真人真事改篇﹕師生戀﹕《最接近的陌生距離》: 第十一章之五

咪講笑，佢疊功課真係好撚重。 Miss真係唔撚客氣咁將佢要改嘅功課全部比晒我拎。

「想食咩就自己簡啦。」

「整枝可樂先啦。熱屎辣辣！」我對手唔係我咁。

最後我地簡左我屋企樓下嘅冬菇亭大排檔食野。Miss怕污糟，嫌三嫌四。但方圓幾公里內可以食得落肚嘅餐廳就係得呢間，Miss無奈接受。

冇幾耐啲野食黎齊晒。 初初嫌污糟嘅Miss見到食物賣相唔差就率先開餐⋯⋯挑，都話左啲港女都係口不對心架啦。





餐飯同Miss有講有笑，食食下都忘記左佢係我老師。就好似家姐同細佬食飯咁。食到咁上下Miss好認真咁話：「你知我好憎人講大話架可？」

「今日先知，哈哈。」見佢突然嚴肅起來，我都怯左一下。佢之後一定問一啲好難答嘅問題。

「咁我而家問你嘢。 你唔可以講大話架！」

唉，比我估中左。

我點下頭。





「你睇到晒啦。 我手機啲Msg」Miss望住我，又唔係話惡，但好認真咁。呢一刻我感受到嘅佢唔係我老師，而係好似朋友咁。

「Sorry呀。 初初係嫌震機嘈。但其實⋯⋯」接住呢句真係好難為情，唔通講我其實想了解Miss你多啲咩！

我緊張到唔識講野，用筷子騷一騷個太陽穴。

Miss亦都知我難答，亦都唔為難我。 但係佢又問：「你知道幾多嘢呀？」

「你工作壓力好大。比李Sir， Miss鄭催交嘢。 」我：「其實你工作壓力大都唔係今日先知。 我⋯⋯我一直都有留意你。就今咁之嘛，你都冇食Lunch。」





講講下連心嗰句都講埋出黎。Miss瞪一瞪眼，好吃驚我原來知道咁多。

Miss點左下頭，又問：「仲有呢？你仲知幾多。」

「黎Sir想追你！哈哈⋯⋯」

Miss佢「哎吔」左聲，好兇咁話：「你試下講出去，我記你大過！！」佢停一停又講：「仲有呢」

「周Sir想⋯⋯同你⋯⋯」周Sir呢個人真係唔可以提，一提Miss就會唔開心。

「你想話佢想箍煲？」

我點一點頭。

「我同你講呀！」Miss拎住筷子指住我，好嚴肅咁講：「嚴格嚟講，個『煲』就冇存在過。所以⋯⋯唔算係箍煲！明唔明？」





我搖頭。

「唔明就繼續唔明啦！總之我同周Sir除咗係同事就冇其他。」

「你好憎佢咁喎。」

「係呀！所以你上次借周Sir陷害阿添真係搞到我好嬲呀！」

「對唔住囉！盈姐。」我扮左個投降姿勢。

「唔止咁多架喎。」Miss微笑，但有種苦澀。因為接下來嘅嘢正正擊中佢痛處。

「一個叫Vick嘅人，先係你男朋友？」





Miss笑著笑著，眼白位置都紅咗。雙眼泛起剔透嘅淚光。

「你頭先同Vick分左手。」

講完之後，我同佢沈默左。 即使現場環境再熱鬧，呢一刻我覺得好寂靜。

睇黎我講左啲唔應該講，唔應該提嘅嘢。 而Miss嘅沉默亦默認咗我講嘅嘢。

唉⋯⋯我都難過起嚟。Miss喺出面真係有男朋友！雖然分咗手唧！但會復合架嘛！即係代表我⋯⋯媾Miss⋯⋯唉！唔洗諗。

最後我忍唔住問左句：「你地一齊左好耐？」

Miss佢揮一揮手，示意我唔好再問。然後佢又問我：「其實你頭先根本就冇去廁所，係咪？」

我唔知點答，猶豫左一兩秒先識點頭。

「咁你需要啲私人空間嘛。你又要面，又唔鍾意喺學生面前喊⋯⋯」反正都係，我講晒我對佢嘅感覺出黎。

「夠啦！」Miss有啲抱怨咁講，個樣嬲嬲地。

「所以我先一直企喺走廊度，好驚有啲戇鳩仔或者校工入黎阻住你。」

Miss聽到之後好似有少少驚訝，然後佢點左一下頭再對住我笑。

「低B仔。」一個溫柔到令我好溫暖嘅笑容：「多謝你。」

「嗯⋯⋯嗯⋯⋯我地飲杯。」我舉住杯可樂，我比佢個笑突擊到唔識反應。

Miss嘆一口長氣，一面愁容。良久佢望返過嚟，努力擠出微笑。





「多謝你幫左我好多好多嘢！你想我點獎勵你？」Miss擺脫左喺課室嘅一面，好溫柔咁對我講：「不如就呢餐啦！我請你食呢餐飯。」

「哇，我又幫你諗活動、又準備嗰樣呢樣，之前又幫你追功課又盛⋯⋯一餐飯？便宜左你喎！」

「哎吔！你咁得戚？！」Miss收一收起笑容，又搬返佢喺學校嗰個樣出黎，問：「咁你想點呀？」

我諗左諗右，既然佢開到口，咁好嘅機會梗係——

「陪我行街，請我睇戲、請我食飯。」

係，我真係好想約Miss拍一次拖，那怕我一生人就係得嗰一次。

「吓？！」Miss有啲吃驚：「同你去街？」

「哎⋯⋯我知啦我唔靚仔嘛。點襯得起盈姐你。」

「唔係呀！」Miss突然喺枱下面一腳伸左落我上五吋下五吋度。佢唔理我慘叫，再講：「我同你喎。老師同學生私人時間見面喎！」

呢個時候我知道更加唔可縮，要求Miss獎我另一啲野。怯就輸一世。於是我就⋯⋯

「唔係行街。 係買活動物資！」

「吓？」

「咁中文週好多野要搞嘛！個Check Point要準備豐富嘅禮物。哇，Miss你日日都咁忙，唔私人時間搞咁等幾時？」我飲左一啖可樂，再講：「咁啲物資咁多，你搵學生幫手搬都好正常唧。不過⋯⋯就順手睇埋戲，食埋野咁囉。」

「嘻⋯⋯」 Miss忍唔住笑左出黎。

「咁⋯⋯得唔得呀？」

Miss一路笑，一路眼定定咁望住我。我等緊佢答覆嘅時候，感覺時間好慢，好似等緊死刑咁。

「咁你想約幾時呀？」

「就聽日呀！」

我得意忘形咁笑，Miss邊笑邊踢我上五吋下五吋。

= = = = =

ig: ar_hong_91

#小說 #文字 #文學 #愛情 #故事 #師生戀 #講故佬#小甜 #miss故 #紙言 #penana #校園 #校園愛情 #青春 #成長 #初戀 #戀愛 #中學