真人真事改篇﹕師生戀﹕《最接近的陌生距離》: 第十四章之三

「阿匡話佢自己星期六識左個女仔呀！仲媾店左添呀！佢拍緊拖呀！佢今日仲成日傻笑添呀！」阿波好興奮，我睇得出佢係真心替我開心！佢就係一個咁真心嘅人。一個真心嘅兄弟！

一！個！真！心！膠！兄！弟！啊————頂———！！！！

「係呀？」Miss笑住咁講，已經回望住我，保持住笑容。

一個隱藏住殺意嘅笑容。

「我真係恭喜你喎阿匡。」Miss微笑，微笑，佢個樣同某一個emoji好似。





「哈⋯⋯哈⋯⋯」我殭硬晒。

「咁阿匡仲同你地講左啲咩呀？」Miss。

Come on盈姐！唔好再問呀！世間上最易team kill自己友嘅，就係自己啲兄弟呀！！

「咁就犀利啦！」杰少加入戰團。

杰少！唔好呀！真係唔好呀！！





「阿匡話佢條女⋯⋯」

杰少唔好呀！我最多借四仔比你！ 放過我呀！！

「真係好大波架！」

而家只係深秋，但我已經感受到極度嘅陰寒。

「啊！原來你鍾意呢啲女仔架？」Miss繼續對我報以死亡微笑：「係呢，阿匡你女朋友喺邊度識架？」





阿盈，我愛你。唔好咁⋯⋯

「Miss問得好！」阿波：「阿匡頭先扮晒野！話咩遠在天邊，近在眼前喎！」

「阿匡，你啲中文真係幾好咁喎。」Miss

「你教得好呀嘛⋯⋯」

「阿匡個意思係咪話佢喺學校識到女朋友呀？」Miss

「玩我咩Miss!我地男校呀！計我話一定係隔離間女校！」杰少

「係囉⋯⋯係囉！」我。

「唉。我就最憎同學講大話。」Miss個樣而家變得恐怖到唔講得笑：「其實如果兩校同學拍拖，我地老師係會知架。」





「真架？」阿波好真心咁講，事實上我知係Miss堆緊個陷阱出黎等我踩呀！

「係啊！」Miss笑住咁望返我就問：「咁到底阿匡你喺邊度識女朋友架？」

呢個係一百萬嘅問題⋯⋯唔係，呢個係點答都會死嘅問題。

亂答就等於呃Miss,死罪。

如實咁答，即係唔守諾言，爆左少少星期六嘅事比人聽。

到底⋯⋯要點答呢？！

「其實我⋯⋯我喺公園識嘅！」我真係唔知點答！





「邊度公園識到女？我又去見識下先！」杰少。

「你應該問，公園識到咩女？」阿波。

「阿婆囉！大波嘅阿婆我好想去見下呀！」杰少。

「喂！阿匡，你口味都幾重喎。阿婆都媾？！」阿波

杰少、波哥，我地來生⋯⋯唔好再見！！

「原來阿匡你都好重口味喎！鍾意阿婆嘅！」Miss笑得好開心，好開心，好⋯⋯恐怖。

「唔係呀⋯⋯」我好細聲好細聲咁對Miss講。

「咁阿匡有冇話佢星期六開唔開心，同女朋友玩左幾耐呀？」





Miss就好似喺末期癌症病人身上補多一刀咁。

阿波同杰少終於搖晒頭答唔知。好彩我一直都冇講嗰晚啲野出黎，如果唔係，我同Miss一定會散呀！

當我以為我終於脫苦海時。點估到，我尊敬嘅大哥——阿偉，我以為佢一直都幫緊我所以先唔出聲。但係呢個時候嘅佢⋯⋯

「雖然佢仲未講嗰晚嘅事比我地手足知。但我可以好肯定一件事⋯⋯」阿偉停低落黎，慢慢咁回頭望住我同Miss.

佢眼神充滿左睿智，剎那間變成左一個飽受經歷，面對過好多歷練同傷害嘅真男人。
.
.
.
「嗰晚阿匡一定玩得好開心。」





.
.
「哈哈⋯⋯Mi⋯⋯Miss。」我成面冷汗回望返Miss。

「😊」Miss

= = = == 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學