我們是在自修室開始的: 長洲篇(六)

雖然身邊的人和事都在變，有些更教人難過，但日子還是要過的。
所以，在茶餐廳的我，儘管難受但臉上仍然保持笑容。

食完早餐，難得能夠拋低細A和阿怡，我們三個當然不會馬上回到渡假屋......
我們走出茶餐廳之後，再次在碼頭和海旁漫步，但她們彼此都好像放低了一些煩惱(實情是Rebecca放下了她的疑慮)，整個氣氛都不再緊張。
其實我們並不是漫無目的地行海旁，我們是來影風景相，再放上fb,ig証明自己在長洲遊玩的。
(擺上fb,ig，係曬自己玩得幾開心，定係想証明自己冇錢搭飛機都好滿足?)

話說我們並不打算回去叫醒另外兩位團友，因為她們並不重要，所以......等她們起身找我們。
Rebecca的手機，傳來阿怡的Whatsapp，內容大概是「你地去左邊?」......


收到WhatsApp，証明她們都已經睡夠起身，我們也是時候回去。

女仔房......
Rebecca：不如今日去沙灘玩?
阿欣：有乜好玩?
Rebecca：游水，打下排球.....
我：咁你地兩個呢?
細A：我冇所謂
阿怡：我想訓覺 (佢應該仲未訓夠)



等另外兩個不重要的團友食完早餐之後，我們就去了渡假屋外面的沙灘。
話說Rebecca、細A和阿怡一早已經準備去沙灘游水，帶齊了應有的裝備(例如水泡)......
而我，就一早講到明唔落水；至於阿欣呢?
如果大家還記得她只帶了一個小小的背囊去長洲，應該都會知道她是沒有預備過落水玩的。
所以，女子組主要都是打沙灘排球，而我呢......就拿住阿欣的相機，專注影阿欣和Rebecca
(其實係影阿欣居多)

打到咁上下，阿欣回來休息，順道看看這兩日所影的相片。
阿欣在我旁邊，看到一張又一張相片，大部份都是她，她忍不住問......



阿欣：做咩係咁影我?
我：......其實......你係機主，影你好合理!
阿欣：實係咁啦!

阿欣繼續看昨日的相片，我阻也阻不了，她便見到我昨日在海旁拍下的她。
長長的雙腿，天使的身材，可愛的笑容......真係好吸引!

阿欣：你點解釋?
我：其實......我都係隨心影低
阿欣：仲有冇其他?
我：我想你除衫影d! 你真係引死人!
阿欣：死開啦咸濕佬!
我：阿欣呀，可唔可以話我知邊個係你心上人? (我知我好八卦)
阿欣：講你都唔識啦
我：唔好咁啦......


阿欣：好啦好啦，不過唔好俾佢地幾個知，連Rebecca都唔得!
我：得得得

她從手機裡頭打開了一個檔案，裡面很多張都是男仔的相片 (感覺好似男仔手機裡面的J圖file)
打開了一張相片，阿欣指住說：「就係佢喇!」
那個男仔，好型仔好man又唔mk，睇落有少少家底......唉，今劑我連入伍都唔洗諗喇!

我：咁你識唔識佢架?
阿欣：識，佢睇落仲好喜歡我!
其實我好眼淺，我忍唔住喊左出黎，阿欣都睇到。

冇錯，我好脆弱，我喊緊......
阿欣：做乜呀?唔好咁啦，我地仲可以做fd架!

阿欣：真係唔好咁啦，唔好喊啦，外面大把世界呀!


這時我差不多崩潰，爆喊住講我的心底話......

「你唔會明架喇，我都唔想咁架，冇人想咁架，我都想d牙天生又齊又白，我都想過富裕的生活，我都想受歡迎，都想係萬人迷，我都唔想做loser，但係我可以咩?我有得選擇咩?我天生就冇得揀，富與窮冇得揀，好醜冇得揀，想要咩野冇得揀，連特首都冇揀。我經歷過幾多事，你知道咩?」
阿欣或許被我嚇呆了，靜止了十秒才懂得反應過來......

阿欣：其實......你以為我咁樣就真正開心咩?我一直都係扮開心咋。身邊冇乜幾個對我講真話，個個都好假，d男仔為左令我開心，日日都痴住我，我著乜都話靚，點打扮都話好睇，每一個都好虛偽，唔係為左我個樣，就係為左我身體，有邊個有真真正正了解過我內心諗乜，佢地連我鍾意食乜都未知呀?
結果，我們兩個坐在沙灘上互呻了一個下午，在東灣沙灘留下眼淚。