔都好錫Miss架！我相信——」我又望返周Sir:「警察叔叔，你都好鍾意Miss Wong架可？」我托住個頭，扮下可愛。

根據偉神嘅心法，呢個時候要對周Sir進行心理打擊，所以我刻意勾起佢鍾意Miss嘅感覺⋯⋯但係佢媾唔到。

周Sir比我撚到眼都突埋之後，繼續想出招打擊我同Miss. 以佢咁憎被人打斷講嘢，我梗係借機會激到佢更燥啦。

「阿Sir, 攬住唔一定係男朋友架喎。你點證明呀？」

「你地攬到好實！」

「咁有冇親密動作呀？例如⋯⋯你知架。你見到架嘛？」

周Sir E起左棚牙，想噴一句粗口出黎，但佢壓返低，話：「你心知肚明！」

「嗱！咁就唔公道啦鍾副校。」我扮可憐咁講：「我叫佢舉例又唔舉，點樣親密又唔講。就屈我同Miss拍拖唔見得光。喂，反正都係，你吹大啲啦！打埋野戰啦！」我再對住周Sir:「舉個例聽下。男人好忌『不舉』架！」

周Sir瞪大左對眼！





「周Sir, 將你見到嘅講出黎。」

周Sir猶豫左一陣⋯⋯咦？咁即係，佢應該睇唔到我同Miss喺樹下面打車輪喎！佢只係見到我地攬住，就係Miss同我講「破處大計」嗰一刻？！

咁就安全啦。

「我幫你講埋。你有冇見到我地錫呀？」我得戚咁講：「即係法式嗰隻。哇⋯⋯個感覺好似食士多啤梨咁。」我仲要用多下錫手指嘅動作，刺激佢。

周Sir唔出聲，隻眼如同獵人咁望實我。

「摸身摸勢呢？」我笑住咁講：「你知唔知感覺係點⋯⋯應該⋯⋯wow!⋯⋯噢sor, 我講下架咋。」

周Sir握住拳頭，好想打我。





「有冇聽到佢地講嘅嘢？我愛你之類？」我打擊周Sir心理，特別笑得好開心咁講：「Miss把聲講情話，一定好好聽！你聽唔聽到？或者⋯⋯你聽過未呀？想唔想聽？你一定好恨聽到啦！哈哈哈哈哈！」

周Sir咬牙切齒！佢好似準備要撲過黎咁！

「佢男朋友有冇好大膽摷Miss呀?」我滿有好奇心咁講：「其實咩感覺呢？最正應該係女仔嗰種欲拒還迎反應喎！阿Sir你知唔知架？你想唔想試下？講笑唧！你結左婚架嘛！諗都唔好諗添呀！」

周Sir繼續嬲到唔出聲。

「咁周Sir你係咪懷疑我——

落多口釘，包佢發癲。

.

「懷疑我試過嘴過同摷過Miss呀？」1

.

周Sir面色由紅變黑，隻眼啲火要燒出黎，拍一下枱再大叫：「冇啊————！！」

= = = =

ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學