真人真事改篇﹕師生戀﹕《最接近的陌生距離》: 第四章之三
放學，留堂。陽光斜斜咁曬入課室，稍為掃走庸懶嘅氣氛。
我放眼全班，簡直嚇咗我一跳。呢個咁安靜又專心嘅畫面真係未試過喺呢個班房度出現！「廢超」時代係一打鐘放學，唔洗一分鐘成個課室係冇晒人！
我眼前呢個畫面不禁令我懷疑，我地班係咪集體撞邪。
Miss喺黑板上寫咗「以畫為喻」四個大字，呢一刻我先知呢個係今個學期嘅第一課。頂，冇返三日原來已經差唔多教到尾，比起其他班我地算教得好快。
「少有喎。唔偷走嘅匡爺？」我旁邊嘅阿偉細細聲同我講
「你理撚得我呀。」我抄緊黑板啲筆記。
「撞邪喎你。」阿偉笑說，同我一齊抄筆記： 「肯留堂都算，仲抄埋筆記？」
阿偉咁樣講一講，我自己先醒覺我做咩喺度抄筆記架？！我好唔自然咁用筆騷一騷個太陽穴，話：「咁⋯⋯留堂嘛。唔抄筆記仲有咩好做呀？」
阿偉冷笑一聲，話：「兩個原因啦。一，成班麻甩仔包括你同我都被Miss Wong嘅美貌臣服咗。 二， 我地個個都驚咗佢啲仔sssssssssss。」阿偉特登拖長s音咁講。
「周Sir?」
「仲有林sir、張sir、梁sir 咁啦。」
我一面不解咁望佢：「課外活動組主任、中文科主任同教務主任喎！件件都大粒喎。我唔返學呢啲日子發生咩事呀？」
「咁都唔明？佢收兵呀嘛！」阿偉：「件件都大粒，邊個學生敢得罪佢呀？」
「咩話？！」
我太驚訝，呢一句都不自覺咁叫得大聲咗，搞到Miss瞪咗我一眼：「謝子匡，黃佳偉。企起身。」
阿偉頂一頂我手，叫我最好想聽Miss話。
Miss行前一步，又發出高冷嘅高踭鞋聲，兩手翹起就話：「係咪好好傾呀？」
Miss兇狠嘅氣勢慢慢壓埋嚟，搞到我同阿偉都唔敢駁嘴。佢繼續話：「我耳仔好靈架，唔好以為我咩都聽唔到。」
Miss聽到我地討論緊佢同其他阿Sir嘅關係啦！難怪佢個樣咁鬼死嬲啦。
「好嘢！有花生食Lu!」喺我地後面嘅杰少落井下石。
「食花生！食花生！」阿波唔識死咁想抽水。頂⋯⋯你兩個白痴！
「許波，張禮杰，企埋起身！」唉⋯⋯下一秒，慘不忍睹。
我以為Miss只係得cool、嚴肅、少少溫柔呢幾個形象，但原來佢鬧人都幾兇狠，估計係因為阿偉嗰句「收兵」辣著咗佢。不過好彩，Miss見我地冇駁嘴就鬧多幾句就算。唉，最後結果係Miss將我地四兄弟調開晒，各自分開咗班房四個角落。我就坐最近門口嗰個角落。唉，以後上堂冇得吹水真係唔知點算。
「課文去到尾聲啦。而家我想同大家玩一個遊戲⋯⋯」Miss邊講邊慢慢行返去老師枱度，就話：「邊個可以同我講到課文嘅重點嘅就可以即刻放學！」
呢個時候我聽見課室內歡呼四起，成個氣氛都積極起嚟。唔係嘛？短短幾日唧，Miss就將全級最懶嘅A班改造成功？
我睇住啲同學一個個舉手，一個個答啱問題，再一個個咁走⋯⋯喂！我冇返學呢三日原來發生咗咁多事？！人事全非喎！
最後成個課室得返我同阿波！
「實用畫嘅條件係『看得明白，認得確切！』。」
「嗯！啱啦！」Miss滿意咁點頭：「你可以放學啦！」
唔係嘛？阿波都快過我走？條仆街仔比Miss讚一讚，就開心到成個人飄晒。
「匡爺，我同佢地打住波等你呀！bye!」仆街波個樣得戚到，我暗暗對佢隊咗個中指！
咯——咯——咯——！成間課室得返我同Miss, 令佢嘅高踭鞋聲變得好響。每一下聲音都好似敲緊入心咁。Miss嚟到我旁邊，依然用佢女王嘅睥睨角度望住我，佢冷冷咁講：「得返你咋喎。你企起身先。」
唉，啲老師真係鍾意罰人企！
「真係一個課文重點都答我唔到呀？」Miss一面難以置信，語氣都惡起上嚟：「你答到阿波頭先嘅答案，我即刻放你走。」
咦⋯⋯係喎！頭先阿波答咗咩？
Miss見我完全答唔到，就深呼吸咗下，加重語氣咁講：「謝子匡。你返嚟學校係做咩架？」
「返學囉。」
「定剩係打波咋？」Miss:「三分前發生嘅事你都唔知？你係冇記性定唔留心呀？」
我被Miss問到口啞啞，Miss唔耐煩咁返去老師位拎咗一份工作紙遞比我，忍住怒意咁講：「做晒先准走！」
頂！係一份好厚嘅工作紙，目測起碼要做成粒鐘喎！
喺我拎住工作紙嗰刻，門外有個男仔企喺度，佢say 咗個hi，就話：「喂，未來師姐！」
「Matthew！」Miss笑得好親初，然後又秒變嚴肅對：「我要幫Matthew 練Oral，你過隔離班房做。做完交比我先可以放學。」
如是者，我被迫搬去第二度做嘢。喺過去另一班房前我不忘咁回頭望返Miss同Matthew，總覺得佢地嘅關係有啲奇怪。不過我見到Miss表情變得寬容，佢地兩個有講有笑，又好似冇咩特別。
都係唔理佢地咁多。嗱嗱聲做完就走，同班兄弟打下波仲好。
我喺寂靜無人嘅B班班房入面開始做Miss比我嘅工作紙，課題就係剛剛教完嘅《以畫為喻》。但係頂你個掣，冇返學幾日，我真係一條都唔識。喺我萬念俱灰，覺得今日放唔到學時，我留意到最尾幾頁原來係份筆記。
「《以畫為喻》課文精要？啲字咁靚嘅？」
成份筆記都係人手寫，唔止啲字好工整好靚，仲有瑩光筆間住啲重點。仲畫埋圖，用圖解方法去說明課文添。呢份真係一份精心炮製嘅筆記，好啱我呢個幾日冇返學嘅學生⋯⋯
唔係！正確來講，呢份筆記係專為我呢啲專注力不足又有少少讀寫障礙嘅SEN學生而設。
整呢份筆記嘅人好明白我好怕睇字、好易分心、亦都好衝動同心急。分分鐘佢亦都好了解我嘅注意力最多只可以維持到半個鐘或更少！睇啲字跡其實都唔難估到係邊個寫呢份筆記——
.
——黃梓盈老師，我班主任。
.
佢係幾時整呢份筆記架？係我第一日冇返學開始？定係今日Lunch?
更令我在意嘅係，我內心有一股莫名嘅感動。讓我想起由細到大，啲老師見我缺席只會問我點解缺席，然後挖下有冇嘢比佢地罰。冇一個老師會關心我學唔學到嘢。
但只有Miss，我地只係相識一日，佢已經知我特性係點、缺點係咩。
只有佢唔會一嚟鬧我逃學。
只有佢關心緊我有冇學到嘢。
只有佢關心緊我嘅成長。
天啊！佢到底係一個點嘅老師嚟架？
呢一刻，或者我唔可以再否定自己感覺。我唔再嬲佢，佢亦都唔再惹我討厭。
甚至乎⋯⋯我⋯⋯
.
我好似有少少鍾⋯⋯。
.
.
今日打波時，我感受內心有一種曾經感受過但又好陌生嘅感覺⋯⋯
Lunch 喺醫療室，Miss幫我包紮時嘅動人嘅側面，令我心動起嚟⋯⋯
忽然間，我恍然大悟⋯⋯
⋯⋯我知道啦。
我真係中咗Miss嘅魔法
.
.
一個名為「愛戀」嘅魔法。
IG: ar_hong_91
#小說 #文字 #文學 #愛情 #故事 #師生戀 #講故佬#小甜 #Miss故