我個隔離位真係好煩: 37: Sing Con - 前夕
「究竟點解妳會咁睇唔開報Sing Con㗎，喺個台上面對住全校人唱歌真係好鬼尷。」我和阿芷看着那張報名表的時候，我打了一個寒顫。
Singing contest，名符其實，就是在同學面前表演唱歌的一個比賽。對於我這種內向毒撚來說，要站上台對着數百人唱歌，
倒不如一槍打死我。
「其實我一直都想試下玩㗎啦，同埋今年係最後一次機會join，所以我唔想自己中學生涯有啲咩遺憾。」原來阿芷還有着這樣的心願，「而且有你傍住，我到時都冇咁驚啦~」
「嗯，有我喺度，到時放心唱，唔洗驚。」雖然我在她的面前逞強，但其實我的內裏，比起她害怕數十倍。
大佬，而家係話要上台喎，小學雞就話無畏無懼啫。萬一到時腳震震點算？萬一到時唱走音點算？萬一到時唔記得歌詞點算？等陣柒到變咗笑柄就唔好啦。
愈諗愈恐怖。
「顥哥哥，你唔洗呃我啦，你每次講大話嘅時候都一定會玩手指。」她指了指我不斷活動的雙手。
「咁......咁唱歌喎，幾百對眼望住喎。」我說話的時候，聲音逐漸細小。
「傻佬。」她握着我的雙手，「到時你唱嘅時候，淨係望住我，咁咪淨係見到一對眼囉！如果你真係驚嘅，咁就將你嘅情緒，分一半俾我，我會陪住你。」
「嗯，有妳喺身邊，應該會冇問題嘅。」我心中的擔子又減輕了一點，因為我知道，有人為我分擔這份恐懼。
她的臉龐，她的眼神，她的心跳聲，她的一切，就是我信心的泉源。
「好喇，名就填完......咁你想揀咩歌唱呢？」阿芷兩眼發光，滿心期待地看着我。我凝視着她的雙眸，估計她只是想試探我。
而我腦海裏一早已經有個想法。
「就唱妳最鍾意嘅Ian啲歌啦！」我秒速回答。
「呢層仲洗講，但係......唱邊首？」阿芷托着頭，卻意味深長地笑。她雖然看似在煩惱，但其實我和她心裏已經有同一個答案。
「唯一想」「留一天 與你喘息」
我們相視而笑。果然我們的想法完全一致。
由於負責寫資料的是我，我在下筆的時候，又猶疑了一會。
如果是阿芷，應該能爽快地填完表格，然後我們就可以安心上路。
「做咩手震震咁呀~」她從我的對面走過來我的右邊坐下。
「er……」我盯着她，腦袋一片空白。
「唱歌啫，洗唔洗咁怯啫？之前喺條街度又攬又錫，嗰陣又唔見你怯。」她皺了皺眉，然後捉着我提筆的手，「乖乖，我揸住你隻手寫~」
她捉着我的手時，身體不自覺地貼近我，以致我的心怦怦、怦怦地跳。
唔驚！有芷妹妹，唔驚！
「搞掂！終於填完表啦。」阿芷舒了一口氣。然而我的手還未抖完。
「見你咁叻叻，等我獎勵下你啦~」然後她就在班房不理眾人眼光地擁抱我。
她每次一擁抱我，我就會變得毫無抵抗力。
周圍還傳來起哄的聲音。
「洗唔洗連喺學校都咁痴身啫？」我輕輕搣了搣她紅潤的面頰。
「你唔鍾意咩？」她抬頭甜笑看着我。
「好鍾意。」我撫摸着她順滑的頭髮，心臟跳得飛快。
就這樣過了一會兒。
「咁我地係咪即係要練歌㗎。」
「唔通妳諗住上去即興唱？」看見她傻得可愛的樣子，我忍不住竊笑。
「Fine。」她嘆了嘆氣，「咁放學上嚟我度練？」
我作出了一個ok手勢。
「喂兄弟，你係咪成日上人地屋企嘅呢~」突然有一個熟悉的身影，站在我們前面，然後奸笑。
「係又點唔係又點？」我抬頭看着那位名為阿傑的八卦人士。
「成日上人地屋企做咩啫~」他把頭探了過來，臉上繼續掛着奸詐的笑容。
「陪佢囉，即係一齊讀下書煮下飯嗰啲？」我以不失禮貌的微笑應對。
「孤男寡女獨處一室，有冇做愛做的事先~」他肆無忌憚地追問下去。畢竟是兄弟嘛，問這些問題的時候自然不用顧忌甚麼底線。
坐在我身邊的阿芷，臉上已經泛起紅暈。
「兄弟，呢啲嘢你羨慕唔嚟㗎啦。」我瞬間回擊他的提問。
這場兄弟互串的戰爭，就這樣迅速分出了高下。
只是，阿芷的臉已經整個漲紅了，而且她還害羞得用雙手遮着自己的臉。
「嗚嗚，唔好再講啦，你搞到我呢啲單身狗好hurt~」阿傑已經自動宣告落敗。
此時阿芷忽爾放開了遮着臉的雙手，然後用瞬間變臉，狡猾地看着阿傑。
「單咩身狗吖你，你而家同霖霖相處成點呀~」她微微勾起了嘴角，向阿傑再狠狠插了一刀。
我以難以置信的眼神看着面前這個看似人畜無害的小妹妹，心裏千萬個佩服。
我不禁伸出手，和阿芷擊了擊掌。
「吓......你講咩呀阿嫂。」他充滿了驚慌失措的氣息。
「冇講嘢~」她伸了伸舌。
「芷妹妹妳真係好鬼叻，番去等我請妳食糖。」我摸了摸她的頭。
「我要食棒棒糖！」她舔了舔自己的嘴唇。
「喂呀，呢啲嘢唔好喺人地面前講啦。」我裝作向她說悄悄話。
「嗚嗚嗚，你兩公婆恰我~」剛才打算抽水的阿傑，就這樣落荒而逃。
我和阿芷對望，然後忍不住笑了出來。
幾經辛苦成功報名後，我們便開始了為期一個月的漫長排練。
每天放學後，我們便一起回家準備比賽，大約一半日子是去她家，而另一半日子則是去我家。唱歌的時候，她負責唱主旋律，而我則負責和音。
記得對上一次我公開唱歌的時間，已經是小學六年級。所以，為了覓回當年的絕對音感，我們也作出了相當長時間的配合、協調和摸索。這一切，都有人陪伴着我。
我們青澀的聲音，隨着時間推移，愈變，愈美。我們揮灑的汗水，隨着日子過去，愈流，愈多。我們彼此的感情，隨着歲月流逝，愈變，愈好。我們挫敗過，灰心過，但只要看着對方和自己向着同一目標進發，便會重拾奮鬥的動力。
大約在比賽前兩三天左右，在排練之後，阿芷又用那個期盼的眼神望着我。
「啊係啦顥哥哥，你有冇打算做番啲舞台效果咁呢。」阿芷做出一個怪異的笑容。我仔細想了一想。
啊，對了！
「真相只有一個！妳係想扮番個MV！」我像《名偵探柯南》一樣，指着她，揭開謎底。
她興奮地瘋狂點頭。
於是，我們把舞台效果，以及開場白一併想好。
我看着她寫的稿，心裏有點感動。
「做咩牛咁眼望住我份稿啫？」她側了側頭，疑惑地看着我。
「冇，我只係睇到有啲眼濕濕。」我揉了揉自己的眼睛。
「傻豬嚟嘅。」她黏着我，摸了摸我的頭，「呢啲呢，係我一直以嚟嘅心聲嚟㗎。」
「嗯，多謝妳，改變咗我咁多。」我抱緊她溫熱的身體。
「我都要多謝你，令到我嘅中學生涯咁圓滿。」她把頭貼着我的胸膛，我卻感覺到衣服好像被沾濕。
「喂，傻女，頭先又叫我唔好喊，而家自己又喊。」我輕掃她的後背。
「咁......咁我感動吖嘛。」她小聲地說着。
「好啦，唔好喊啦，喊就唔靚㗎啦。」我繼續安慰這個眼淺的女孩子。
「咁呀，我笑番啦~」她看着我，眼角仍然有點淚痕，但臉上的笑容很滿足。
這個甜美的笑容，無時無刻都能治癒我的心靈。
這個獨一無二的存在，就是我期待已久、尋覓多時的曙光。
P.S. 忙咗幾日，上番水先。粗略估計應該仲有3-5個chapter左右就完~