真人真事改篇﹕師生戀﹕《最接近的陌生距離》: 第五章之三

嚓——！

火機打出點點耀眼火花，然後匯聚成一撮火苗。火苗緩緩咁將香煙燃點。

一吸一呼，我凝望住飄喺空中嘅煙圈，觀察佢虛實不定嘅動態，心神終於定返少少。好彩平時幫啲手足收埋咗啲煙喺呢個廁所度。如果唔係都唔知點算。

我究竟咩事呀？ 衰仔又做唔成，內心嗰份「感覺」仲愈嚟愈強烈添！聽到關於Miss嘅「謠言」更令我難受到不得了！我好驚真實嘅Miss同我想像中嘅佢係有落差！

佢讚我孝順、佢關心我、佢比紙巾我抹眼淚、佢幫我包紮傷口⋯⋯仲有佢寫比我嘅筆記，呢一切一切美好嘅畫面都因為愈了解佢而逐一破滅。





我好辛苦呀。我好似阻止唔到某啲事情發生，完全係被動捱打狀態。點解會咁架？難道我真係⋯⋯

.

真係鍾意咗Miss?

= = = =

愈係逃避，愈係記掛住。





即使往後幾日我返一日又走一日。即使返咗學校都好，都會同Miss玩下「捉迷藏」，即使我繼續做衰仔特登頂撞Miss、所有功課唔交、唔守對Miss嘅承諾⋯⋯我都係逃避唔到內心嘅感覺。

更矛盾嘅係，喺後期我唔再想逃學。因為我冇得見Miss嘅日子，我反而更難受。另一方面，一返到學校又聽到杰少收返嚟關於Miss嘅風，我就覺得好「銀」耳。

呢排Miss同Matthew 師兄日日一齊放學走⋯⋯

有人見到Matthew師兄同Miss喺課室疑似互flirt⋯⋯

數學陳Sir送花比Miss⋯⋯





傻佬黎Sir成日借啲意喺學校同Miss傾計⋯⋯

有師兄喺酒吧撞到疑似Miss嘅女人攬仔⋯⋯

近日Miss同周Sir貌合神離，好似分咗手⋯⋯

呢一步係點行都死嘅死棋。唔返學就掛住人，返咗學就承受呢啲壓力。

我唔在乎Miss的話，我係唔會怕上面啲謠言。亦都唔會令我呢刻又匿喺廁所煲煙。

喺呢個時候⋯⋯

「你見點呀！Matthew!」

一把好緊張嘅聲音由遠到近咁傳嚟，然後我聽到出面啲聲有啲混亂。過咗一陣，我聽到一把忍喊忍得好辛苦嘅聲咁樣講：「我冇事⋯⋯我冇事⋯⋯我冇事⋯⋯」





呢把聲係Matthew師兄？

「你好唔掂喎！不如早退啦！」

「唔得⋯⋯答應咗Miss Wong要考好A Level。我要返學⋯⋯返學⋯⋯」

然後我聽到水聲，似乎Matthew師兄洗緊面冷靜緊。

「嗰個咁嘅仆街周Sir正一冚家產嚟！Matthew你咁辛苦先醫返好焦慮症，個仆街周就一句說話搞到你咁！」

「係囉！唔洗驚個仆街周Sir架！我地撐你！」

「邊個係仆街周Sir呀？」





突然間，成個氣氛變晒。呢把聲聽落冷靜，但好似雷聲咁帶住閃電劈落嚟！ 死啦，係周Sir入咗嚟呀！

出面啲人靜晒，只係聽Matthew師兄好急嘅呼吸聲。

「上緊堂架喎！你地夠膽公然曠課？」

我聽到啲沈重腳步聲，周Sir來回踱步緊，然後就話：「Matthew, 係咪你帶佢地出嚟？」

「你咪屈喎！」

「你收聲！！」周Sir:「Matthew, 你認晒佢嘅話，我唔會罰佢地。」

「Matthew唔好呀！有事我地一齊頂！」

「係⋯⋯係我⋯⋯」





「周Sir! 我見Matthew情緒唔好先出嚟睇佢咋！」

「佢有焦慮症架！我幫同學都唔得呀！」

周Sir沈默，似乎揚起佢嗰個令人討厭嘅笑容。然後佢話：「咦？你地三個頭先食煙呀？」

呢鑊⋯⋯大件事啦！

我拿拿聲掉枝煙落馬桶，但同一時間，周Sir已經兜腳踢開我度門，我一面慌惶咁望住周Sir。

周Sir望住我手上包煙，再望一望出面，眉頭一皺，細心盤算⋯⋯周Sir露出奸猾嘅笑容。

= = = = 

IG: ar_hong_91

#小說 #文字 #文學 #愛情 #故事 #師生戀 #講故佬#小甜 #Miss故事