真人真事改篇﹕師生戀﹕《最接近的陌生距離》: 第十八章之三

正當我想衝出去時——
 
「好，我帶你走先！」
 
周Sir捉實Miss隻手嗱嗱聲轉身走人！佢班垃圾朋友喺後面大叫：「有冇咁緊火呀！挑那星！讓多一次比你啊！下次我食先呀！」
 
周Sir同Miss行動都幾快，好快就喺草叢間唔見左影。我狼狽咁掉咗手上嘅硬物追返上去！其實而家仲危險！樹林內鬼影都冇，條狗公真係隨時搵啱機會就擒咗Miss添呀！
 
好彩我仲聽到佢地聲音，我隨住聲音行，應該唔會同Miss走失。
 




「⋯⋯對唔住呀Miss Wong，我唔知佢地會咁冇禮貌！」
 
「⋯⋯我只係想介紹啲好好玩嘅朋友你識⋯⋯你講過怕悶架嘛⋯⋯」
 
Miss一入樹林，就一手甩開周Sir嘅手，愈行愈快，直頭唔想理周Sir.
 
「⋯⋯唔好行咁快呀Miss Wong. 會好易跌親架！」
 
周Sir追返上去，借啲意拖實Miss。
 




「⋯⋯唔使驚，我喺度。我帶你出去，慢慢行。」周sir捉實左Miss, 但好快比Miss一手甩開。
 
我頂你個肺，成件事係你搞出黎。而家就做好人？
 
Miss一直都唔出聲，想行快啲去擺脫周Sir.
 
可能Miss好心急關係，佢一差錯腳，就唔小心跌親。
 
「哎——！」Miss痛叫左聲，手肘擦傷左少少。
 




「Miss Wong!」
 
周Sir埋黎想扶, Miss一口拒絕：「周Sir! 我唔需要你幫手！」
 
Miss自己起返身，面色好嬲咁望住周Sir，好嚴肅咁話：「我要搵返我啲親戚先。我自己走就可以。」
 
「呢度出大路仲有段距離喎！」周Sir仍然好想獻殷勤，話：「太危險啦。一陣你又跌親啦。我扶你行啦。」
 
Miss一手撥開左，好惡咁話：「唔洗架啦！我啲親戚都搵緊我。」
 
親戚搵你？
 
有計！
 
「好彩呢度都收到訊號唧。」我開左電話，打左比Miss。




 
過左一陣，Miss就電話響。
 
Miss好驚訝我打左黎，我驚佢唔接怕會穿煲。 老實講我都係搏一搏咋。
 
不過好彩嘅係Miss 有將我個名改左做「老公」，變相隱藏左我身份！好彩Miss同我好有默契，佢知我想點，接左之後仲開左speaker添。
 
「老公？」
 
嘩——！一黎就要用我真正身份？咁我一開聲未穿煲？
 
不過周Sir應該都知Vick係邊個，呢排Vick仲要成日黎學校。我諗左陣⋯⋯頂！
 
「我同Auntie 搵緊你。」我憑記憶扮Vick把聲，盡量壓一壓低，同埋又用下四圍嘅草、風製造啲雜音。等周Sir聽唔出係我把聲。
 




「我出返黎架啦。喺大馬路等呀。」Miss收線。佢好惡咁望住周Sir。
 
「咁你自己小心啲。」
 
「你真係令我作嘔！」Miss差在未星巴周sir.
 
Miss繼續向外面走。我喺後面跟住，當我確定周Sir唔喺度時，我即刻上前追Miss。
 
「阿盈！」
 
Miss走快兩步，好似唔想比我見到咁。
 
死啦⋯⋯佢係咪嬲我唔出黎打柒班仆街呀？佢係咪怪我帶佢黎左呢度？係咪怪我今日揀行山呀？係咪怪我⋯⋯大鑊！激嬲左Miss!
 
我喺Miss身後教佢點走，大約十分鐘後，我同Miss行返出大馬路。




 
我想追返Miss,但佢冇減慢嘅意慾。Miss仍然自己一個行緊，我Keep住喺後面跟住。剩係睇背影都知佢有幾傷心同憤怒。
 
我都一樣。班人渣鬧佢係雞嗰時我心就黎被火燒到要噴出黎。
 
自己女人被人鬧係雞，身為男人係應該要教訓佢地。但我冇咁做⋯⋯可惡！眼白白睇住最愛嘅女人被人侮辱，我竟然幫唔到手！
 
行左大約十約分鐘，我同佢接近返行山起點時，Miss停低左。我都嚇到即時停低。
 
呢個時候成條路得返我同佢，夕陽西下，剛剛頭頂飛過一群候鳥。場面好靜，靜到得返我自己好緊張嘅心跳。
 
然後Miss一個轉身就撲左我度，攬實我喊得好大聲。
 
 
「哇——！」




 
 
「冇⋯⋯冇事架啦⋯⋯佢地太過份！」我拍一拍佢背脊，好好咁安慰。
 
「你⋯⋯你一直都喺度？」
 
「係呀。我放心唔落。」我拎左張紙巾，幫Miss抹眼淚：「我一直喺旁邊睇住。」
 
「頭先⋯⋯好⋯⋯好恐怖！」Miss驚到喊晒：「佢⋯⋯佢地好似想對我⋯⋯」
 
「我知呀。好危險啊！阿盈⋯⋯對唔住。」我好內疚：「唔好嬲我，我唔啱。」
 
「你對咩唔住呀？」Miss唔多鍾意我突然道歉：「都唔關你事！」
 
「頭先我應該要好好咁教訓佢地！佢地咁樣侮辱你！」
 
「你傻咗呀？！你想同佢地打？佢地打死你架！」Miss:「唔准用暴力！知唔知！」
 
「知⋯⋯」
 
「答應Miss唔准打交！」
 
「我知道啦！」我：「頭先你一直落山都冇同我講野。你係咪嬲左我帶你去呢啲地方？」
 
「傻架咩！唔關你事呀。」Miss邊喊邊講：「我打算去遠啲，確定周Sir唔追上黎咋。被佢見到，你就大件事啦！」
 
Miss再攬住我：「你咁錫我，點會嬲你喎。」
 
Miss原來一直由頭到尾都保護緊我。
 
「我地都係行返落山先，呢度都仲係好近周Sir。」
 
「至少搞一搞個傷口先啦。」我拆左包生理鹽水，簡單咁洗一洗Miss手肘嘅傷口。
 
Miss慢慢冇喊，仲輕輕咁搣我塊面，努力擠出一個令我放心嘅笑容。我又用消毒紙巾抹左佢隻手掌一下，佢就話：「我手掌冇事呀。係手肘損左咋。」
 
我細心咁逐隻手指咁抹，話：「你頭先掂完舊屎黎嘛。好污糟，好多菌架。」
 
Miss噗一聲破涕為笑，就指住膀頭話：「呢度都有屎屎呀。」
 
「哼，污糟貓。」

= = = =
 
ig: ar_hong_91
 
#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學