真人真事改篇﹕師生戀﹕《最接近的陌生距離》: 第五章之四
訓導室1號，所謂嘅「臭格1號」。我喺我面前嘅係周Sir倒比我嘅熱茶，我凝視住盤旋上升中嘅蒸氣，好擔心之後發生嘅事。
良久，周Sir喺「臭格2號」返嚟，喺度門開咗嗰一下，我聽到一把好慘嘅飲泣聲。唔洗估都知，呢把聲係Matthew師兄。搞咩呀？Matthew師兄係出名品學兼優，點會無端端比周Sir罰架？
咪住先。我聽聞周Sir同Miss分咗手，而剛好Matthew 師兄又同Miss傳緊⋯⋯吓？！唔通周Sir想公報私仇？！
周Sir坐我對面，將喺廁所搜到嘅違禁品逐一攤喺我面前。除咗幾包煙同火機外，仲有幾隻四仔。呢啲都係我收錢幫我嗰級同學收埋喺廁所嘅違禁品。
周Sir好親切咁笑，但好令我作嘔。
「謝子匡，你知唔知已經開咗學幾多個星期？」
我唔出聲，佢冷冷一笑就話：「唔知好正常，你足足冇返學十日咁多。」佢深吸一口氣，樣子洋洋得意：「你逃學、遲到、校服儀容唔合格。而家仲要曠課加匿喺廁所煲煙。你知唔知我可以罰你啲咩？」
「記⋯⋯記大過掛⋯⋯」
「係即刻踢你走呀！！」周Sir拍枱大叫，成隻衝出嚟咬人嘅癲狗！
我被佢嚇一嚇，唔敢出聲。
「你想唔想繼續喺度讀書呀？」
我唔知點答，只係冇意義咁點頭。
「咁得啦。只要你肯同我合作就得。頭先有冇見到Matthew 煲煙？」
「吓？！」
「呢度啲違禁品，係咪Matthew收埋架？」
「唔⋯⋯唔⋯⋯係⋯⋯」
「喂！你小心啲答呀！你認左我就即刻踢你走架！」
言下之意，周Sir想我屈Matthew 啦！我明白喇！Matthew係學校入U希望，基本上保佢都嚟唔切啦！如果唔係點會比佢休學兩年嚟養病呢？！除非係嚴重違規，要有一個合理嘅理由先罰到佢呀！死啦！我可以點做呀？我本來想做返衰仔逃避Miss唧！ 冇諗過會玩到咁架喎！認又唔係，屈人又唔係！可以點做呀？！
周Sir微笑一笑，擺明想置身事外。我一屈Matthew, 而周sir只係按校規做嘢，但殺人兇手呢個罪名就落喺我身上！
周啟泰！你真係好撚賤！！
「唔洗驚。你只要喺我面前篤佢灰就得。」周Sir翹起手，講：「你肯同我合作，你逃學嘅事，我會從輕發落。」
周Sir大權在手，使佢呢刻自大狂莽起嚟。我猶豫好耐，周Sir都唔耐煩，只見佢離開左「臭格1號」後無耐就帶Matthew師兄返嚟。
「企好！」周sir命令佢企喺牆角。
然後周Sir就同我講：「謝子匡，唔洗驚。佢已經被我警告咗。」
我望去Matthew師兄度，同之前嗰位全身散發住明日之星氣質嘅佢好唔同！而家嘅佢好似跌咗落泥坑咁，灰頭土臉。一個咁高大嘅男仔比周Sir迫到抽泣，驚恐嘅神色完全表現喺面上！周Sir嘅手段真係好令我心寒！
「阿匡！我一定會保你，佢唔會尋你仇嘅。你只要坦白講你頭先喺廁所見到嘅事就得。」
但係唔聽你指示，你會搞鳩我呀嘛！
我望住Matthew師兄，佢好無辜咁望返我⋯⋯我真係做唔出呢啲事啊！
喺我心煩意亂之際，又有人走咗入嚟「臭格1號」。呢個人就係Miss。
Miss望到Matthew 都在場時，佢表情有一瞬間係嚇咗一跳。似乎佢只係知道我因為食煙而比周Sir捉，冇諗過Matthew師兄都會喺度。
「Miss Wong，你嚟咗嘅？」
「嗯。」Miss 坐埋嚟，喺我旁邊，戰戰兢兢咁講：「我知道咗謝子匡嚴重違規，身為佢班主任我要知道發生咩事。」
「頭先巡樓時，有陣煙味喺廁所傳出嚟。咁啱佢兩個喺度，所以捉佢地落嚟查下到底係邊個食煙囉。」周sir故作寬容咁講。
Miss神色閃過一下慌張，佢眼神厲咗我一下，明顯佢唔相信Matthew師兄食煙。
周Sir同Miss似係拍緊拖但懷疑散咗、Matthew師兄同Miss又傳緊有啲嘢，我就對Miss⋯⋯痴線！總之而家呢個空間、呢個畫面啲人物關係係鬼咁死亂啦！
「咁Miss Wong嚟度就啱晒。一齊聽啦！」周Sir指一指枱上面嘅違禁品，就話：「頭先我喺男廁搜到呢啲嘢出嚟。除咗食煙，仲私藏違禁品。我懷疑係屬於佢地其中一個。我希望兩位同學可以誠實啲。如果你地合作嘅，我會考慮下罰輕手啲。」
周Sir要Miss留低睇佢點對Matthew行刑呀！
Miss保拎冷親講：「係嘅。做錯事一定要認。唔可以講大話！」Miss慢慢向我望嚟，言下之意警告我唔可以屈Matthew師兄！
「Miss Wong講得好啱。呢個係嚴重違規，講大話唔認，罪加一等！隨時會踢出校架！」周Sir望住我，對我製造無形嘅威脅！
現場靜到得返啲冷氣機聲。周Sir同Miss雖然注意力喺我度，但我感受到佢地之間正在產生緊無形嘅角力。喺劍拔弩張之時，飲泣嘅聲音愈來愈大，Matthew 師兄一面焦慮慌張，喉嚨死忍住唔喊出聲，谷到成個人都紅晒塊面。
我點可以咁樣屈人架？但係我唔合作，我隨時冇書讀喎！
所以我⋯⋯
= = = =
IG: ar_hong_91
#小說 #文字 #文學 #愛情 #故事 #師生戀 #講故佬#小甜 #miss故事